သျှမ်ပြည် မြောက်ပိုင်း နမ့်လန်မြို့ တွင် Mask (နှာခေါင်းစည်း) မတပ်ဆင်ပါက ပြစ်ဒဏ်ပေးမှုများပြုလုပ်နေကြောင်း သတင်းရရှိသည်။

နမ့်လန်မြို့ထဲသို့ဝင်ရောက်လာသည့် ပြည်သူများ Maske တပ်ဆင်ခြင်းမရှိပါက ထိုင်၊ထ အခါ ၃၀ ပြုလုပ်ရခြင်း (သို့မဟုတ်)ငွေဒဏ် တယောက် ၁သောင်း ပေးဆောင် ရကြောင်း နမ့်လန် ဒေသခံများ ပြောပြချက် အရသိရသည်။

“ နမ့်လန်မြို့ အဝင်မှာ ဌာန ဆိုင်ရာတွေစောင့်တယ်။ Mask မတပ်ရင် ထိုင်၊ထ အခါ ၃၀ လုပ်ရတယ်။ မလုပ်ချင်ရင် ငွေဒဏ် ၁သောင်းပေးရတယ်။ ပြီးတော့ Mask ဝေပေးတယ်” ဟု နမ့်လန် ဒေသခံ တဦး ဖြစ်သည့် ကိုနိုင် က သျှမ်းသံတော်ဆင့် သို့ ပြောသည်။

ထိုကဲ့သို့ပြုလုပ်ခြင်းသည် COVID-19ကို ကာကွယ် ထိန်းချုပ်ရန် နှင့် လူတိုင်း Mask တပ်ဆင်ပြီး အပြင်ထွက်စေချင်သည့် အတွက် ပညာပေးခြင်းဖြစ်ကြောင်း လည်း ကိုနိုင်က ဆိုသည်။

Mask မတပ်သည်သူများကို ပြစ်ဒဏ်ပေးခြင်းသည် ဧပြီ ၁၅ရက် မှစတင်ကာ ပြစ်ဒဏ်ပေးသည့် စနစ်ကို လုပ်ဆောင်လာခဲ့ပြီး၊ စတင်လုပ်ဆောင်သည့် ရက်တွင် Mask တပ်ဆင်သည့် မရှိသလောက်နည်းပါးကြောင်း နမ့်လန်မြို့ ဖြူစင် နှလုံးသား လူမှုကူညီရေး အသင်းမှ ကိုရန်နိုင်စိုး က သျှမ်းသံတော်ဆင့် သို့ပြောသည်။

ထိုပြစ်ဒဏ်ပေးသည့် စနစ်ကို နမ့်လန်မြို့ မှ သက်ဆိုင်ရာ ဌာန အဖွဲ့များ ဦးစီးပြီး ပြုလုပ်ခြင်းဖြစ်ကြောင်း သိရသည်။

“ စလုပ်တဲ့ ရက်က တော်တော်များများ မတပ်ကြဘူး။ အခုနောက်ပိုင်းတော့ တပ်လာကြတယ်။ ဒီနည်းက အောင်မြင်တယ်လို့ပြောလို့ရပါတယ်” ဟု ကိုရန်နိုင်စိုးက ဆိုသည်။

တချို့ ပြည်သူများက ထိုင်၊ထ အခါ ၃၀ ကို မပြုလုပ်ဘဲ ငွေဒဏ် ၁ယောက် တသောင်းကျပ်ပေးဆောင်ခဲ့ကြောင်း၊ ယနေ့ အချိန်ထိ ငွေ ကျပ် ၂သိန်း ကျော် ရရှိကာ ရလာသည့် ငွေများကို Mask များထပ်မှာယူကြောင်းလည်း ကိုရန်နိုင်စိုး က ပြောပြသည်။

“ Mask ကတော့ ကျနော်တို့လက်ထဲ မှာ ပြတ် သလောက် ရှိသွားပြီ၊ ရလာတဲ့ ငွေနဲ့ Mask တွေ ထပ်မှာရတယ်။ ငွေတွေ ဒီထဲပဲ ပြန်သုံးပါတယ်” ဟု ကိုရန်နိုင်စိုးက ထပ်လောင်းပြောသည်။

လက်ရှိ အချိန်ထိ ထို ပြစ်ဒဏ်ပေးမှုကို ဆက်လက်ပြုလုပ်နေသေးကြောင်း သိရသည်။

ပြစ်ဒဏ် အများစု ပေးခံရသူများသည် ကျေးရွာတွင်နေထိုင်သူများဖြစ်ပြီး၊ COVID-19 နှင့် ပတ်သက်ပြီး အသိပညာ မသိသေးသူများဖြစ်ကြောင်း၊ လက်ရှိမှာ COVID-19 ပညာပေးမှုကို များစွာ ဆက်လက် ပြုလုပ်ရန် လိုအပ်ကြောင်းလည်း နမ့်လန်ပြည်သူများက ပြောဆိုလိုက်သည်။

Mask မတပ်ဆင်ပါက ပြစ်ဒဏ်ပေးမှုသည် အဓိက မဟုတ်ကြောင်း၊ လက်ရှိမှာ မြန်မာနိုင်ငံ တဝှမ်း Mask ဝယ်ရခက်ပြီး ၊ Mask ဈေးနှုန်းကိုလည်း အဆမတန် မြင့်တက်ရောင်းချနေကြောင်း နမ့်လန်မြို့ ခံ တဦးဖြစ်သည့် နန်းအေး က ပြောသည်။

“ အခု Mask တပ်ဖို့ ပြောပေမယ့် Mask ဝယ်ဖို့ ကခက်နေတယ်။ဆေးဆိုင်တွေတောင် ဝယ်မရတာ။ ကျေးရွာကလူတွေဆို ပိုဆိုးတာပေါ့” ဟု နန်းအေး က ဆိုသည်။

သက်ဆိုင်ရာ များအနေဖြင့် ပြည်သူများကို Mask တပ်ဆင်သည့် ကိစ္စတွင် အသိပညာပေးမှုကို လက်ခံသော်လည်း ပြည်သူများ Mask ဝယ်ယူလွယ်ကူအောင် နည်းလမ်းရှာဖွေပေးရမည်ဖြစ်ကြောင်း၊ ထို့ပြင် လူတိုင်းလက်လှမ်းမီသည့် ဈေးနှုန်းဖြင့် ရောင်းချပေးရန်လည်း နမ့်လန် ပြည်သူများက တောင်းဆိုလိုက်သည်။

မြန်မာနိုင်ငံတွင် ကိုဗစ်-၁၉ ကူးစက်ရောဂါကြောင့် သေဆုံးသူ ၅ဦးရှိလာပြီး ကူးစက်ခံရသူ ၉၄ဦးထိ မြင့်တက်လာကြောင်း ယနေ့မနက် ၁၀နာရီတွင် ကျန်းမာရေး နှင့် အားကစားဝန်ကြီးဌာနက ထုတ်ပြန်ကြေညာခဲ့သည်။