သျှမ်းပြည်တောင်ပိုင်း တောင်ကြီးမြို့ ဂေါက်ကွင်းအဝင်ပေါက်တွင် အမျိုးသားတဦး သေဆုံးနေကြောင်း သိရသည်။
အဆိုပါ သေဆုံးသူ၏ ရုပ်အလောင်းကို ဂေါက်ကွင်းအဝင်ပေါက် အနီး မိုင်တိုင် ၁၁၆/၆ ဘေးမြောင်းထဲတွင် ယနေ့ မနက် ဧပြီ ၁၄ ရက်တွင် တွေ့ရှိကြောင်း တောင်ကြီးမြို့ မ ရဲစခန်းမှ ရဲအရာရှိ တဦး က သျှမ်းသံတော်ဆင့် သို့ပြောသည်။
“ သေဆုံးသူက သက်လတ်ပိုင်း အရွယ်ပါ။ ဘာကြောင့် သေလဲဆိုတာတော့ အတည်ပြုလို့ မရသေးဘူး။ ခု သေဆုံးမှုက ပြင်ပဒဏ်ရာ မရှိဘူး” ၎င်း ရဲအရာရှိ က ဆိုသည်။
သေဆုံးသူ အလောင်းသည် ရင်ခွဲရုံတွင် စစ်ဆေးသွားမည်ဖြစ်ပြီး ပြင်ပဒဏ်ရာ မရှိလျှင် သေမှုသေခင်း နှင့် ဓမ္မတာ သေဆုံးမှု ဖြင့် ဆောင်ရွက်သွားမည်ဖြစ်ကြောင်း ရဲအရာရှိ က ထပ်လောင်းပြောသည်။
ထို အမျိုးသား သေဆုံးသည့်နေရာကို တောင်ကြီး ပရဟိတ အဖွဲ့မှ ပိုးသတ်ဆေးများ ချက်ချင်း သွားရောက်ဖြန်းပေးခဲ့ကြောင်း သိရသည်။
“ လူတယောက် ဂေါက်ကွင်းအဝင်ပေါက်ရဲ့ မြောင်းထဲမှာ သေနေတာကြားတော့ ကျနော်တို့ အဖွဲ့ ချက်ချင်း ဆေးသွားဖြန်းပေးလိုက်တယ်။ ဘာကြောင့် သေလည်းတော့မသိဘူး” ဟု ဆေးသွားဖြန်းသည့် ကိုဝင်းနိုင်စိုးက ပြောသည်။
လက်ရှိအချိန်တွင် COVID-19 ဖြစ်ပွားမှု များနေသည့် အချိန်ဖြစ်သည့်အတွက် ထိုသေဆုံးသူသည် မည်သည့် ရောဂါဖြင့် သေဆုံးသွားသည် ကို တောင်ကြီးဒေသခံများ မေးခွန်းထုတ်နေကြသည်။
“ သေဆုံးသူက ဘယ်ကဆိုတာ မသိဘူး။ အိမ်ခြေမဲ့ လူလည်းဖြစ်နိုင်တယ်။ အခုက ကိုဗစ်တွေ ဖြစ်နေတော့ သူဘာလို့သေလဲဆိုတာ သိချင်တယ်” ဟု တောင်ကြီး ဒေသခံ အမျိုးသားတဦးက ပြောသည်။
သျှမ်းပြည် တောင်ပိုင်း တောင်ကြီးမြို့ စဝ်စံထွန်း ဆေးရုံတွင် COVID-19 အတည်ပြု လူနာ အမျိုးသားတဦး ဆေးကုသခံယူနေသည် ဟု သတင်း ထုတ်ပြန်လိုက်ပြီးနောက် တောင်ကြီးမြို့တမြို့ လုံး တိတ်ဆိတ်ကာ ဈေးဆိုင်များ ပိတ်ထားကြကြောင်း သိရသည်။
Leave a Comments