တောင်ကြီးမြို့ COVID-19 အတည်ပြု လူနာအမှတ် ၁၂၁ နှင့် ဆက်စပ်သူ ပင်လုံမြို့ဒေသခံ ၂ဦး သံသယ လူနာ အဖြစ် သတ်မှတ်ခံရကြောင်း သိရသည်။

ဧပြီ ၂၁ရက် ည ၈နာရီ တွင် ကျန်းမာရေး နှင့် အားကစားဝန်ကြီးဌာန မှ ထုတ်ပြန်သည့် COVID-19 လူနာ ၂ဦးတွင် တဦးသည် တောင်ကြီးမြို့တွင်နေထိုင်သည့် အသက် ၂၁ အရွယ် အမျိုးသမီးတဦးဖြစ်ကြောင်း ထုတ်ပြန်ချက်တွင်ရေးသားထားသည်။

ထို့ကြောင့် ထိုသူနှင့် ထိတွေ့ခဲ့သည့် ပင်လုံဒေသခံ ၂ ဦး၏ ဓာတ်ခွဲနမူနာကို ရန်ကုန်အမျိုးသား ကျန်းမာရေးဓါတ်ခွဲဌာန သို့ ပေးပို့ ကာ စစ်ဆေးသွားမည်ဖြစ်ကြောင်း လွိုင်လင်မြို့နယ် မဲဆန္ဒနယ် အမှတ်(၂) နန်းမြထွေး က သျှမ်းသံတော်ဆင့်သို့ပြောသည်။

“ ၂ ယောက် စလုံးကို quarantine လုပ်ဖို့ ပင်လုံတက္ကသိုလ်မှာ သွားနေပြီ၊ ကျန်းမာရေးတော့ ကောင်းတယ်။ သူတို့ရဲ့ ဓါတ်ခွဲနမူနာကို ရန်ကုန်အမျိုးသားဆေးရုံမှာ စစ်ဆေးမယ်။ တကယ်လို့ Negative ဖြစ်ရင် သူတို့ အိမ် သူတို့ ပြန်လာနေလို့ရပီ” ဟု လွိုင်လင်မြို့နယ် မဲဆန္ဒနယ် အမှတ်(၂) လွှတ်တော်ကိုယ်စားလှယ် နန်းမြထွေး ကပြောသည်။

ထိုပင်လုံဒေသခံ ၂ဦးသည် လူနာအမှတ် ၁၂၁ နှင့် အတူ ဧပြီ ၅ ရက်နေ့က ရန်ကုန်မှ ဟဲဟိုးသို့ လေယာဉ် အတူစီးလာသည့် ခရီးသည်များဖြစ်ကြောင်း နန်းမြထွေး ကပြောသည်။

“သူ အနံ့အရသာ မခံစားရတော့ဘူးဆိုရင် သူလည်း ဆရာဝန်တစ်ယောက်ပဲ ဘာကြောင့် သူ့ကိုသူ self quarantine မလုပ်လည်း ဘာကြောင့် အပြင်တွေ သွားနေလည်း ဆိုတာ သုံးသပ်ချင်ပါတယ်” ဟုလူနာ အမှတ် ၁၂၁ နှင့် နီးစပ်သည့် အမည်မဖော်လိုသည့် သူတဦးကသုံးသပ် ပြောဆိုခဲ့သည်။

လူနာ အမှတ် ၁၂၁ သည် မတ်လ ၂၂ ရက်နေ့ က အင်္ဂလန် နိုင်ငံမှ ပြန်လာသူဖြစ်ပြီး ရန်ကုန် Airport Hotel တွင် Quarantine ဝင်ခဲ့သည်။

ထိုကာလ အတွင်း အနံ့အရသာ ပျောက်နေသည့် အကြောင်းကို နေ့စဉ် ကျန်းမာရေး လာစစ်ပေးသည့် ကျန်းမာရေးဝန်ထမ်းများကို ပြောပြသော်လည်း အံသွားပေါက်နေသည့်အတွက် ကြောင့် ဟုသာ ပြောဆိုခဲ့သည်။

ထို့ကြောင့် Covid-19 ရောဂါ ဖြစ်မှန်းမထင်ခဲ့ကြောင်း quarantine ရက်ပြည့်သည့် ဧပြီ ၅ရက်တွင် တောင်ကြီးကို ပြန်လာခဲ့ပြီး၊ ဧပြီ ၆ရက်တွင် တောင်ကြီးဈေး၊ ဧပြီ ၇ရက်တွင် လွိုင်ကော်မြို့ရှိ တောင်ပေါ်စခန်း ပရဟိတကျောင်း သို့ သွားရောက်ခဲ့သေးကြောင်းသိရသည်။

ဆက်လက်ပြီး ဧပြီ ၈ရက်နေ့တွင် သွားနှုတ်ရန် မြဆေးခန်းသို့ သွားခဲ့သေးကြောင်းသိရသည်။

ဧပြီ ၁၉ ရက်ထိ လူနာအမှတ် ၁၂၁သည် အနံ့အရသာမရသဖြင့် တောင်ကြီး ဆေးရုံကို သွားပြခဲ့ပြီးသံသယ လူနာ အဖြစ်သတ်မှတ်ခဲ့ရာ ဧပြီ ၂၁ ရက် ညတွင် ဆေးစစ်ချက် အဖြေ positive အဖြေထွက်ခဲ့သည်။

ထို့ကြောင် လူနာအမှတ် ၁၂၁ နှင့် ထိတွေ့ဆက်စပ်ခဲ့သည့် ပြည်သူများအားလုံး တောင်ကြီး ဆေးရုံတွင် ဆေးစစ်ရန် လည်း သက်ဆိုင်ရာက ပန်ကြားထားသည်ကို တွေ့ရသည်။

မြန်မာနိုင်ငံတွင် Covid-19 စောင့်ကြည့်လူနာ ၁၂၁ ဦးရှိပြီး သျှမ်းပြည်နယ်တွင် ရောဂါပိုးတွေ့ရှိသူ ၆ ဦး ရှိပြီးဖြစ်ကြောင်း သိရသည်။