သျှမ်းပြည် အရှေ့ပိုင်း ခရီးစဉ် တွင် သျှမ်းပြည် ဝန်ကြီးချုပ် နှင့် အတူ လိုက်ပါသည့် သျှမ်းဝန်ကြီးများ၊ လွှတ်တော်ဥက္ကဌ နှင့် သျှမ်းပြည် ရဲမှူးချုပ် တို့သည် self quarantine လုပ်ထားရကြောင်း သျှမ်းပြည် အစိုးရ ထံမှ စုံစမ်းသိရသည်။

သျှမ်းပြည် ဝန်ကြီးချုပ် သည် ဧပြီလ ၁၇ ရက်ကစပြီး သင်္ကြန် ကာလအတွင်း သျှမ်းပြည် မြောက်ပိုင်း နှင့် သျှမ်းပြည် အရှေ့ပိုင်းသို့ သွားရောက်ကာ အစိုးရ မှ ထောက်ပံ့ပေးသည့် အခြေခံလူတန်းစား ပစ္စည်းများ လိုက်လံ ပေးဝေခြင်းနှင့် ဆေးရုံ အခြေအနေများကို သွားရောက်ကြည့်ရှုခဲ့သည်။

ထို့ကြောင့် ကျိုင်းတုံ ခရီးစဉ်တွင် လိုက်ပါသည့် လွှတ်တော်ဥက္ကဌ ယာဉ်မောင်း နှင့် သျှမ်းပြည် ရဲမှူးချုပ် ၏ ကိုယ်ရေးအရာရှိ (PSO) တို့သည် ကိုယ်အပူချိန်မြင့်မားလာကာ ထိုသူ ၂ဦးကို ကျိုင်းတုံ ပြည်သူ့ဆေးရုံတွင်ထားရှိခဲ့ရသည်။

“ သူတို့ ၂ဦးရဲ့ ဓာတ်ခွဲ နမူနာကို ယနေ့က (ဧပြီ ၂၁) ရက်က ရန်ကုန်ကို ပို့လိုက်ပါပြီ။ သူတို့၂ယောက် က ကိုဗစ်-၁၉ လူနာ အဖြစ် အတည်ပြုရင် တော့ ခရီးစဉ်မှာပါတဲ့သူအားလုံးကို ထပ်ပြီး စစ်ရမယ်” ဟု သျှမ်းပြည်နယ် အစိုးရ အတွင်းရေးမှူး ဦးစိုးစိုးဇော် က သျှမ်းသံတော်ဆင့် ကို အတည်ပြု ပြောခဲ့သည်။

ထို့နောက် သျှမ်းပြည် ဝန်ကြီးချုပ် ဒေါက်တာလင်းထွဋ် နှင့် အတူ ဝန်ကြီး ၄ ဦး နှင့် သျှမ်းပြည် လွှတ်တော် ဥက္ကဌ တို့ သျှမ်းပြည်တောင်ပိုင်း သို့ယမန်နေ့ည ပြန်ရောက်ကာ မိမိနေအိမ်တွင် self quarantine နေထိုင်ကြကြောင်း သျှမ်းပြည်နယ် အစိုးရ အတွင်းရေးမှူး ဦးစိုးစိုးဇော် က ပြောသည်။

“ အခုလောလောဆယ်က ဝန်ကြီးချုပ် အပါအဝင် ဝန်ကြီးတွေ၊ လွှတ်တော်ဥက္ကဌနဲ့ ရဲမှူးချုပ် တွေ က တော့ မိမိမှာနေအိမ် ဒါမှမဟုတ် အစိုးရရိပ်သာမှာ ကိုယ်တိုင် self quarantine အဆင့်ပဲ လုပ်ထားသေးတယ်” ဦးစိုးစိုးဇော် ကပြောသည်။

အရှေ့ပိုင်း ခရီးစဉ်လိုက်ပါသည့် ဝန်ကြီးများမှာ သျှမ်းပြည်နယ်ဝန်ကြီးချုပ် ဒေါက်တာ လင်းထွဋ်၊ စည်ပင်သာယာရေးဝန်ကြီး ဦးစိုင်းစွမ်ဆိုင်း၊ လမ်းပန်းဆက်သွယ်ရေးဝန်ကြီး ဦးခွန်ရဲထွေး၊ လူမှုရေးဝန်ကြီး ဒေါက်တာ မျိုးထွန်း ၊ ဗမာတိုင်းရင်းသားရေးရာဝန်ကြီး ဒေါက်တာ အောင်သန်းမောင် နှင့် သျှမ်းပြည်နယ် လွှတ်တော်ဥက္ကဌ လုံးစိုင်းလုံးဆိုင် သျှမ်းပြည် ရဲမှူးချုပ် တို့ ဖြစ်ကြောင်း သိရသည်။

သျှမ်းပြည် အရှေ့ပိုင်းခရီးစဉ်တွင် ကျိုင်းတုံ ၊ တာချီလိတ် ၊ မိုင်းယောင်း သို့ရောက်ရှိခဲ့ပြီး ဧပြီ ၂၀ ရက်နေ့က အစိုးရဧည့်ရိပ်သာ သို့ ပြန်လည်ရောက်ရှိလာခြင်း ဖြစ်ကြောင်း သိရသည်။