သျှမ်းပြည် မြောက်ပိုင်း ကျောက်မဲမြို့ ရှိ ဝေဠုဝန် ဘုန်းကြီးကျောင်း တွင် ယနေ့(ဧပြီ ၄) ရက် မနက် ၁၀ နာရီခွဲက လက်ပစ်ဗုံး တလုံး တွေ့ရှိခဲ့ကြောင်းသတင်းရရှိသည်။
အဆိုပါ လက်ပစ်ဗုံးသည် ကျောက်မဲမြို့ ရှိ ရက်ကွက် (၈) ဝေဠုဝန်ဘုန်းကြီးကျောင်းဝန်း အတွင်း သန့်ရှင်းရေး လုပ်နေစဉ် တွေ့ရှိကြောင်း၊ မည်သည့် အဖွဲ့အစည်းမှ လာရောက် ပစ်ထားသည်ကို မသိရှိကြောင်း ကျောက်မဲမြို့ ပြည်နယ်လွှတ်တော် ကိုယ်စားလှယ် အမှတ်(၁) စိုင်းထွန်းဝင်း က သျှမ်းသံတော်ဆင့် သို့ ပြောသည်။
“ ဘုန်းကြီးကျောင်း ထဲမှာ လက်ပစ်ဗုံးတွေ့တယ်။ ဘယ်အဖွဲ့ဆိုတာ မသိဘူး။ အရင်က အဲ့နေရာမှာ မူးယစ်ဆေး သုံးစွဲသူတွေ အမြဲသွားတတ်တယ်” ဟု စိုင်းထွန်းဝင်း က ဆိုသည်။
လက်ရှိမှာတော့ လက်ပစ်ဗုံးကို သက်ဆိုင်ရာ အာဏာပိုင်များက လာသိမ်းသွားပြီဖြစ်ကြောင်း စိုင်းထွန်းဝင်းကပြောသည်။
ထို လက်ပစ်ဗုံး တွေ့ရှိသည့် ဘုန်းကြီးကျောင်း အနီးတွင် ပြည်ပ မှ ပြန်လာသည့် ပြည်သူများကို ၁၄ ရက်စောင့်ကြည့်သည့်နေ ရာရှိသည်ဟုသိရသည်။
“ အဲ့နေရာမှာ သန့်ရှင်းရေး သွားလုပ်တော့ လက်ပစ်ဗုံးက အိတ်တလုံးထဲမှာ ထည့်ထားတယ်။ အဲဒီအိတ်ကို သွန်ကြည့်တော့ လက်ပစ်ဗုံးတလုံး ။ တွေ့တွေ့ချင်း လှန့်သွားတယ်” ဟု ကျောက်မဲမြို့နယ် ဦးဇင်း တပါးက ပြောသည်။
ဆက်လက်ပြီး ကျောက်မဲမြို့ ရဲတပ်ဖွဲ့ မှ တာဝန်ရှိသူ တဦး က “ ကျနော် စိစစ်နေဆဲပါ။ ဘယ် အဖွဲ့ က လာတဲ့ လက်ပစ်ဗုံးလည်း ဆိုတာ စစ်ဆေးနေဆဲပါ” ဟု သျှမ်းသံတော်ဆင့် သို့ ပြောသည်။
ကျောက်မဲမြို့နယ် အတွင်း တိုင်းရင်းသားလက်နက်ကိုင်များ၊ အစိုးရတပ်မတော်များနှင့် ပြည်သူ့စစ်များ လှုပ်ရှားသည့်နေရာ ဒေသတခုဖြစ်သည်။