သျှမ်းပြည် အရှေ့ပိုင်း တာချီလိတ်ဆေးရုံတွင် တာဝန်ထမ်းဆောင်သည့် ကျန်းမာရေးဝန်ထမ်း ၂၀ကျော် တို့ သံသယလူနာ အဖြစ်သတ်မှတ်ခံရ ကြောင်း သတင်းရရှိသည်။

ယမန်နေ့ တွင် ကိုဗစ်-၁၉ လူနာ အမှတ် ၉၆ သည် ခွဲစိတ် အထူးကုဆရာဝန် တဦးဖြစ်ပြီး၊ ထိုသူသည် ကိုဗစ်-၁၉ လူနာ အမှတ် ၄၇ နှင့်ထိတွေ့ခဲ့သူဖြစ်ကြောင်း ကျန်းမာရေး နှင့် အားကစားဝန်ကြီးဌာန ထုတ်ပြန်ချက် အရသိရသည်။

“ Case 96 နဲ့ ဆက်စပ်တဲ့ သူတွေဆေးရုံမှာ အားလုံးပေါင်း ၂၁ ယောက် ရှိတယ်။ ဆရာဝန် က ၁၀ ယောက်ပါတယ်။ လောလောဆယ် ဆေးရုံမှာ ဆရာဝန် ၂ ယောက်ပဲ လွတ်တယ်။ လူနာကတော့ ဒီနေ့ ကျိုင်းတုံဆေးရုံကို ခေါ်သွားလိုက်ပြီ” ဟု သျှမ်းပြည် အစိုးရအဖွဲ့ဝင် လူမှုရေး ဝန်ကြီး ဒေါက်တာ မျိုးထွန်း က သျှမ်းသံတော်ဆင့်သို့ ပြောသည်။

လက်ရှိမှာ တာချီလိတ် ဆေးရုံ အုပ်ကြီး အပါအဝင် ကျန်းမာရေး ဝန်ထမ်း ၂၁ ဦး Quarantine ပြုလုပ်ထားသဖြင့် တာချီလိတ်ဆေးရုံ အားဖြည့်ရန် အတွက် မန္တလေး မှ သမားတော်တဦး နှင့် မေ့ဆေး အထူးကု ဆရာဝန် တဦး၊ ကျိုင်းတုံပြည်သူ့ဆေးရုံ မှ သားဖွားမီးယပ် အထူးကု တဦး လာရောက် အားဖြည့်ထားကြောင်း ဒေါက်တာမျိုးထွန်း ကဆိုသည်။

တပ်မတော် ကာကွယ်ရေး ဦးစီးချူပ်ရုံးနှင့် ညှိနှိုင်းကာ တပ်မတော်ဆေးဘက်မှ အထူးကု ဆရာဝန် ၂ဦး၊ လက်ထောက်ဆရာဝန် ၄ ဦး နှင့် သူနာပြု ၆ ဦး လာရောက် အားဖြည့်ပေးကြောင်း ဒေါက်တာမျိုးထွန်း ကဆက်လက်ပြောသည်။

“ တပ်ဘက်ကလဲ ၁၂ ယောက် ကျနော်တို့ဆီလာပြီး ကူပေးမှာပါ။ အဲ့ဒါဆိုရင် တာချီလိတ်ဆေးရုံရဲ့ function လေး တော်တော်လေး လည်ပတ်လို့ကောင်းသွားပါပြီ။ ပြည်သူတွေ စိတ်မပူတော့နဲ့ပေါ့နော်။ အဓိကကတော့ တာချီလိတ်ပြည်သူတွေမကြောက်ဖို့ ပြောချင်ပါတယ်” ဟု ဒေါက်တာမျိုးထွန်း ကထပ်လောင်းပြောသည်။

လူနာ အမှတ် ၉၆ သည် ရန်ကုန်ဆေးရုံတွင် တာဝန်ထမ်းဆောင်သည့် ခွဲစိတ်ဆရာဝန်ကြီး တဦးဖြစ်ပြီး၊ သူ၏ အမျိုးသမီးသည့် တာချီလိတ်ဆေးရုံက သားဖွားမီးယပ် ဆရာဝန်ဖြစ်ကြောင်း သိရသည်။

ထို့ကြောင့် လူနာ အမှတ် ၉၆ သည် ဧပြီ ၆ရက် တွင် မိသားစုနှင့် တွေ့ဆုံရန် နှင့် တာချီလိတ်သို့ ရောက်ရှိလာပြီး၊ ဧပြီ ၆ရက်မှ ၁၀ရက်ထိ တာချီလိတ် ဆေးရုံ အုပ်ကြီး နှင့် အထူးကု ဆရာဝန်များနှင့် အလုပ်ကိစ္စ ဆွေးနွေးခဲ့သေးကြောင်း သိရသည်။

လက်ရှိမှာ တာချီလိတ်ဆေးရုံအုပ် အပါအဝင် ကျန်းမာရေးဝန်ထမ်း၂၁ ဦးနှင့် အတူ မိသားစုဝင်များကို Quarantine ပြုလုပ်ထားပြီး နှားခေါင်းတို့ဖတ်နှင့် အာခေါင် တို့ဖတ်တို့ကို ရန်ကုန် အမျိုးသား ကျန်းမာရေး ဓာတ်ခွဲခန်းဌာနသို့ ပေးပို့စစ်ဆေးရန် အတွက် စီစဉ်ထားပြီးဖြစ်ကြောင်း သိရသည်။

ဆက်လက်ပြီး ဧပြီ ၆ ရက်နေ့မှ ရန်ကုန် မှ တာချီလိတ်သို့ UB -275 လေယာဉ်ဖြင့် တာချီလိတ်သို့ ရောက်ရှိလာခဲ့ခြင်းဖြစ်ပြီး လေယာဉ်ပေါ်တွင် အနီးကပ် ပါလာခဲ့သည့် ခရီးသည် ၁၁ဦးကိုလည်း သံသယ စောင့်ကြည့်လူနာအဖြစ် သတ်မှတ်ကာ ဓာတ်ခွဲ နမူနာကို ပေးပို့ စစ်ဆေးရန် အတွက် စီစဉ် ထားကြောင်း သိရသည်။

လူနာ အမှတ် ၉၆ သည် ရန်ကုန်မြို့ရှိနေစဉ် လူနာအမှတ် ၄၇ နှင့် ၃ ရက် တိုင်တိုင် တစ်နေ့လျှင် ၂ နာရီခန့် အနီးကပ် ထိတွေ့မှု ရှိခဲ့သည်။

မြန်မာနိုင်ငံတွင် ကိုဗစ်-၁၉ လူနာ ၁၀၈ဦးရှိလာပြီး၊ သေဆုံးသူ ၅ဦးရှိကြောင်းသိရသည်။