ကိုဗစ် -၁၉ ရိုက်ခတ်မှုကြောင့် တရုတ်ပြည်နယ်စပ်သို့တင်ပို့နေသည့် သစ်သီးများ ပျက်စီးကာ အရှုံးပေါ်နေကြောင်း မူဆယ် သစ်သီးပွဲရုံများထံ စုံစမ်းသိရသည်။
လက်ရှိ ကာလသည် ကမ္ဘာတဝှမ်း သာမက မြန်မာနိုင်ငံတွင်လည်း ကိုဗစ်-၁၉ ၏ ရိုက်ခတ်မှုကြုံ နေရပြီး၊ တရုတ်နိုင်ငံသို့တင်ပို့သည့် သစ်သီးကုန်တင်ကားများကို စိစစ်ရာတွင် ကြန့်ကြာမှုရှိသဖြင့် သစ်သီးများ ပုတ်သိုးကာ အရှုံးပေါ်မှုများဖြစ်ပွားခဲ့ကြောင်း မူဆယ် သစ်သီးပွဲရုံ ဥက္ကဌ ဦးစိုင်းခင်မောင်က သျှမ်းသံတော်ဆင့် သို့ ပြောသည်။
“ လမ်းပိုင်းမှာ ၁၂၀၀ ရှိတယ်။ ဆုံးရှုံးမှုက ကားခတောင်မရဘူး။ တစီးကို သိန်း၃၀၊ သိန်း၄၀ ဆုံးတယ်။ ဒီတပတ်က အခြေအနေပိုဆိုးတယ်” ဟု ဥက္ကဌ ဦးစိုင်းခင်မောင် က ဆိုသည်။
မူဆယ်မြို့ သို့တက်မည့် ကားသမားများအနေဖြင့် မြေပြင် သတင်းကို နားထောင်ပြီး မှ တက် စေလိုကြောင်း၊ ယခုရက်ပိုင်း တက်မည်ဆိုပါက ဆုံးရှုံးမှု များနိုင်ကြောင်းလည်း ဦးစိုင်းခင်မောင်က ပြောသည်။
တရုတ်နိုင်ငံသို့ဝင်မည့် ကားများကိုလည်း တရုတ်နိုင်ငံမှ သေချာစိစစ်မှုများပြုလုပ်ပြီး တရုတ်နိုင်ငံသား ကားသမားများ လာရောက်မောင်းရသဖြင့် အချိန်ကြန့်ကြာမှုရှိကြောင်း လည်း မူဆယ် သစ်သီးပွဲရုံများက ပြောဆိုလိုက်သည်။
“ တရုတ်ဘက်က မြန်မာကားအထာမသိတော့ ကားပျက်တာတွေလည်းရှိပါတယ်” ဟု ဦးစိုင်းခင်မောင် က ထပ်လောင်းပြောသည်။
တရုတ်ဘက်မှ ကိုဗစ်-၁၉ ကာလ အတွင်း ကားများကို စစ်ဆေးသည့်အခါ ပုံမှန်ထက် ကြာကြောင့်၊ မူဆယ် ၁၀၅မိုင် မှ တရုတ်နိုင်ငံသို့ တရက်လျှင် အစီး( ၃၀၀ )စီးသာ ပေးဝင်ကြောင်းသိရသည်။
မြန်မာပြည်မှ မူဆယ်သို့ တက်လာသည့် နေ့စဉ် အစီး ရာချီ တက်လာကြသဖြင့် မူဆယ် (၁၀၅)မိုင်တွင် အသီးကားများ နေ့စဉ် ၁ထောင်ကျော် ပိတ်မိနေကြောင်းလည်း မူဆယ်မြို့ သစ်သီးပွဲရုံ ပိုင်ရှင် စိုင်းမြင့်ဘို က သျှမ်းသံတော်ဆင့်သို့ပြောသည်။
“ မူဆယ် ၁၀၅ မိုင်မှာ ကားတစီးကို ၃ ည ကနေ ၆ ညထိ အိပ်ရတယ်။ အဲ့မှာ အသီး အရည်အသွေး ကျလာတယ်။ဈေးတွေ မရဘူး။ကားတစီးလုံး အသီးတွေပုတ်လို့သွန်ရတာတွေတောင်ရှိတယ်” ဟု စိုင်းမြင့်ဘို က ဆိုသည်။
ထို့ကြောင့် မြန်မာပြည်မှ မူဆယ်သို့ တက်လာမည့် ကားများအနေဖြင့် ကားခ ပါ ဆုံးရှုံးမှုမရှိအောင် စိစစ်ပြီး လာရန် လည်း မူဆယ်သစ်သီးပွဲရုံ များကပြောဆိုလိုက်သည်။
ကိုဗစ်-၁၉ ကာလ ကြောင့် မြန်မာ-တရုတ်နယ်စပ်ဂိတ်များတွင် လူဝင်၊ထွက် မှုကို ဧပြီ ၁ရက်နေ့တွင် စတင်ပိတ်လိုက်ပြီး ကုန်သွယ်ရေး အတွက် ကုန်ကားများ ပေးဝင်သော်လည်း ယာဉ်မောင်းများနှင့် ယာဉ်နောက်လိုက်များ ပေးမဝင်ဘဲ တရုတ်နိုင်ငံသားများက လာရောက်မောင်းရကြောင်း သိရသည်။
လက်ရှိ ကိုဗစ်-၁၉ ကာကွယ်ထိန်းချုပ်သည့် ကာလဖြစ်သဖြင့် နယ်စပ်ကုန်သွယ်ရေး လည်း ဆုံးရှုံးမှုများကာ ရောင်းဝယ်မှု အဆင်မပြေကြကြောင်းလည်း မူဆယ် ဒေသခံများက ပြောဆိုလိုက်သည်။
