သျှမ်းပြည် မြောက်ပိုင်း မူဆယ်မြို့တွင် ယမန်နေ့ ည ၇နာရီခွဲက စွမ်စော်ရပ်ကွက် ရှိ ပန်းဆေး ပြည်သူ့စစ်ပိုင် အဆောက်အဦး တိုက်ခိုက်ခံရကြောင်း သတင်းရရှိသည်။
ဖြစ်စဉ်မှာ ယမန်နေ့ (ဧပြီ ၂၃) ည ၇နာရီခွဲ ဝန်းကျင်က စွမ်စော်ရပ်ကွက်ရှိ ပန်းဆေး ပြည်သူ့စစ်ပိုင် အဆောက်အဦးထဲသို့ အမည်မသိ လက်နက်ကိုင် အဖွဲ့ဝင်ရောက် လာကာ ပစ်ခတ်သွားကြောင် း၊ပြည်သူ့စစ် အဆောက်အဦး ဝင်းထဲ သို့ ဗုံးသီးဟုယူဆရသည့် လက်နက် ၅လုံး ကျကြောင်း မူဆယ်မြို့နယ် အုပ်ချုပ်ရေးမှူး ဦးသူရိန် က သျှမ်းသံတော်ဆင့် ကို ပြောသည်။
“ လူထိခိုက်မှုကတော့မရှိဘူး။ ဒါပေမယ့် ပန်းဆေးပြည်သူ့စစ်ဝင်း ထဲမှာ ၅ လုံးကျသွားတယ်။ ဗုံးလို့ ယူဆရတယ်။အခု သက်ဆိုင်တဲ့ တပ်နဲ့ရဲကတော့ သွားရှင်းနေပါပြီ” ဟု ဦးသူရိန်က ပြောသည်။
လက်ရှိ အချိန်ထိ မည်သည့်အဖွဲ့က လာရောက် ပစ်သည်ကို သက်ဆိုင်ရာမှ စုံစမ်းနေဆဲ ဖြစ်ကြောင်း လည်း ဦးသူရိန်က ဆိုသည်။
အဆိုပါလက်နက်ကိုင်အဖွဲ့သည် ပန်းဆေး ပြည်သူ့စစ်ဝင်းအတွင်း ကားဖြင့် ရောက်လာပြီး ပစ်ခဲ့ကြောင်း ထိုပစ်မှုကြာင့်တရုတ်ပြည် တွင်းသို့ ကျည် တလုံးကျခဲ့ကြောင်း မူဆယ်မြို့နယ် ပြည်နယ်လွှတ်တော်ကိုယ်စားလှယ် စိုင်းကျော်သိန်း ကသျှမ်းသံတော်ဆင့် ကို ပြောသည်။
“ မနေ့က ကားနဲ့လာပြီး ပစ်သွားတာ။ အရပ်ဝတ်နဲ့လာတယ်။ ဘယ်သူဆိုတာတော့မသိသေးဘူး။ တရုတ်ပြည် ကျယ်ဂေါင် ဘက်က တရုတ်စာသင်ကျောင်းဘက်ကိုတော့ ကျည်တလုံး ကျတယ်” ဟု စိုင်းကျော်သိန်း က ဆိုသည်။
လက်ရှိ အချိန်သည် COVID-19ကာလ အချိန်ဖြစ်သဖြင့် ပြည်သူများလည်း အိမ်ပြင် သိပ်မထွက်ကြသဖြင့် လူထိခိုက်မှု မရှိကြောင်း၊ တဖက်တွင်လည်း အဆိုပါ ပန်းဆေးပြည်သူ့စစ် အဆောက်အဦးအနီးသို့ အပြင်လူ သွားလာရန် ခက်ခဲသည့် နေရာဖြစ်ကြောင်း လည်း စိုင်းကျော်သိန်း က ထပ်လောင်း ပြောသည်။
“ အဲ့နေရာက ကျနော်တို့ ဝင်ဖို့ ခက်တဲ့နေရာပါ။ လူထိခိုက်မှုတော့မရှိဘူး။ ဒါပေမယ့် အဆောက်အဦးထဲမှာ ဘာတွေရှိလဲဆိုတာ ကျနော်တို့ဝင်ခွင့်မရတော့ သေချာမသိဘူး” ဟု စိုင်းကျော်သိန်းက ပန်းဆေးပြည်သူ့စစ်ပိုင် အဆောက်အဦး အခြေအနေ ကို ပြောပြသည်။
ဧပြီ ၁၂ရက် ည ၁၀နာရီ ခွဲကျော်တွင် မူဆယ်မြို့ ဆက်သွယ်ရေးရုံး ရှိ MPTရှေ့တွင် လက်လုပ်မိုင်း ၂လုံး ပေါက်ကွဲမှု ဖြစ်ပွားခဲ့သေးကြောင်းသိရသည်။
“ မူဆယ်က ဖြစ်နေကျဆိုတော့ ပြည်သူတွေအနေနဲ့ စိုးရိမ်လွန်တာ လည်း ဘာမှ မထူးဘူးဆိုတဲ့အနေအထားဖြစ်နေတယ်။ လက်ရှိမှာ ကိုဗစ်-၁၉ ကာလလည်း ဖြစ်တော့ အဆင်ပြေအောင်နေထိုင်နေရတဲ့အချိန်လည်းဖြစ်ပါတယ်” ဟု စိုင်းကျော်သိန်းက ဆိုသည်။
မူဆယ်မြို့တွင် များသောအားဖြင့် အစိုးရ အဆောက်အဦးများ၊ ပြည်သူ့စစ်ပိုင်း အဆောက်အဦးများကို သာ မိုင်းခွဲခံရကြောင်း၊ ရပ်ကွက် လူနေအိမ်တွင် မိုင်းပေါက်ကွဲမှု တကြိမ်တခါမျှမရှိကြောင်းလည်း မူဆယ်ဒေသခံများက ပြောသည်။
“ မိုင်းတွေ ပေါက်ကွဲတာဖြစ်ရင် ရပ်ကွက်နေအိမ်မဖြစ်ဖူူးဘူး။ အဓိက အစိုးရ အဆောက်အဦးတွေ ပြည်သူ့စစ်တွေ နေတဲ့နေရာပဲ။ ဒါကြောင့် သူတို့အချင်းချင်းကြားမှာဖြစ်တဲ့ကိစ္စပဲလို့ထင်တယ်” ဟု မူဆယ်ဒေသခံ စိုင်းမောင် က ဆိုသည်။
ထိုပေါက်ကွဲမှုများဖြစ်ပြီးသည့်နောက် တပ်နှင့် ရဲဘက်မှလည်း မူဆယ်မြို့ လုံခြုံရေး အင်အား ထပ်မံတိုးမြှင့်ထားကြောင်း သက်ဆိုင်ရာမှ ပြောပြသည်။
“ အခု ပစ်ခံရတဲ့ ပန်းဆေး အဆောက်အဦးက ပန်ခမ်းတံတား နားမှာရှိတယ်။ ပန်ခမ်းတံတား မှာကလည်း တပ်ရောရဲရော လုံခြုံရေးချတာရှိတယ်။ လှည့်ကင်းတွေလည်း အမြဲသွားနေတာရှိတယ်။ ဒါပေမယ့် အခုတော့ လုံခြုံရေး တိုးမြှင့်ထားရတယ်” ဟု မူဆယ်မြို့နယ် အုပ်ချုပ်ရေးမှူး ဦးသူရိန် က ဆိုသည်။
ယခုနှစ် ဖေဖော်ဝါရီလကုန်ပိုင်းတွင် အစိုးရ တပ်မတော်မှ မူဆယ်မြို့ နယ် အတွင်း လှုပ်ရှားနေသည့် ပြည်သူ့စစ်များကို ခေါ်ယူ ကာ တပ်မတော်မှ ချမှတ်ထားပေးသည့် နေရာသို့ ပြန်သွားကြရန် နှင့် မြို့မ ပြည်သူ့စစ်မှ လွဲပြီး ကျန်ပြည်သူ့စစ်များ တပ်ပြည်ပသို့ လက်နက်ခဲယမ်း ကိုင်ဆောင်သွားလာခြင်း မပြုရန် ပြောကြားခဲ့သည်။
ထို့ပြင် မူဆယ်မြို့တွင် ဖွင့်လှစ်ထားသည့် တရားမဝင် ဂိမ်းဆိုင်များ၊ လောင်းကစားရုံများလည်း ပိတ်ရန် ပြောဆိုခဲ့သေးသည်။
Leave a Comments