သျှမ်းပြည် အရှေ့ပိုင်း သျှမ်းပြည်နယ်ဝန်ကြီးချုပ် ခရီးစဉ်နှင့်အတူ လိုက်ပါသည့် အမျိုးသား ၂ဦး ဓာတ်ခွဲခန်း အဖြေ Negativeဖြစ်ကြောင်း သိရသည်။

အဆိုပါ ၂ဦးသည် သျှမ်းပြည်နယ် လွှတ်တော်ဥက္ကဌ၏ ယာဉ်မောင်း နှင့် သျှမ်းပြည်နယ် ရဲမှူးချုပ်၏ ကိုယ်ရေး အရာရှိ (PSO ) တို့ဖြစ်သည်။

ထိုခရီးစဉ်တွင် သျှမ်းပြည် ဝန်ကြီးချုပ် နှင့် အတူ ဝန်ကြီး ၄ဦး၊ သျှမ်းပြည် လွှတ်တော် ဥက္ကဌ နှင့် သျှမ်းပြည် ရဲမှူးချုပ်တို့ လိုက်ပါခဲ့သည်။

“ဒီမနက်မှ ၂ ယောက်စလုံး အဖြေသိရတယ်။ Negative ဖြစ်တယ်တဲ့။ ခုတော့ ဝန်ကြီးချုပ် နဲ့ အပါ ဝန်ကြီးတွေ အားလုံး ဆရာဝန်တွေရဲ့ညွန်ကြားချက်ကို လိုက်နာပြီးတော့ နေထိုင်သွားမယ်။ အခု ဆရာဝန်တွေရဲ့ လမ်းညွှန်မှုကို စောင့်နေပါတယ်။”ဟု သျှမ်းပြည်နယ် အစိုးရအဖွဲ့ အတွင်ရေးမှူး ဦးစိုးစိုးဇော်  ကသျှမ်းသံတော်ဆင့် ကိုပြောသည်။

၎င်း ၂ ဦး၏ အဖြေစောင့် ကာလတွင် ဝန်ကြီးချုပ် အပါအဝင် ဝန်ကြီးများ ၊လွှတ်တော်ဥက္ကဌ နှင့် ရဲမှူးချုပ် တို့သည် Social Distancing ဖြင့် နေထိုင်ထားခြင်းဖြစ်ကြောင်း သျှမ်းပြည်နယ်အစိုးရအဖွဲ့ လူမှုရေးဝန်ကြီး ဒေါက်တာမျိုးထွန်း ကပြောသည်။

ထို့ကြောင့် ကျိုင်းတုံ ခရီးစဉ်တွင် လိုက်ပါသည့် လွှတ်တော်ဥက္ကဌ ယာဉ်မောင်း နှင့် သျှမ်းပြည်နယ် ရဲမှူးချုပ်၏ ကိုယ်ရေးအရာရှိ (PSO) တို့သည် ကိုယ်အပူချိန်မြင့်မားလာကာ ထို သူ ၂ ဦးကို ကျိုင်းတုံ ပြည်သူ့ဆေးရုံတွင် ထားခဲ့ပြီး ဓါတ်ခွဲ နမူနာကို ရန်ကုန်အမျိုးသားကျန်းမာရေးဓါတ်ခွဲဌာန သို့ ပို့ဆောင်စစ်ဆေးခဲ့သည်။