သျှမ်းပြည်မြောက်ပိုင်း မူစယ်မြို့တဘက်ကမ်း တရုတ်နိုင်ငံ ဂျယ်ဂေါင်မြို့ စိုက်ပျိုးရေးဘဏ်မှာ ၂ နိုင်ငံနယ်စပ် နေဒေသခံတွေရဲ့ ဘဏ်စာအုပ်တွေကို တရုတ်အာဏာပိုင်တွေက ထပ်မံပိတ်သိမ်းလိုက်ပါတယ်။

ပြီးခဲ့တဲ့ မတ်လ ၂၃ ရက်နေ့ကတည်းက စတင်ပိတ်လိုက်တာဖြစ်ပြီး ကနေ့အထိ ပြန်မဖွင့်ပေးသေးဘူးလို့ မူစယ်ဒေသခံတွေက ပြောဆိုပါတယ်။

“အခုလောလောဆယ် ကျနော်တို့သိရတာကတော့ မူစယ်ဘက်က တယောက်ပါသွားတယ်။ တရုတ်ငွေ ၁ သိန်းကျော်ဆိုတော့ ဗမာငွေကျပ်သိန်းပေါင်း ၂၀၀၀ လောက်ရှိပါမယ်။ အခုဒေသခံတွေကနေ တရုတ်အာဏာပိုင်တွေကိုထပ်မံတောင်းဆိုဖို့လုပ်နေတယ်။ ပြန်ဖွင့်ပေးဖို့လေ။ ဒါ ဒုတိယအကြိမ် တရုတ်တွေ ဘဏ်စာအုပ်ပိတ်သိမ်းတာဖြစ်တယ်။ မနှစ်က တခါလုပ်ဖူးတယ်ဒီလိုမျိုး။”- လို့ မူစယ်မြို့ခံ စိုင်းအောင် ကသျှမ်းသံတော်ဆင့်ကိုပြောပါတယ်။

တရုတ်နိုင်ငံ ဥပဒေနဲ့မညီညွတ်သော မြန်မာနိုင်ငံဘက်ခြမ်းမှ ဆန်၊ ပဲ၊ပြောင်း ၊ သကြား အစရှိကုန်တွေ တင်သွင်းတဲ့ ကုန်သည်တွေရဲ့ဘဏ်စာအုပ်ကိုပိတ်လိုက်တာလို့ သတင်းတွေထွက်ပေါ်နေပါတယ်။

တရုတ်ဘက်ခြမ်းက ဘဏ်စာအုပ်ပိုင်ရှင်တွေကတော့ များသောအားဖြင့် ငွေလဲလှယ်တဲ့လုပ်ငန်းလုပ်ကိုင်နေ သူတွေဖြစ်တယ်လို့သိရပါတယ်။

“အခုတော့ ဒီမူစယ်ဘက်က ကုန်သည်တွေ၊ ဒေသတွင်းအကြီးအကဲတွေကနေ တရုတ်နိုင်ငံအစိုးရဆီကို တင်ပြတောင်းဆိုထားတယ်။ ဘဏ်စာအုပ်တွေပြန်ပေးပေးဖို့လေ ။ ခုထိ ဘယ်နှအုပ်အပိတ်ခံရမှန်းအသေအချာမသိရသေးဘူး။” – လို့စိုင်းအောင်ကပြောပါတယ်။

ယမန်နှစ် ဂျွန်လတုန်းကလည်း နယ်စပ်နေ ဒေသခံ ကုန်သည်တွေရဲ့ ဘဏ်စာအုပ်ပေါင်း ၁၃၀ ကျော်ကို စိုက်ပျိုးရေးဘဏ်က ပိတ်ခဲ့ဖူးတယ်လို့သိရပါတယ် ။

တရုတ်-မြန်မာနယ်စပ် မူစယ်မြို့ နယ်စပ်ဂိတ်ကနေ ၂ နိုင်ငံ ကုန်အဝင်အထွက် နေ့တိုင်းရှိနေရာမှာ ပျှမ်းမျှတရက်ကုန်ပစ္စည်းတန်ဖိုး အမေရိကန်ဒေါ်လာ ၁၅ သန်းလောက် ရှိနေတယ်လို့လည်း မူစယ်ကုန်သည်တွေကပြောဆိုပါတယ်။