လက်ရှိဖြစ်ပွားနေသည့် ကိုရိုနာဗိုင်းရပ်စ် Covid -19 ကာကွယ်ထိန်းချုပ်ရန်နမ့်ခမ်းမြို့ ဒေသခံအဖွဲ့အစည်းများပူးပေါင်းပြီး နမ့်ခမ်းမြို့အတွင်း ပိုးသတ်ဆေးများ ဖြန်းခဲ့သည်ဟု သိရသည်။
၂၀၂၀ ဧပြီ ၆ ရက်နေ့တွင် နမ့်ခမ်းမြို့လူငယ်အဖွဲ့ နှင့် ကြက်ခြေနီအဖွဲ့ နှင့် အခြားမြို့တွင်းအဖွဲ့များ ပူးပေါင်းပြီး မြို့တွင်းရှိ လူစုလူဝေးနေရာများ၊ စျေး ၊ ဘုန်းကြီးကျောင်း၊ အခြားမြို့ပေါ် လမ်းမများ ပိုးသတ်ဆေးဖြန်းပေးခြင်း၊ အသိပညာပေးခြင်းတို့ပြုလုပ်ခဲ့သည်။
စိုင်းစံမိုး ကြက်ခြေနီအဖွဲ့ဝင်က ” – ကျွန်တော်တို့နမ့်ခမ်းမှာတော့ ပြည်တော်ပြန်တွေ နေ့တိုင်းများ လာနေတော့ ကျနော်တို့ကြက်ခြေနီအဖွဲ့နဲ့ Covid -19 ကာကွယ်ရေးကောင်စီတို့နဲ့ပူးပေါင်းပြီး တခြား အဖွဲ့တွေလည်းပါတယ် စုစုပေါင်းအဖွဲ့ ၈ ဖွဲ့ ရပ်ရွာရပ်ကွက်တွေ ဘုန်းကြီးကျောင်းတွေမှာ ပိုးသတ်ဆေး လိုက်ဖြန်းပေးတယ်။ ” – ဟုပြောပါသည်။
နမ့်ခမ်းမြို့တွင် စောင့်ကြည်လူနာ ကိုရိုနာပိုးရှိသံသယလူနာ တစ်ယောက်မှမရှိသေးကြောင်း ၎င်းကပြော သည်။
ပါဝင်လှုပ်ရှားသူ လူငယ် စိုင်းအိုက်ယီ့ က – ” မနေ့ က မန်ခမ်းကျောင်း၊ မြို့မကျောင်း၊ နောင်စန့် စတဲ့နေရာတွေလိုက်ဖြန်းပေးတယ်။ ငါးကြိမ်မြောက်ပါ ကျွန်တော်တို့တွေ ရပ်ကွက်ထဲဆင်းပြီး ပြည်သူတွေ ဆော်ဩအသိပညာပေးတာတွေလည်းရှိတယ် တစ်ချို့ဝေးတဲ့ရပ်ကွက်တွေကိုလည်း အသံဖမ်းခွေထုတ်ပြီးတော့ ရပ်ကွက်တွေရွာတွေမှာပြန်ဖွင့်စေတယ် ” -ဟု ပြောပါသည်။
၎င်းက ပြည်သူများအား ကျန်းမာရေးဌာနက ညွှန်ကြားချက်အတိုင်း လိုက်နာကြရန် လူစုလူဝေးဖြစ်မည့် ပွဲလမ်းသဘင်များ ရှောင်ကြရန် အိမ်အတွင်းနေထိုင်ပြီး မိမိကိုယ်ကိုကာကွယ်ခြင်းသည် အများအတွက် အကာအကွယ်ပေးခြင်းဖြစ်သည်ဟု တိုက်တွန်းအားပေးမှုများ ပြုလုပ်ခဲ့ကြသည်။
ယနေ့ မြန်မာနိုင်ငံတွင် ကိုရိုနာဗိုင်းရပ်စ် စောင့်ကြည့်လူနာ ၇၈၂ ယောက် ၊ ပိုးတွေ့သူ ၂၂ ယောက် နှင့် သေဆုံးသူ ၁ ယောက်ရှိသည်ဟု ကျန်းမာရေးနှင့်အားကစားဝန်ကြီးဌာန၏ ထုတ်ပြန်ကြေညာချက်အရ သိရသည်။ ကမ္ဘာတဝှမ်း ၂၀၉ နိုင်ငံ ကူးစက်ခံရပြီး အမေရိကန် နိုင်ငံက Covid -19 ကူးစက်ခံရသူ သုံးသိန်းခွဲကျော်၊ သေဆုံးသူ တစ်သောင်းကျော် ဖြင့် ကူးစက်ခံရမှု အများဆုံးနိုင်ငံဖြစ်ပါသည်။ ရောဂါပိုး စတင်ဖြစ်ပွားရာ တရုတ် နိုင်ငံမှာမူ ကူးစက်မှုအဆင့် ၈ နေရာသို့ ကျသွားပါသည်။
(ယိင်းယိင်း ရေးသားပေးပို့သည်)