သျှမ်းပြည်တောင်ပိုင်း နမ့်စန်မြို့နယ်တွင် COVID-19 ပြန့်ပွားမှု ထိန်းချုပ်နို်င်ရန်အတွက် လူစုလူဝေး ဖြင့် ညမထွက်ရ အမိန့်ထုတ်ထားကြောင်း မြို့နယ်စီမံခန့်ရေး ကော်မတီမှ စုံစမ်းသိရသည်။

အဆိုပါ ထုတ်ပြန်ချက်သည် ဧပြီ ၁ ရက်နေ့ မှ ဧပြီ ၃၀ ရက်နေ့ထိ ဖြစ်ပြီး ညနေ (၇) နာရီမှ မနက် (၆) နာရီ ထိ အိမ်ပြင်မထွက်ရ ဟု ပါရှိပါသည်။

ထုတ်ပြန်ချက်တွင် လူစုလူဝေးဖြတ်သန်းသွားလာခြင်းမပြုရ၊ ပြည်ပမှ ပြန်လည်ဝင်ရောက်လာသူများကို ရပ်ကွက်အုပ်ချုပ်ရေးမှူး ထံ အကြောင်းကြားရမည်ဖြစ်ကြောင်း နှင့် မဖြစ်မနေ အိမ်ပြင်ထွက်ရန်လိုအပ်ပါက အများဆုံး ၃ ယောက်သာ ထွက်သင့် ကြောင်း နမ့်စန်မြို့နယ် အုပ်ချုပ်ရေးမှူး ဦးညီညီအောင် ကပြောသည်။

“အဓိက လူစုလူဝေးမဖြစ်စေချင်ဘူး။ အရေးမကြီးရင် အိမ်အပြင်မထွက်စေချင်ဘူး” ဟု ဦးညီညီအောင် က ဆိုသည်။

နမ့်စန်မြို့နယ်တွင် COVID-19 စောင့်ကြည့်လူနာ ၂ ဦးရှိပြီး၊၂ ဦးစလုံး ကျန်းမာရေး ကောင်း မွန်ကြောင်း သိရသည်။

COVID-19 ရောဂါ တနိုင်ငံလုံးပြန့်ပွားနေသည့် အခြေအနေ မှာ နမ့်စန်မြို့ အနေဖြင့် တဦးကို တဦး ကူးစက်မှု မရှိအောင်၊ နောက်ပြီး မြို့ပြင်ထွက်သူ မများအောင် ထိန်းချုပ်သည့် ပုံစံဖြင့် ထုတ်လိုက်ခြင်းဖြစ်ကြောင်း နမ့်စန်မြို့နယ် အမျိုးသားဒီမိုကရေစီအဖွဲ့ချုပ် (NLD) ဥက္ကဌ ဦးနေဇော်နိုင် ကပြောသည်။

ထို ထုတ်ပြန်ချက်နှင့် ပတ်သက်ပြီး ဦးနေဇော်နိုင် က “မြို့တွင်းကလူတွေတော့ အားလုံး လိုက်နာမှုရှိတယ်။ ဒါပေမယ့် ခရီးသွားတွေက မနေ့က လုံခြုံရေးအရ လိုက်စစ်တဲ့ချိန်ကျတော့ တာချီလိတ်ကနေ ပြန်လာတဲ့ မြန်မာပြည် နတ်မောက်မှာနေတဲ့ အလုပ်သမား ၃၀၀၊ ၄၀၀ လောက် ပြန်လာတာ ရှိတယ်” ဟု ဆိုသည်။

သျှမ်းပြည် အတွင်း COVID-19 စောင့်ကြည့် လူနာ ၉၃ ဦးရှိပြီး၊ ဆေးရုံတွင် စောင့်ကြည့် ကုသဆဲ ၅၇ ဦးရှိကြောင်း COVID-19 အတည်ပြုလူနာ ၁ဦးရှိကြောင်း သိရသည်။