ကိုးကန့်ကိုယ်ပိုင် အုပ်ချုပ်ခွင့်ရ ချင်းရွှေဟော်နယ်စပ်မြို့ မှ တရုတ်နိုင်ငံမှ ပြည်တော်ပြန် ၂၅၀၀၀ မြန်မာနိုင်ငံတွင်းသို့ ပြန်လည်ဝင်ရောက်လာရန်ရှိကြောင်း စုံစမ်းသိရသည်။
တရုတ်နိုင်ငံတွင် သွားရောက် အလုပ်လုပ်သည့် မြန်မာရွှေ့ပြောင်းအလုပ်သမား ၂၅၀၀၀ ချင်းရွှေဟော်နယ်စပ်ဂိတ်မှတဆင့် ပြန်လည်ဝင်ရောက်လာရန်ရှိပြီး၊ ထိုသူများ ဝင်ရောက်လာ ပါက နေရာထိုင်ခင်းအတွက် အခက်အခဲရှိနိုင်ကြောင်းလည်း လောက်ကိုင်ဒေသ မှ အစိုးရ ဝန်ထမ်း များ ပြောပြချက်အရသိရသည်။
ကိုးကန့် ကိုယ်ပိုင် အုပ်ချုပ်ခွင့်ရဒေသ အတွင်းသို့ ဧပြီ ၁၃ ရက်နေ့က စတင်ကာ ယနေ့ထိ လောက်ကိုင်မြို့တွင် ပြည်တော်ပြန် ၄၅၆ ဦး ရှိပြီး၊ ချင်းရွှေဟော်မြို့ တွင် ၂၆၅ ဦး ရှိကြောင်း လောက်ကိုင်ဒေသတွင် တာဝန်ထမ်းဆောင်နေသည့် အစိုးရဝန်ထမ်းတစ်ဦး က သျှမ်းသံတော်ဆင့် သို့ ပြောသည်။
“သူတို့အတွက်က ခုလောလောဆယ်ဆယ်တော့ အဆင်ပြေပေမယ့် ထပ်တိုးလာရင် စားသောက်ဖို့က အခက်ခဲ ဖြစ်လာနိုင်တယ်။” ဟု လောက်ကိုင်ဒေသ အစိုးရဝန်ထမ်းတစ်ဦး ကပြောသည်။
တရုတ်ပြည်တော်ပြန်များ ထပ်ဝင်လာရန် ရှိပြီး၊ ထိုသူများအတွက် Quarantine (စောင့်ကြည့်)ရန် အတွက် ခက်ခဲနေကြောင်းလည်း အဆိုပါ ဝန်ထမ်းက ဆိုသည်။
လက်ရှိကိုးကန့်ကိုယ်ပိုင် အုပ်ချုပ်ခွင့်ရဒေသ သို့ ရောက်ရှိသည့် တရုတ်နိုင်ငံမှ ပြည်တော်ပြန်များကို သက်ဆိုင်ရာ မှ တနေ့လျှင် ထမင်း ၃ နပ်ကျွေး ထားပြီး၊ ကိုယ်ပူချိန် တနေ့၃ကြိမ် တိုင်းတာပေးကြောင်း သိရသည်။
ထို့ပြင် တရုတ်နိုင်ငံမှပြန်လာမည့်သူ ၂၅၀၀၀ ကို ကိုးကန့် ကိုယ်ပိုင် အုပ်ချုပ်ခွင့်ရ ဒေသတွင် Quarantine (စောင့်ကြည့်) ထားရှိသွားမည် ဟုလည်း သျှမ်းပြည် အစိုးရ အဖွဲ့ဝင် ပြောခွင့်ရ စီမံကိန်း နှင့် ဘဏ္ဍာရေး ဝန်ကြီး ဦးစိုးညွှန့်လွင် ကပြောသည်။
“ ဒီပြည်တော်ပြန်တွေက တရုတ်ဘက်က ကျန်းမာရေး စစ်ဆေးပြီးတော့ ဒီဘက်ကို ပြန်လာတာ ဖြစ်တယ်။ ကျနော်တို့ အခက်ခဲက ကျနော်တို့ဘက်ကို ဝင်လာတဲ့ ဘော်ဒါ ကွာလတင်း တစ်ခုကို လိုအပ်တယ်” ဟု ဦးစိုးညွန့်လွင် ကပြောသည်။
လက်ရှိ မြန်မာနိုင်ငံတွင် ပြည်ပမှ ပြန်ရောက်လာသည့် သူများကိုမြို့နယ် အလိုက်၊ ကျေးရွာ အလိုက် Quarantine ထားရှိသော်လည်း အစိုးရ အနေဖြင့် Quarantine အတွက် သီးသန့်ဘတ်ဂျက် လျာထားခြင်းမရှိကြောင်းလည်း စုံစမ်းသိရသည်။
ယခုနောက်ပိုင်း Quarantine ကာလကို ၂၁ ရက် သတ်မှတ်လိုက်သည့်အတွက် နေထိုင်စားသော က်ရန် အခက်အခဲများစွာ ကြုံလာနိုင်သည်ဟုလည်း သျှမ်းမြောက် ပရဟိတ သမားများ က ပြော ဆိုလိုက်သည်။
သျှမ်းပြည် အတွင်း ပြည်ပမှ ပြန်လာသည့် ပြည်တော်ပြန် Quarantine သမားများကို အလှူရှင်များ သို့မဟုတ် သက်ဆိုင်ရာ မိသားစုဝင်များက စားသောက်မှုအတွက် ကူညီထောက်ပံ့ပေးနေကြောင်း ဒေသခံပြည်သူများက ပြောပြသည်။
“ Quarantine စောင့်ကြည့်တာတော့ ကောင်းပါတယ်။ ဒါပေမယ့် သူတို့အတွက် အနေအထိုင် အစားအသောက်ကတော့ အရမ်းခက်ခဲတယ်။ အလှူရှင်လာလှူတာရှိတယ်။ ဒါမှ မဟုတ် မိသားစုတွေက လာပို့ကြတယ်” ဟု လားရှိုးမြို့ မှ ပရဟိတ နန်းအေး က ပြောသည်။
မြန်မာနိုင်ငံတွင် COVID-19ကူးစက်ခံရသည့် လူနာ (၁၁၉ ) ဦးထိမြင့်တက်လာပြီး သေဆုံးသူ ၅ဦးရှိလာကြောင်း ကျန်းမာရေး နှင့် အားကစားဝန်ကြီးဌာန ယမန်နေ့ ည ၁၁နာရီ ထုတ်ပြန်ချက် အရသိရသည်။
Leave a Comments