COVID-19 သံသယ လူနာများ ၏ ရောဂါပိုး စစ်ဆေးရန် နိုင်ငံတော်အစိုးရက တဦး တသိန်းခွဲ ဝန်းကျင် ဘတ်ဂျက် ချထားပေးကြောင်း စုံစမ်းသိရသည်။
သျှမ်းပြည် မှ COVID–19 သံသယလူနာ များ၏ ရောဂါပိုး ရန်ကုန်မြို့အမျိုးသား ကျန်းမာရေး ဓာတ်ခွဲခန်းသို့ပို့ ဆောင်စစ်ဆေးရန် တဦးလျှင်ကျပ်တသိန်းခွဲချထားပေးကြောင်း ပြည်နယ်အထူးရောဂါ နှိမ်နင်းရေးဌာန လက်ထောက်ညွှန်ကြားရေးမှူး ဒေါက်တာနှင်းအိဖြူ က သျှမ်းသံတော်ဆင့်သို့ပြောသည်။
“သျှမ်း ၃ သျှမ်း မှာတော့ ပို့ရတာခြင်းမတူဘူး။ သျှမ်းအရှေ့ဆိုရင် လေယာဉ် နဲ့ ပို့ရတယ်။ သျှမ်းမြောက်ဆိုရင် လမ်းကြောင်း တစ်မျိုး၊ သျှမ်းတောင်အတွက်ဆိုရင် လူနာ တစ်ယောက် တစ်သိန်းခွဲ ဝန်းကျင် နဲ့ ချထားပေးတယ်” ဟု ဒေါက်တာနှင်းအိဖြူ က ဆိုသည်။
သို့သော် သျှမ်းပြည် တောင်ပိုင်း မိုင်းရှူး၊ မိုင်းကိုင် ဘက်မှ လာသည့် COVID-19 သံသယ လူနာ တဦးလျှင် ကျပ် တသိန်းခွဲ ၂သိန်း ဝန်းကျင် ရှိကြောင်း ဒေါက်တာ နှင်းအိဖြူ က ဖြည့်စွက်ပြောသည်။
ယခင် နိုင်ငံတော်အစိုးရမှ ရန်ပုံငွေ မချပေးသည့် အချိန်တွင် သက်ဆိုင်ရာ မြို့နယ် ဆရာဝန်ကြီးတွေက တာဝန်ယူပြီး ပို့ပေးခဲ့ရကြောင်း၊ ဓာတ်ခွဲ နမူနာ ပို့ရန် အတွက်လည်း ကျန်းမာရေး ဝန်ထမ်းများကိုယ်တိုင် ပို့ရကြောင်း ဒေါက်တာနှင်းအိဖြူ က ပြောသည်။
“အစ ကတော့ ဆရာမ တို့မှာ ရန်ပုံငွေ မရှိတဲ့ခါကျတော့ သက်ဆိုင်ရာ မြို့နယ် ဆရာဝန်ကြီးတွေကပဲ တာဝန်ယူပြီးတော့ ပို့ပေးနေရတယ်။အခုကတော့ ဗဟိုကော်မတီကနေပြီးမှ တိုင်း နဲ့ ပြည်နယ် ဦးစီးမှူးတွေကို ဒီနမူနာတွေ ပေးပို့ဖို့အတွက် ရန်ပုံငွေ ချထားပေးတာတော့ ရှိတယ်” ဟု ဒေါက်တာနှင်းအိဖြူ က ပြောသည်။
မြန်မာနိုင်ငံတွင် COVID-19 ရောဂါ ပိုးကိုရန်ကုန်မြို့ အမျိုးသားကျန်းမာရေး ဓါတ်ခွဲဌာန တစ်ခုတည်း တွင်သာ စစ်ဆေးနိုင်ပြီး၊ အဖြေ သိရှိနိုင်ရန်အတွက် အချိန်တစ်ရက် ကြာမြင့်ကြောင်း သိရသည်။
မြန်မာနိုင်ငံတွင် ယနေ့မနက် အချိန်ထိ COVID-19 အတည်ပြု လူနာ ၂၇ ဦးရှိလာပြီး ၃ဦးသေဆုံးခဲ့ကြောင်းသိရသည်။
