သျှမ်းပြည် အတွင်း COVID-19 ကာလ ရုံးပိတ်ရက် အတွင်း အခြေခံလူတန်းစားများကိုထောက်ပံ့ရန်အစိုးရ ကြေငြာထားရာ သျှမ်းပြည် အစိုးရ အဖွဲ့ မှစာရင်းအရ အခြေခံ လူတန်းစား ၆သိန်းခွဲခန့် ရှိသည်ဟု သိရသည်။

သင်္ကြန်ရုံးပိတ်ရက် ကာလအတွင်း နိုင်ငံတော် အစိုးရမှ ထောက်ပံ့မည့် သျှမ်းပြည် အခြေခံ လူတန်းစား အိမ်ထောင်စု တသိန်း နှစ်သောင်းကျော်၊ လူဦးရေ ၆သိန်းခွဲ ခန့်ရှိသည် ဟု သျှမ်းပြည်အစိုးရ ပြောရေးဆိုခွင့်ရှိသူ ပြည်နယ် စီမံကိန်း နှင့် ဘဏ္ဍာရေး ဝန်ကြီး ဦးစိုးညွှန့်လွင် က သျှမ်းသံတော်ဆင့် သို့ပြောသည်။

“သျှမ်းပြည် တပြည်လုံး ကိုယ်ပိုင်အုပ်ချုပ်ခွင့်ရဒေသတွေ အပါ အဝင် စာရင်းကောက်လိုက်တဲ့အခါ အကြမ်းဖျင်းအားဖြင့် အခြေခံ လူတန်းစား အိမ်ထောင်စု စာရင်း တစ်သိန်း နှစ်သောင်း လောက်ရှိမယ်။ လူဦးရေ အရဆိုရင် ၆ သိန်းခွဲ လောက်ရှိမယ် အတိုးအလျှော့ လုပ်သွားမယ်” ဟု ဦးစိုးညွန့်လွင် က ပြောသည်။

နိုင်ငံတော်မှ အခြေခံလူတန်းစားများကို ဧပြီ (၁၀) စတင်ကာ စားနိပ်ရိက္ခာများ ထောက်ပံ့ပေးသွားမည် ဟု သိရသည်။

ထိုသို့ ထောက်ပံ့ရန် အရေးပေါ် အချိန်မီ စိစစ်ရသည့်အတွက် အစိုးရ အနေဖြင့် လိုအပ်ချက်များရှိနိုင်ကြောင်း၊ ထပ်တိုးလာမည့် အခြေခံ လူဦးရေစာရင်းများ ကို သျှမ်းပြည် အစိုးရ အနေဖြင့် ဆက်လက်လုပ်ဆောင်သွားမည်ဖြစ်ကြောင်း ဦးစိုးညွှန့်လွင် က ပြောသည်။

“မနက်ဖြန်မှာ မြို့နယ် တစ်မြို့နယ် ဆောင်ရွက်သွားမှာ ဖြစ်ပါတယ်။ တောင်ကြီးမြို့နယ်ကို ပထမဆုံးစတင်ဆောင်ရွက်သွားမှာ ဖြစ်ပါတယ်” ဦးစိုးညွန့်လွင် ထပ်လောင်းပြောသည်။

ကျန်ရှိသည့် မြို့နယ်များကိုလည်း သင်္ကြန်တွင်း ဖြန့်ဝေ သွားမည်ဖြစ်ပြီး၊ ဖြန့်ဝေသည့်နေရာတွင် လူစုလူဝေး မဖြစ်စေရန်အတွက် လူအင်အား ထိန်းချုပ်သွားမည်ဖြစ်ကြောင်း လည်း သိရသည်။

COVID-19 ကာကွယ် ထိန်းချုပ် ကုသရေး အမျိုးသားအဆင့် ဗဟိုကော်မတီ မှ ထောက်ပံ့ပေးမည်ဖြစ်ပြီး အိမ်ထောင်စု တစ်စုလျှင် ၂ သောင်း နှုန်း သတ်မှတ်ထားပြီး ဆန် ၈ ပြည် ၊ ဆီ ၊ ဆား ၊ ပဲ နှင့် ကြက်သွန် တို့ ထောက်ပံံ့ပေးသွားမည်ဖြစ်ကြောင်း သိရသည်။