သျှမ်းပြည် အတွင်း COVID-19 ကူးစက်ပျံ့ပွါးမှု ပြင်းထန် လာလျှင် အခြေခံ လူတန်းစားများအတွက် စားဝတ်နေရေး အဆင်သင့် ထောက်ပံ့ရန် စီစဉ်ထားကြောင်း သတင်းရရှိသည်။

အဆိုပါ အခြေခံ လူတန်းစားများကို ထောက်ပံ့ရန် အတွက် သျှမ်းပြည်နယ်အစိုးရ အဖွဲ့ နှင့် သျှမ်းပြည် ပြည်သူလူထု စားနပ်ရိက္ခာ ထောက်ပံ့ရေး ကော်မတီ တို့ က ပူးပေါင်းပြီး လုပ်ဆောင်သွားမည် ဟု သိရသည်။

“COVID-19 ပြင်းထန်လာရင် ပြည်သူတွေ စားဝတ်နေရေး ကျပ်တည်းသွားမယ်။ ကျပ်တည်းသွားလို့ရှိရင် အခမဲ့ ပေးဝေနိုင်အောင်လို့ အလှူရှင်တွေ ပေးလှူတဲ့ငွေတွေနဲ့ ရိက္ခာစုဆောင်းဝယ်ယူပြီးအဆင်သင့် ပြင်ထားတာ။ အခုတော့ မလှူသေးဘူး။ ပြင်ဆင်ထားတုန်း” ဟု သျှမ်းပြည် ပြည်သူလူထု စားနပ်ရိက္ခာ ထောက်ပံ့ရေးကော်မတီ ဒုဥက္ကဌ ဦးသူရစောသိန်း (ခ) ကိုတူးငယ် က သျှမ်းသံတော်ဆင့် ကို ပြောသည်။

ထို ကော်မတီကို ကမ္ဘောဇဘဏ် နာယကကြီး ဦးအောင်ကိုဝင်း မှ မတည်လှူဒါန်းငွေ သိန်း (၂၀၀၀) နှင့် သျှမ်းပြည် အစိုးရအဖွဲ့ နှင့် အလှူရှင်များ စုပေါင်းပြီး ဆန်အိတ် (၇၀၀၀) ကျော် ၊ ၁၈ ကျပ်သားရှိ ဆီဗူးပေါင်း (၇၅,၀၀၀) နှင့် ကုလားပဲ စသည်တို့ လှူဒါန်းရန် ပြင်ဆင်ထားကြောင်း ဦးသူရစောသိန်း က ပြောသည်။

“ဘယ်ချိန် ဘယ်နေရာမှာ ဘယ်လောက်လှူမလဲဆိုတာ သျှမ်းပြည်နယ် အစိုးရအဖွဲ့ကပဲ ဆုံးဖြတ်ပါမယ်၊ ကျနော်တို့ ကတော့ ကော်မတီဖွဲ့ပြီးတော့ စုဆောင်းထားပေးတာပေါ့၊ လက်တွဲလုပ်တာပါ” ဦးသူရစောသိန်း က ဆိုသည်။

COVID-19 ကြောင့် သျှမ်းပြည် အခြေခံလူတန်းစားများ စားဝတ်နေရေး အတွက် မပြေမလည် ဖြစ်လာမည်ကို ကြိုတွက်ထားကာ အဆင်သင့် အခမဲ့ ပေးဝေနိုင်အောင် စဉ်းစားမိသဖြင့် ၎င်း ကော်မတီကို ဖွဲ့ရခြင်းဖြစ်သည် ဟု သိရသည်။

ဧပြီ ၂ ရက် ထိ မြန်မာနိုင်ငံတွင် COVID-19 ပိုးတွေ့လူနာ ၂၀ ဦးတွေ့ရှိ ထားပြီး တဦးသေဆုံး
ကြောင်း ကျန်း မာရေး နှင့် အားကစားဝန်ကြီးဌာန က ကြေညာချက်ထုတ်ထားသည်။