သျှမ်းပြည်အရှေ့ပိုင်း မိုင်းယောင်းမြို့နယ်တွင် တောမီးလောင်ခြင်းမှ တဆင့် မိုင်းယောင်း သမိုင်းဝင် ထတ်လုံစေတီ မီးလောင်ကျွမ်းမှု ဖြစ်ပွားကြောင်း သတင်းရရှိသည်။
ယမန် နေ့ (ဧပြီ ၅ ) ရက် ညနေ ၅ နာရီခန့်တွင် မိုင်းယောင်းမြို့နယ် ဝမ်ကောင်းကျေးရွာ အုပ်စု ဝမ်တောင်းကျေးရွာ အနီး တောမီးလောင်ရာ မှ တဆင့် စွမ်ယောင်း(ခ) ထတ်လုံ စေတီ အတွင်းရှိ ဆွမ်းစားဆောင် ၊ ဇရပ်ဆောင် နှင့် လျောင်းတော်မူ ဘုရားတို့ မီးလောင်ကျွမ်းခဲ့ကြောင်း စွမ်ယောင်း ဆရာတော် က သျှမ်းသံတော်ဆင့် သို့ မိန့်ကြားသည်။
“တောမီးလောင်နေတာက ၂ ရက် ၃ ရက်လောက်ရှိပြီ။ လေပြင်းတွေ တအားတိုက်တော့ မီးစတွေက စွမ်ယောင်းစေတီ ရဲ့ အရှေ့ဘက်ခြမ်းကနေ ကူးလာတာ” ဟု စွမ်ယောင်းဆရာတော်က မိန့်တော်မူသည်။
ထို့ စွမ်ယောင်း (ခ) ထတ်လုံ စေတီတေ်ာတွင် ရဟန်းတစ်ပါး နှင့် ဒကာ တစ်ဦး နေထိုင် ကြောင်း သိရသည်။
ထိုမီးလောင်မှုကို ယမန်နေ့ ညနေ ၈ နာရီက လူထုနှင့် မီးသတ်တပ်ဖွဲ့ဝင်များ ဝိုင်းဝန်း မီး ငြိမ်းသတ်နိုင်ခဲ့ကြောင်း ဆုံးရှုံးမှု တန်ဖိုး သိန်းဆယ်ချီ ရှိကြောင်း လည်း ဆရာတော်က မိန့်ကြားတော်မူသည်။
“တောမီးကို ဘယ်သူလာ ရှို့လဲဆိုတာ ခုထိ မသိရသေးဘူး၊ ထိခိုက်ဒဏ်ရာ ရတဲ့သူတွေတော့ တစ်ယောက်မှ မရှိဘူး”ဟု စွမ်ယောင်း ဆရာတော် က ထပ်လောင်း မိန့်တော်မူသည်။
သျှမ်းပြည်အရှေ့ပိုင်း မိုင်းဆတ်မြို့နယ်ရှိ ပုံတပ် ၁ ကျေးရွာ နှင့် ခတ်ကြားဒေကျေးရွာ တွင် ဧပြီ ၃ ရက်နေ့ ညနေ ၃ နာရီအချိန်တွင် တောမီးလောင်ခြင်းကြောင့် နေအိမ် ၃၆ အိမ် မီးထဲ ပါသွားပြီး ကျေးရွာသား ၁၃၀ ယောက် စားဝတ်နေရေး ခက်ခဲကြောင်း သိရသည်။