သျှမ်းပြည်မြောက်ပိုင်း မူဆယ်မြို့တွင် ယမန်နေ့ ည ၁၀နာရီ ခွဲကျော်တွင် ဗုံး ၂လုံး ပေါက်ကွဲမှုကြောင်း မူဆယ်ဒေသခံများ စိုးရိမ်ထိတ်လန့်မှု ဖြစ်နေကြောင်း သတင်းရရှိသည်။
ဧပြီ ၁၂ရက် ည ၁၀နာရီခွဲကျော် တွင် မူဆယ်မြို့ ဆက်သွယ်ရေးရုံးရှိ MPT ရှေ့ တွင် လက်လုပ်မိုင်း ၂လုံး ပေါက်ကွဲမှု ဖြစ်ပွားကာ MPT ဆိုင် ခန်း နှင့် ကားတစီ ပျက်စီးမှု ဖြစ်ပွားခဲ့ကြောင်း မူဆယ်မြို့ ဂရုဏာ လူမှု ကူညီရေးအသင်းမှ ဦးသောင်းထွန်းက သျှမ်းသံတော်ဆင့် သို့ပြောသည်။
“ လူထိခိုက်မှုတော့မရှိဘူး။ ဆိုင်နဲ့ ကားတစီးတော့ပျက်စီးတယ်။ ဗုံးပေါက်ပြီဆိုကတည်းကတော့ စိုးရိမ်မှုကတော့ ရှိပါတယ်” ဦးသောင်းထွန်း ကဆိုသည်။
အသက် ၁၄နှစ် အရွယ် အမျိုးသား ၂ဦး ဆိုင်ကယ်ဖြင့် လာပြီး ဆိုင်ရှေ့တွင် လာရောက်ချသွားကြောင်း၊ ထို သူ၂ဦး ကို လက်ရှိ အချိန်ထိ ရှာဖွေတွေ့မှု မရှိသေးကြောင်း သိရသည်။
“ ကျနော်ကြားရသလောက်တော့ အသက် ၁၄နှစ် ယောင်္ကျားလေး ၂ယောက် ဆိုင်ကယ်နဲ့ လာချသွားတယ်လို့ ပြောတယ်။ သေချာတော့မသိရသေးဘူး” ဟု ဦးသောင်းထွန်း ဆိုသည်။
ယခုရက်ပိုင်း မြန်မာတဝှမ်း COVID-19 ကို စိုးရိမ်နေရသည့် ကာလ ဖြစ်သည့်အ ချိန်ဖြစ်သည်။
“ တဖက်က လည်း COVID-19ကို ကြောက်ရ။ တဖက်ကလည်း မလုံခြုံကို စိုးရိမ်နေရတယ်” ဟု မူဆယ်ဒေသခံ စိုင်းခင် က ပြောသည်။
ယမန်နေ့ တွင် ပေါက်ကွဲသည့် ဗုံးသည် အသံ အလွန်ကျယ်ကာ မူဆယ်မြို့ လယ်ထဲ ကြားရကြောင်း၊ တချို့ အိမ်များ တုန်ခါမှု ဖြစ်သွားကြောင်းလည်း စိုင်းခင်က ဆိုသည်။
“ အခု မူဆယ်မြို့ က စီးပွားရေး လည်း မရ။ တိတ်ဆိတ်နေတာ။ အရာရာကို စိုးရိမ်နေရတဲ့ ခေတ်ကာလ ကို ရောက်မှာလားမသိဘူး” ဟုလည်း စိုင်းခင်က ထပ်လောင်းပြောသည်။
အဆိုပါ ကိစ္စနှင့် ပတ်သက်ပြီး မူဆယ်မြို့ရဲစခန်း ကို သျှမ်းသံတော်ဆင့် က ဖုန်းဆက်သော်လည်း ပြန်လည် ဖြေကြားခြင်းမရှိပေ။
