တရုတ်ပြည် ထဲတွင် နေထိုင်သည့် တရားဝင် မြန်မာရွှေ့ပြောင်းအလုပ်သမားများကို တရုတ်အာဏာပိုင်းများက ဖမ်းဆီးကာ ရိုက်နှိက်မှု ပြုလုပ်ခဲ့သည် ဟု သတင်း ရရှိသည်။

တရုတ်ပြည်ထဲအလုပ်လုပ်သည့် တရားဝင် မြန်မာအလုပ်သမား ၂၆ဦးကို တရုတ်ရဲများက ဖမ်းဆီးခြင်း၊ စာအုပ်များသိမ်းယူခြင်းတို့ပြုလုပ်ပြီး အချုပ်ခန်းထဲတွင် ယာယီထားကာ အစာမကျွေးခဲ့ကြောင်း ပြန်လာသည့် အလုပ်သမားများပြောပြချက် အရသိရသည်။

ထို မြန်မာ အလုပ်သမား ၂၆ဦးကို တရုတ်အာဏာပိုင်းများက တရားဝင် လွှဲပြောင်းမှု မရှိဘဲ မြန်မာပြည် မူဆယ်မြို့ ကူးတို့ဆိပ် သို့လာရောက် ချထားပေးကြောင်း အလုပ်သမားများကို သွားရောက်ခေါ်သည့် ဂရုဏာလူမှုကူညီရေးအသင်းမှဦးသောင်းထွန်း က သျှမ်းသံတော်ဆင့် သို့ ပြောသည်။

“ ၂၆ဦး က ရွှေလီ၊ ကျယ်ဂေါင်မှာ စာအုပ်အနီကိုင်ပြီး အလုပ်လုပ်တဲ့သူတွေပါ။ အဲ့ထဲမှာ ကိုယ်ဝန်သည်အမျိုးသမီးတွေပါတယ်။ တရုတ်ရဲတွေက သူတို့ကို ရိုက်တယ်။ ခြေထောက်နဲ့ကန်တယ်လို့ပြောပါတယ်” ဦးသောင်းထွန်းက ဆိုသည်။

ထို မြန်မာရွှေ့ပြောင်းအလုပ်သမား ၂၆ဦးသည် မြန်မာပြည်သို့ မလွှဲပေးခင် တရုတ်ပြည် ကျယ်ဂေါင် ၏ ရဲစခန်းအချုပ်တွင် တချို့ တပတ်၊တ ချို့ မှာ ၃ရက် နှင့် တချို့ မှာ ၁ရက် နေခဲ့ရသေးကြောင်း ဦးသောင်းထွန်းက ပြန်ပြောပြသည်။

“ သူတို့တရုတ် အချုပ်ထဲမှာ နေရတုန်းက အစာတွေမကျွေးဘူး။ တရုတ် မရွေးပဲ ကျွေးတယ်။ နောက် ရိုက်တာတော့ လွန်တယ်။ကိုယ်ဝန်သည်လည်းရိုက်ခံရတယ်။ ရိုက်တာတော့မကောင်းဘူး” ဟု ဦးသောင်းထွန်း က ထပ်လောင်းပြောသည်။

ထို့အပြင်တရားဝင် နိုင်ငံကူးလက်မှတ်ကိုင်ဆောင်ပြီး တရုတ်ပြည် အတွင်းသို့နေထိုင်ကာ ယခုကဲ့သို့ပြုလုပ်ခြင်းသည် မကောင်းကြောင်း နှင့် တရားဝင် ဂိတ်မှ မပို့ဆောင်ပဲ ကူးတို့ဆိပ်မှ ပို့ဆောင်ပေးခြင်းသည်လည်း မသင့်လျော်ကြောင်း ဦးသောင်းထွန်းက ပြောသည်။

အဆိုပါ ရွှေ့ပြောင်းအလုပ်သမား ၂၆ ဦးသည် COVID-19 ကင်းစင်သည့် တရုတ်ပြည် ရွှေလီ နှင့် ကျယ်ဂေါင်မှ လာသည့်အတွက် Home Quarantine မထားဘဲ နေရပ်လိပ်စာများကောက်ခံကာ ပြန်လွှတ်လိုက်ကြောင်း သိရသည်။

လက်ရှိ မြန်မာနိုင်ငံတွင် COVID-19 ကူးစက်ခံနေရမှုကြောင့် မြန်မာ-တရုတ်နယ်စပ်ဂိတ်များ ကို တရုတ်ပြည်မှ တဖက်သတ် ပိတ်ချလိုက်ပြီး မြန်မာပြည်သူများကို ဝင်ရောက်ခွင့် ကို ဧပြီ ၁ရက် မှစတင်ပိတ်လိုက်သည်။

“ မြန်မာပြည်မှာ COVID-19လူနာတွေရှိပြီးနောက်မှာ တရုတ်က ပိတ်လိုက်တာ။ တရုတ်ပြည်မှာ နေတဲ့သူတွေကိုလည်း မြန်မာပြည်ပြန်ခိုင်းတဲ့သဘောပဲ။ တရုတ်တွေ တကယ်လုပ်ရက်တယ်” ဟု မူဆယ် ဒေသခံ စိုင်းစိုင်း က ပြောသည်။

COVID-19သည် တရုတ်နိုင်ငံ ဝူဟန်ပြည်နယ် မှ စတင်ကာ ဖြစ်ပွားခဲ့သော်လည်း ထိုအချိန်တွင် မြန်မာ-တရုတ် နယ်စပ် ဂိတ် ပိတ်ဆိုင်းခြင်းမပြုလုပ်ဘဲ မြန်မာဘက်မှ COVID-19 ရှိလာပြီးနောက် ယခုကဲ့သို့ ပြုလုပ်ခြင်းသည်အလွန်ရုပ်ဆိုးကြောင်း လည်း စိုင်းစိုင်း ကပြောသည်။

“ အခု သူတို့ ကူတို့ဆိပ်ကနေ ပို့လိုက်တာ က ကျနော်တို့ မြန်မာလူမျိုးကို လုပ်ချင်တာ လုပ်တဲ့ပုံစံပဲ။ အရေးမလုပ်တဲ့သဘော။ သူတို့ လူမျိုုးကို လုပ်ရင်ရော လက်ခံနိုင်လား” ဟု စိုင်းစိုင်း က ထပ်လောင်း ပြောသည်။

မြန်မာရွှေ့ပြောင်း အလုပ်သမားများကို ပို့ဆောင်မည်ဆိုပါက လုပ်ထုံးလုပ်နည်း အရ နှစ်ဖက် သက်ဆိုင်ရာ ကို လွှဲပြောင်းရမည်ဖြစ်သည်။

ထို့ပြင်လက်ရှိ နှစ်နိုင်ငံ ကုန်သွယ်မှု မရပ်ဆိုင်းရန် အတွက် ကုန်တင်ကားများကို ဝင်ခွင့်ပြုသော်လည်း မြန်မာပြည်မှ လာသည့် ကားသမား၊ ယာဉ်နောက်လိုက်များကိုပေးမဝင်ကြောင်း သိရသည်။

“ အခု ကုန်ကားတွေဆိုရင် ကားပဲပေးဝင်တာ။ ယာဉ်မောင်းနဲ့ယာဉ်နောက်လိုက်ကို ပေးမဝင်ဘူး။ တရုတ်ဘက်က ကားလာမောင်းသွားပေးတယ်” ဟုလည်း မူဆယ် ဒေသခံ ကားသမား တဦးက ပြောသည်။

လက်ရှိမှာ မြန်မာ-တရုတ်နယ်စပ် ဂိတ်များ ရက်အကန့်အသတ်မရှိ ပိတ်လိုက်ခြင်းကြောင့် စီးပွားရေး မြို့ဖြစ်သည့် မူဆယ်မြို့သည် တိတ်ဆိတ်နေကြောင်း သိရသည်။