သျှမ်းပြည် မြောက်ပိုင်း ကွတ်ခိုင်မြို့ ၃၈ မိုင် မန်ပိန်း တွင် ခရီးသည်ယာဉ် တစီး အရှိန်လွန်ပြီး တိမ်းမှောက်မှုဖြစ်ကာ ခရီးသည် တဦး သေဆုံးခဲ့ကြောင်း သိရသည်။
ယနေ့ ဧပြီလ ၃ ရက် ညနေ ၅နာရီကျော်တွင် ကွတ်ခိုင် မှ သိန်းနီ အဆင် မန်ပိန်း ကျေးရွာ တွင် ကားတိမ်းမှောက်မှု ဖြစ်ပွားကာ အသက် ၂၀ အမျိုးသား တဦးသေဆုံးခဲ့ကြောင်း သိန္နိမြို့ အနှိုင်းမဲ့ ကုသိုလ် လူမှုကူညီရေးအသင်း က ပြောသည်။
“ မူဆယ်ဘက်ကနေ လာတဲ့ကားပါ။ ခရီးသည် ၂၇ ဦးပါတယ်။ ခရီးသည် တဦးကတော့ ပွဲချင်းပြီးဆုံးသွားတယ်” ဟု သိန္နီမြို့အနှိုင်းမဲ့ ကုသိုလ် လူမှု ကူညီရေး အသင်း မှ တာဝန်ရှိသူတဦးက ပြောသည်။
ကုန်းဆင်းသည့်နေရာဖြစ်ကာ အရှိန်မထိန်းနိုင်သဖြင့် စားသောက်ဆိုင် ဝင်းထဲဝင်သွားပြီးတိမ်းမှောက်ခြင်းဖြစ်သည် ဟု ကိုယ်တိုင်မြင်တွေ့ရသည့် စိုင်းတူး ပြောသည်။
“ အဲ့နေရာက ၂ ခါဖြစ်ပြီ၊ အရင်တခါက ကုန်တင်ကား။ အခု ခရီးသည်ယာဉ်ဖြစ်တာ။ အရှိန်လျှော့မောင်းဖို့ လိုတယ်” ဟု စိုင်းတူး က ဆိုသည်။
ကွတ်ခိုင်မြို့ နှင့် သိန္နီကြားတွင် လွန်ခဲ့သည့် လပိုင်းတွင်လည်း ကားတစီးအရှိန်မောင်းသဖြင့် စားမေးပွဲ သွားဖြေဆိုမည့် ကျောင်းသား တဦး ကားတိုက်ခံပြီး ပွဲချင်းပြီး သေဆုံးခဲ့သည်။
