သျှမ်းပြည် အရှေ့ပိုင်း မိုင်းဖြတ်ဒေသခံ တဦး COVID-19 လူနာ အမှတ် (၆၄) အဖြစ် တွေ့ရှိကြောင်း ယနေ့ မနက် ၁၀ နာရီခွဲ ကျန်းမာရေး နှင့် အားကစားဝန်ကြီးဌာန ထုတ်ပြန်ချက် အရ သိရသည်။
အဆိုပါ လူနာ အမှတ်(၆၄)သည် အသက် ၂၃နှစ် အရွယ် သာရှိပြီး ရန်ကုန်မြို့ မှ ဘာသာရေး ပွဲတခုတက်လာသည့် သူ ဖြစ်ကြောင်း ၊ ၎င်းနှင့်အတူ ပွဲတက်သည့် သူများကိုမူ ဧပြီ ၁၁ ရက်တွင် ကိုဗစ် ၁၉ လူနာအဖြစ် ထုတ်ပြန်ခဲ့ပြီဖြစ်ကြောင်း သိရသည်။
ဧပြီ ၁၂ ရက်တွင် အသက် ၂၃ အရွယ်အဆိုပါလူနာ အမှတ် (၆၄) ကို သက်ဆိုင်ရာ က လိုက်လံစုံစမ်းပြီး ဓာတ်ခွဲခန်းသို့ တို့ပတ်ပို့ စစ်ဆေးခဲ့ရာ ဧပြီလ ၁၅ ရက် ယနေ့မနက် ၁၀ နာရီခွဲအချိန် ကိုဗစ် ၁၉ ပိုးကူးစက်ခံရကြောင်း အတည်ပြုခဲ့သည်။
ရန်ကုန်မှ တဆင့် ကျိုင်းတုံ လေဆိပ်၊ ထိုမှဆင့် မိုင်းဖြတ်သို့ ပြန်လာချိန် ထိတွေ့သည့် မိသားစုဝင်(၃)ဦးနှင့် ကားအတူစီးသည့် သူ ၃ဦး ကိုမူ ကိုဗစ် ၁၉ ပိုးမတွေ့ရှိကြောင်း ဓာတ်ခွဲခန်း အဖြေအရ သိရသည်။
လူနာ အမှတ် (၆၄)နှင့် အတူ ရန်ကုန်မှ ကျိုင်းတုံသို့ လေယာဉ် တစီးတည်း အတူ စီးလာသည့် သူ( ၂၅) ဦးကိုလည်း ဧပြီ ၁၂ရက်နေ့ကတည်းက အသွားအလာကန့်သတ်စောင့်ကြည့်ထားကြောင်းသိရသည်။
လက်ရှိ လူနာ အမှတ်(၆၄)သည် ကျိုင်းတုံမြို့ ရှိ ပြည်သူ့ဆေးရုံတွင် ဆေးကုသခံယူနေပြီဖြစ်ကြောင်းသိရသည်။
မိုင်းဖြတ်ဒေသခံ အမျိုးသား တဦး ကိုဗစ် ၁၉ လူနာ အဖြစ် သတ်မှတ်လိုက်ပြီးနောက်ပိုင်း မိုင်းဖြတ်မြို့ အတွင်းရှိ ဈေးများ၊ ဈေးဆိုင်များ အားလုံးနီးပါး ပိတ်ထားကြောင်း၊ ဒေသခံများလည်း အပြင်ထွက်ခြင်းမရှိတော့ကြောင်း မိုင်းဖြတ်ဒေသခံများ ပြောကြသည်။
“ သတင်း စကြားကတည်းက ဧပြီ ၁၂ရက်လောက်က ဒီကဆိုင်တွေပိတ်ကြတယ်။ အိမ်ထဲ ကနေ အိမ်ပြင် သိပ်မထွက်တော့ဘူး။ ဈေးတွေလည်း ပိတ်လိုက်တယ်” ဟု မိုင်းဖြတ်ဒေသခံ စိုင်းတစ်က ပြောသည်။
ကိုဗစ် ၁၉ လူနာ ရှိပြီးနောက် မိုင်းဖြတ်မြို့ သည် တိတ်ဆိတ်နေကြောင်း၊ ယမန်နေ့ (ဧပြီ ၁၄)ရက်တွင်လည်း သက်ဆိုင်ရာမှ မိုင်းဖြတ်မြို့ မ ဈေးကို ပိုးသတ်ဆေးများလိုက်လံဖြန်းကြောင်း စိုင်းတစ်က ပြောသည်။
“ မနေ့ကတော့ ဈေးတွေ မှာ ပိုးသတ်ဆေးဖြန်းတယ်။ နေရာတော်တော်များများ ဆေးဖြန်းကြတယ်။ အားလုံးကတော့ စိုးရိမ်နေကြတယ်” ဟု လည်း စိုင်းတစ်က ထပ်လောင်းပြောသည်။
မြန်မာနိုင်ငံတဝှမ်းတွင် ကိုဗစ် ၁၉ ကူးစက်ခံရသူ ၇၄ဦးရှိလာပြီး သျှမ်းပြည်တွင် ၃ဦးရှိပြီ ဖြစ်ကြောင်း၊ ကိုဗစ် ၁၉ ကြောင့် သေဆုံးသူ ၄ဦးရှိပြီ ဖြစ်ကြောင်း သိရသည်။
