သျှမ်းပြည် တောင်ပိုင်း တောင်ကြီးတွင် ကိုဗစ်-၁၉ အတည်ပြု လူနာအမှတ် (၁၂၁) တဦးထပ်မံတိုးလာကြောင်း ယနေ့ ည ၈နာရီ တွင်ကျန်းမာရေး နှင့် အားကစားဝန်ကြီးဌာန ထုတ်ပြန်ချက်အရသိရသည်။
ယနေ့ (ဧပြီ ၂၁)ရက် ပထမ သုတ်အနေဖြင့် ကိုဗစ်-၁၉ လူနာ ၂ဦးထပ်တိုးပြီး၊ တဦးမှာ တောင်ကြီးမြို့ တွင်နေထိုင်ပြီး အသက် ၂၁နှစ် အရွယ် အမျိုးသမီး ဖြစ်ကြောင်း ထုတ်ပြန်ချက်တွင်ရေးသားထားသည်။
လက်ရှိမှာ တောင်ကြီးမြို့ စဝ်စံထွန်း ဆေးရုံတွင် ဆေးကုသ ခံယူနေကြောင်း၊ ထို အမျိုးသမီးသည် ပြည်ပ နိုင်ငံဖြစ်သည့် အင်္ဂလန် မှ ပြန်လာသည့် သူဖြစ်ပြီး အသွားအလာ ကန့်သတ်ထားရှိသူဖြစ်ကြောင်း လည်း သိရသည်။
ယခု တောင်ကြီးမြို့ စဝ်စံထွန်း ဆေးရုံတွင် ကိုဗစ်-၁၉ လူနာ ၂ဦးရှိသွားပြီး ဖြစ်သဖြင့် တောင်ကြီးမြို့ ဒေသခံများသည် စိုးရိမ်ထိတ်လန့်မှု များရှိနေကြောင်း ဒေသခံများက ဆိုသည်။
သျှမ်းသံတော်ဆင့် သတင်းဌာန မှ တောင်ကြီး စဝ်စံထွန်းဆေးရုံသို့ရောက်ရှိနေသည့် ကိုဗစ် လူနာ အမှတ် (၁၂၁) နှင့် ပတ်သက်ပြီး သက်ဆိုင်ရာ ဆရာဝန် အသီးသီးကို အကြိမ်ကြိမ် ကြိုးစား ဆက်သွယ်မေးမြန်းသော်လည်း မရရှိခဲ့ပေ။
သျှမ်းပြည် တဝှမ်းတွင် ကိုဗစ်-၁၉ လူနာ ၆ ဦး ရှိပြီး စဝ်စံထွန်းဆေးရုံတွင် ကိုဗစ်-၁၉ လူနာ ၂ဦး ရှိပြီးဖြစ်ကာ သျှမ်းရှေ့ ကျိုင်းတုံ ဆေးရုံတွင် ၃ဦး နှင့် သျှမ်းမြောက် လားရှိုးတွင် ၁ဦး သို့ရှိကြောင်း ကျန်းမာရေး နှင့် အားကစား ဝန်ကြီး ဌာန ထုတ်ပြန်ထားသည်။
မြန်မာတဝှမ်းတွင် ကိုဗစ်-၁၉ လူနာ ၁၂၁ ဦးရှိလာပြီး သေဆုံးသူ ၅ဦးရှိလာကြောင်းသိရသည်။
