သျှမ်းပြည် တဝှမ်းတွင် ယနေ့ အချိန်ထိ COVID-19 သံသယ လူနာ ၁၂၇ ဦးရှိကြောင်း သျှမ်းပြည် COVID-19 ကာကွယ် ကုသရေး မှ စုံစမ်းသိရသည်။

သျှမ်းပြည် တခုလုံးတွင် COVID -19 ကြောင့် သံသယလူနာ ၁၂၇ ဦးရှိပြီး၊ သျှမ်းပြည်တွင် သေဆုံးသူမရှိသေးကြောင်း ပြည်နယ်အထူးရောဂါနိမ်နင်းရေးဌာနလက်ထောက်ညွှန်ကြား ရေးမှူး ဒေါက်တာ နှင်းအိဖြူ က သျှမ်းသံတော်ဆင့် သို့ပြောသည်။

“သျှမ်းပြည် အားလုံးပေါင်းလိုက်ရင် သံသယလူနာ ၁၂၇ ရှိတယ်။ ဒီနေ့ထိ သံသယလူနာထဲမှာ ပိုးတွေ့လူနာ တစ်ယောက်ပဲ ရှိတယ်။ အသက် ဆုံးပါး သွားတဲ့သူတော့ မရှိသေးဘူး” ဟု ဒေါက်တာ နှင်းအိဖြူ က ဆိုသည်။

လက်ရှိမှာ သျှမ်းပြည်တွင် COVID-19 သံသယလူနာ နည်းသွားပြီးဖြစ်သော်လည်း ဧပြီ တတိယ ပတ်တွင် COVID-19နှင့် ပတ်သက်ပြီး သတိထားရမည့် အချိန်ဖြစ်ကြောင်း ဒေါက်တာ နှင်းအိဖြူ က ပြောသည်။

“ရှေ့တပတ်တွင်း တော်တော်လေးကို သတိထားရမယ့် အပတ်လို့ မြင်ပါတယ်။ quarantine လုပ်ထားတဲ့သူတွေ ရက် ပြည့်သွားပြီ ဆိုတော့ ရောဂါလက္ခဏာတွေ့လာနိုင်သလို ၁၄ ရက်အတွင်း ရောဂါ လက္ခဏာ မပြပေမယ့် ခန္ဓာကိုယ်ထဲ ရှိနေနိုင်သေးတယ်။ ဒါ့ကြောင့် ပျော်ပျော်ပါးပါး မလုပ်ဖို့ အတွက် စာထုတ်ထားပါတယ်” ဟု ဒေါက်တာ နှင်းအိဖြူ က ထပ်လောင်းပြောသည်။

သျှမ်းပြည်အတွင်း COVID-19 ထိန်းချုပ်ရန်အတွက် သျှမ်းပြည်အစိုးရမှ မလိုအပ်ပါက အိမ်ပြင်မထွက်ရန် ခရီးမသွားရန်နှင့် ခရီးသည် ပို့ဆောင်ရေး ကားဂိတ်များလည်း မပြေးဆွဲရန် ဧပြီ ၆ ရက်တွင် သျှမ်းပြည် အစိုးရ က ကြေညာချက် ထုတ်ခဲ့သည်။

သျှမ်းပြည် တောင်ပိုင်းတွင် COVID-19 နှင့် ပတ်သက်ပြီး ပြည်တော်ပြန်များစောင့်ကြည့်ရန် နေရာ ၂၈၄ နေရာဖွင့်လှစ်ထားပြီး၊ quarantine ပြည့်သွားသည့် လူနာ ၂၉၀၀ ရှိကြောင်း သိရသည်။

ထို့ပြင် လက်ရှိမှာ ပြည်တော်ပြန် စောင့်ကြည့်နေရာ (quarantine center) တွင် စောင့်ကြည့်လူနာ ၇၅၀၀ လောက် ကျန်ရှိကြောင်း သိရသည်။