သျှမ်းပြည် မြောက်ပိုင်း မူဆယ်လာမည့် ခရီးသည်များကို ဧပြီ ၁၈ ရက်မှ စတင်ကာ မိုင်းယု (၁၀၅)မိုင်တွင် ၂၁ရက် စောင့်ကြည့်ပြီး မှ မူဆယ်မြို့ထဲသို့ဝင်ခွင့်ပြုမည် ဟု မူဆယ်မြို့နယ် စီမံခန့်ခွဲမှု ကော်မတီ ထုတ်ပြန်ချက် အရ သိရသည်။
ထို ၂၁ရက် အတွင်း စောင့်ကြည့်ခံရသူများ သည် တရက်လျှင် ၅ ထောင်ကျပ်နှုန်းဖြင့် မိမိစရိတ်ဖြင့် နေထိုင်ရမည်ဖြစ်ကြောင်း ထုတ်ပြန်ချက်တွင် ရေးသားထားသည်။
“မူဆယ်ဒေသခံ မဟုတ်တဲ့သူတွေ မူဆယ်လာရင် ၂၁ ရက် Quarantine အဖြစ်နေရမယ်။ ၂၁ရက်အတွက် စားစရိတ်ကတော့ တယောက် ကို တရက် ၅ထောင် ကျပ်ပေးရမယ်။ အစိုးရ အနေနဲ့ Quarantine အတွက် ဘတ်ဂျက်မချထားပေးဘူး။ အလှူရှင်ရှိရင်တော့ အလှူရှင်ကျွေးပါမယ်” ဟု မူဆယ် မြို့အမှတ်(၁) ပြည်နယ် လွှတ်တော် ကိုယ်စားလှယ် စိုင်းကျော်သိန်း က သျှမ်းသံတော်ဆင့် သို့ ပြောသည်။
အဆိုပါ quarantine ထားမည့်နေရာများမှာ မိုင်းယု (၁၀၅)မိုင် အတွင်းရှိ ဘုန်းကြီးကျောင်း ၂ကျောင်းနှင့် အထက်တန်းကျောင်း တကျောင်းတွင် တို့တွင်ပြင်ဆင်ထားကြောင်း စိုင်းကျော်သိန်း က ပြောသည်။
“ တခြားဒေသကလူတွေအနေနဲ့ကတော့ ၂၁ ရက် ဝင်ကို ဝင်ရမယ်။ ဒါပေမယ့် မူဆယ်ဒေသခံတွေ အနေနဲ့ ကိုဗစ် ဖြစ်တဲ့နေရာကလာရင်တော့ ၁၀၅ မိုင်မှာ ၂၁ ရက် စောင့်ကြည့်သွားမယ်” ဟု စိုင်းကျော်သိန်း က ထပ်လောင်းပြောသည်။
မူဆယ်မြို့သို့ လာရောက်သည့်သူများအနေဖြင့် ကော်မတီမှစီစဉ်ဆောင်ရွက်ပေးသည့် Quarantine များတွင် နေထိုင်လိုခြင်းမရှိပါက တည်းခိုခန်း၊ ဟိုတယ် များတွင် မိမိအစီအစဉ်ဖြင့် Quarantine ၀င်ရန် ဆောင်ရွက်ပေးသွားမည် ဖြစ်ကြောင်း ထုတ်ပြန်ချက်တွင်ရေးသားထားသည်။
Quaratine မ၀င်လိုပါက မိမိလာရာလမ်းအတိုင်း လှည့်ပြန်ရမည် ဟု လည်း ဖော်ပြထားသည်။
နှစ်နိုင်ငံ ကုန်သွယ်မှု မပြတ်တောက်စေရေးအတွက် ကုန်တင်ကားမောင်းသူနှင့် ယာဉ်နောက်လိုက် ၂ဦးသာ ခွင့်ပြုပေးသွားမည်ဖြစ်ပြီး သတ်မှတ်ထားသည့်နေရာတွင်သာ နေထိုင်ရမည် ဟုလည်း သိရသည်။
မြန်မာပြည်တွင် ကိုဗစ် -၁၉ လူနာ စတင်တွေ့ရှိပြီး နောက် မြန်မာ -တရုတ်နယ်စပ် ဂိတ်များအားလုံး ဧပြီ ၁ရက်မှ စတင်ကာ ပိတ်လိုက်ကြောင်းသိရသည်။
“ တရုတ်ကလည်း အဝင်၊အထွက်ပိတ်ထားတယ်။အလုပ်သမားတွေအနေနဲ့ ကတော့ ဒီချိန် မလာသေးဖို့ ပြောချင်တယ်။ မဟုတ်ရင် ၁၀၅မိုင်မှာ ၂၁ရက်စောင့်ကြည့်ခံရမယ်။ မိမိနေရပ်သာ နေဖို့ ပြောချင်တယ်” ဟု မူဆယ် ဒေသခံ စိုင်းမြတ် က ပြောသည်။
လက်ရှိအချိန်မှာ မြန်မာ-တရုတ်နယ်စပ် အဝင်အထွက် ဂိတ်များပိတ်ထားသော်လည်း နယ်စပ်ကုန်သွယ်ရေး စီးဆင်းရန် အတွက် ကုန်ကားများ ဝင်၊ထွက်ခွင့်ပေးထားကြောင်းသိရသည်။
သို့သော် တရုတ်နိုင်ငံကို မှီတင်းပြီး တပိုင်တနိုင် လုပ်ကိုင် စားသောက်နေသည့် မူဆယ် ဒေသခံများ အတွက် စီးပွားရေး ရိုက်ခတ်မှု ရှိကြောင်းသိရသည်။
