ကိုဗစ် လူနာ အမှတ် (၁၂၁) နဲ့ ထိတွေ့ခဲ့တဲ့ လူတွေ ဟာ အလွန်များပြားပြီး လက်ရှိမှာ သက်ဆိုင်ရာက ရှုပ်ထွေးမှုတွေနဲ့ ရင်ဆိုင်နေရပါတယ်။

ဧပြီ ၂၁ရက် ည ၈နာရီ တွင် ကျန်းမာရေးနဲ့ အားကစားဝန်ကြီးဌာနက ကိုဗစ် လူနာ ၂ဦးတိုးကြောင်းထုတ်ပြန်ကြေညာခဲ့ပြီး အဲဒီအထဲမှာ တောင်ကြီးက ကိုဗစ်လူနာ အမှတ် ၁၂၁ တဦးပါလာပါတယ်။

သူကတော့ မတ် ၂၂ရက်နေ့က အင်္ဂလန်ကနေ ရန်ကုန်မြို့ ကိုပြန်ရောက်လာပြီး Yangon Airport Hotel တွင် Quarantine ခံယူခဲ့သူတဦးပါ။

ရန်ကုန် Quarantine ဝင်ချိန်ကတည်းက ခံတွင်း အရသာနဲ့ အနံ့ မရရှိခဲ့ဘူးလို့ သိပါတယ်။

ထို့ပြင် quarantine ပြည့်ပြီး ဧပြီ ၅ ရက်နေ့က ရန်ကုန် မှ ဟဲဟိုး ကို Golden Myanmar Airline ဖြင့် ခရီးသည် ၂၈ နဲ့ အတူ လိုက်ပါခဲ့ပါတယ်။

ယမန်နေ့ တွင် သက်ဆိုင်ရာ စာရင်းအရ လူနာအမှတ်(၁၂၁) ထိတွေ့ခဲ့သူဟာ ၁၂ဦးသာ ရှိကြောင်းသိရပြီး လက်တွေ့မှာတော့ ၅၀ ကျော်ရှိနေပါတယ်။

ဒါ့အပြင် Second contant ထိတွေ့မှုတွေ ကလည်း ဆက်လက်ရှိတော့ လက်ရှိ လူနာအမှတ် ၁၂၁ ရဲ့ထိတွေမှုဟာ ရှုပ်ထွေးနေကြောင်းလည်း သက်ဆိုင်ရာ ဌာနတွေက ပြောဆိုလိုက်ပါတယ်။

“သူ နဲ့ ထိတွေ့တဲ့သူ အားလုံး ပျှမ်းမျှ ၅၀ လောက်ရှိမယ်။ သူ့မိသားစုဝင်တွေပါတယ် ပြီးတော့ သွားဆေးခန်း သွားဆရာဝန် လဲပါတယ်။ လေယာဉ် တူတူစီးတဲ့ သူတွေလဲ ပါမယ်” လို့ ပြည်နယ်အထူးရောဂါ နိမ်နင်းရေးဌာန လက်ထောက်ညွန်ကြားရေးမှူး ဒေါက်တာနှင်းအိဖြူ ကပြောပါတယ်။

လူနာအမှတ် (၁၂၁) နဲ့ထိတွေ့တဲ့သူအားလုံးကို လိုက်ရှာထားပြီး၊ သူသွားတဲ့နေရာတွေ၊ ထိတွေ့တဲ့သူတွေအားလုံးကိုလည်း ဓာတ်ခွဲနမူနာ ပို့ထားကြောင်း ဒေါက်တာနှင်းအိဖြူ က ပြောပြပါတယ်။

“သူ သွားထားတဲ့နေရာကိုလဲ သူသေချာပြောပြထားတယ်။ ဒီနေ့တော့ သူ သွားထားတဲ့နေရာ ထိတွေ့တဲ့သူတွေကိုတော့ ဓါတ်ခွဲနမူနာ ယူထားပြီးပြီ”လို့ ဒေါက်တာနှင်းအိဖြူ ကပြောပါတယ်။

ဆက်လက်ပြီး တွေ့တဲ့သူတွေစာရင်း အရ ဆိုရင် “ သူ့မောင်လေး လဲပါတယ်။ သူ ခေါက်ဆွဲ စားတဲ့ နောင်မွန် ခေါက်ဆွဲ ဆိုင်လည်း ပါတယ်။ ထိတွေ့သူ အားလုံးကို ဓါတ်ခွဲနမူနာ ယူထားပြီး စစ်ဆေးသွားမယ်” လို့ ဒေါက်တာနှင်းအိဖြူ ကပြောပါတယ်။

လူနာ အမှတ် (၁၂၁) သည် တောင်ကြီးမြို့ မြို့မ ရပ်ကွက်နေထိုင်သူ ဖြစ်ပြီး ဘုရားဖြူတွင်နေထိုင်သည့် ကိုယ်ဝန်ဆောင်နေတဲ့ မိခင်ကို မကြာခဏ သွားလည်ပတ်ခဲ့ပါတယ်။

သူမဟာ သူငယ်ချင်းတွေ၊ မိသားစုဝင်တွေနဲ့ တောင်ကြီးဈေး ၊ တောင်ပေါ်စခန်း ပရဟိတကျောင်း ၊ ဘုရားဖြူရပ်ကွက်၊ သွားဆေးခန်း၊ ရွှေဘုန်းပွင့်ဘုရား၊ တောင်ကြီး တောင်ပေါ် ၊ Royal TGI Hotel နှင့် VX Bar တို့မှာလည်းသွားရောက်လည်ပတ်ခဲ့သေးပါတယ်။

ဒါ့အပြင် လူနာအမှတ် (၁၂၁)ရဲ့ ရှုပ်ထွေးလှတဲ့ ထိတွေ့မှု အကြောင်းကို စုံစမ်းရသလောက်ကတော့ တောင်ကြီးမြို့ ရဲစခန်း နဲ့ မြို့မ တရားသူကြီး တို့ကို တိုက်ရိုက်ထိတွေ့ခဲ့ခြင်းမရှိသော်လည်း Secondary Contant ဆိုတဲ့ထိတွေ့မှုရှိကြောင်း သက်ဆိုင်ရာက ပြောဆိုလိုက်ပါတယ်။

ဒါကြောင့် တောင်ကြီးမြို့မ ရဲစခန်း နဲ့ မြို့နယ် တရားသူကြီးတို့ က လူ Secondary Contant ဖြစ်တဲ့အလျောက် အိမ်မှာပဲ အသွားအလာ ကန့်သတ်ထားကြောင်း ( Home Quarantine) ပဲ လုပ်ထားကြောင်း ဒေါက်တာ နှင်းအိဖြူ က ရှင်းပြပါတယ်။

“မြို့နယ် တရားသူကြီးတွေ ရဲစခန်းက ဝန်ထမ်းတွေက အတည်ပြုလူနာ နဲ့ တိုက်ရိုက်ထိတွေ့တာ မရှိဘူး။ အတည်ပြု လူနာကို ထိရိုက်ထိတွေ့ခဲ့သူ ၊နောက်ထပ် ထိတွေ့ထပ်ပြီး ထိတွေ့တဲ့မျိုး Secondary Contant လို့ခေါ်တာပေါ့” လို့ ဒေါက်တာနှင်းအိဖြူ က အသေးစိတ်ရှင်းပြပါတယ်။

လက်တလော အခြေအနေမှာတော့ သူမ တိုက်ရိုက်ထိတွေ့သူ ၅၀ ဦးကို ဓါတ်ခွဲနမူနာ ယူထားပြီး ရောဂါပိုးရှိမှသာ Secondary Contant များကို ဆက်လက်ပြီး ဓါတ်ခွဲ စစ်ဆေးသွားမယ်လို့ သိရပါတယ်။

“အခုက သူုတို့က secondary contant ပဲ ရှိနေသေးတာကြောင့် သူတို့ကို အိမ်မှာပဲ Home Quarantine ပဲ ထားထားပါတယ်။ အဖြေထွက်တဲ့ထိတော့ သူတို့ကို အိမ်မှာ နေပေးပါလို့ ပြောထားပါတယ်”လို့ ဒေါက်တာနှင်းအိဖြူ က ဆိုပါတယ်။

လူနာ အမှတ် ၁၂၁ ဟာ ဧပြီ ၅ ရက်နေ့တွင် တောင်ကြီးသို့ ရောက်ရှိလာပြီး ဧပြီ ၆ ရက်နေ့တွင် တောင်ကြီးဈေး ၊ ဧပြီ ၇ ရက်နေ့တွင် လွိုင်ကော်မြို့ရှိ တောင်ပေါ်စခန်း ပရဟိတကျောင်း သို့ သွားရောက်ခဲ့သေးသည်။

ထို့ပြင် ဧပြီ ၈ရက်မှာ မြဆေးခန်းတွင် သွားနှုတ်ရန် သွားခဲ့ပြီး ဧပြီ ၁၉ ရက် ထိ လူနာအမှတ် (၁၂၁) နှင့် တိုက်ရိုက်ထိတွေ့ခဲ့သူအားလုံးကို ဓာတ်ခွဲခန်းနမူနာပို့ထားကြောင်း သိရပါတယ်။

ဒါပေမယ့် လူနာအမှတ် ၁၂၁ ဟာ ဧပြီ ၆ရက်နေ့မှာ တောင်ကြီးဈေးတွင် ထိတွေ့ခဲ့သူ ကြုံခဲ့သူဘယ်နှယောက်ရှိမှာလဲဆိုတာ တောင်ကြီးပြည်သူတွေက စိုးရိမ်စိတ်တွေ ဖြစ်နေပါတယ်။

“ ဧပြီ ၆ရက်နေ့ က သူ တောင်ကြီးဈေးသွားထားတယ်။ အဲ့မှာ ဘယ်သူတွေ နဲ့များ ထိတွေ့ခဲ့လဲ။ ဘယ်လောက်များ ကူးနေမလဲ။ ဒါတွေ တွေးပူနေရတယ်” လို့ တောင်ကြီး နေထိုင်တဲ့ နန်းဇင် က ပြောပါတယ်။

လူနာ အမှတ် ၁၂၁ ရဲ့ ၁၀ရက်ကျော် တောင်ကြီးမြို့ ကို သွားလာ၊ လည်ပတ်မှုကြောင့် တောင်ကြီးမြို့ ပေါ် လူနာများ ထပ်တိုးလာပြီး အခြေအနေ ဆိုးရွားလာမှာကို ဒေသခံ တွေက စိုးရိမ်ပူပန်နေကြပါတယ်။

ဒါ့ကြောင့် လက်ရှိအခြေအနေမှာ မိမိနေအိမ်တွင်သာ နေထိုင်ကြပြီး၊ လိုအပ်မှသာ အပြင်ထွက်စေချင်ကြောင်းလည်း တောင်ကြီးမြို့မှာနေထိုင်သူများက ပြောဆိုလိုက်ပါတယ်။