သျှမ်းပြည် အတွင်း COVID-19 အတည်ပြု လူနာများအတွက် ဆေးရုံကြီး ၈ခု တွင် ကုသရန် ဆောင်ရွက်သွားမည် ဟု သျှမ်းပြည်နယ် အစိုးရ ထံမှ သိရသည်။

COVID-19 ကူးစက်ခံရသည့် လူနာများအတွက် သျှမ်းပြည် အတွင်းရှိ ဆေးရုံကြီး ၈ခုဖြစ်သည့် သျှမ်းမြောက်တွင် လားရှိုး၊ မူဆယ် ပြည်သူ့ဆေးရုံများဖြစ်ပြီး၊ သျှမ်းတောင်တွင် စဝ်စံထွန်း ဆေးရုံ၊ အမျိုးသမီးနှင့် ကလေး ဆေးရုံ၊ လွိုင်လင်ပြည်သူ့ဆေးရုံနှင့် ကလောပြည်သူ့ဆေးရုံတို့ ဖြစ်သည်။

ထို့ပြင် သျှမ်းရှေ့ တွင် တာချီလိတ် ပြည်သူ့ဆေးရုံ နှင့် ကျိုင်းတုံ ပြည်သူ့ဆေးရုံသို့ဖြစ်ကြောင်း သျှမ်းပြည်နယ် အစိုးရ အဖွဲ့ဝင် ပြည်နယ် လူမှုရေး ဝန်ကြီး ဒေါက်တာ မျိုးထွန်း က သျှမ်းသံတော်ဆင့် သို့ ပြောသည်။

“ဆေးရုံကြီး ၈ ခုကတော့ ပြည်နယ်အစိုးရက ပံ့ပိုးပေးမယ့် စက်ကိရိယာတွေ အထောက်အကူ ပစ္စည်းတွေ အားလုံး စုစုပေါင်း ကျပ်သိန်း တစ်ထောင်သုံးရာသုံးဆယ် (၁၃၃၀) လောက် ကျနော်တို့ ထောက်ပံ့ပေးထားတယ်” ဟု ဒေါက်တာ မျိုးထွန်း က ပြောသည်။

စောင့်ကြည့်ခံရသူများ နေမကောင်းဖြစ်လာပါက သံသယ လူနာ အဖြစ် သတ်မှတ်ခံရမည် ဟု ဒေါက်တာ မျိုးထွန်းက ပြောသည်။

“ကျနော်တို့ စောင့်ကြည့်ထဲက သံသယ ဖြစ်လာတယ်ဆိုရင် ဓာတ်ခွဲမှုတွေ လုပ်မယ်။ အာခေါင်တို့ပတ်တွေ ယူပြီးတော့ အမျိုးသားဓာတ်ခွဲကို ပို့မယ်။ positive ဖြစ်လာလို့ ခုနပြောတဲ့ လက်ခံကုသတဲ့ ဆေးရုံ ၈ ခုကို ကျနော်တို့ ပို့မှာ ဖြစ်ပါတယ်”ဟု သျှမ်းပြည်နယ် လူမှုရေးဝန်ကြီး ဒေါက်တာမျိုးထွန်းက ရှင်းပြသည်။

လက်ရှိမှာ သျှမ်းပြည် မြောက်ပိုင်း ကျောက်မဲမြို့ မှ ထိုင်းနိုင်ငံမှ ပြန်လာသည့် အမျိုးသားတဦး COVID-19 အတည်ပြု လူနာ ဖြစ်သည့် အတွက် ကျောက်မဲဆေးရုံ မှ လားရှိုးပြည်သူ့ဆေးရုံသို့ လွှဲပြောင်း ကုသထားကြောင်း သိရသည်။

သျှမ်းပြည်တွင်း ဧပြီ ၁ ရက်နေ့ အထိ Covid-19 စောင့်ကြည့်လူနာ ၈၉ ဦးရှိပြီး သံသယ လူနာ ၁ ဦး ၊ ပိုးမတွေ့ လူနာ ၇၇ ဦး ၊ ပိုးတွေ့လူနာ ၁ ဦး နှင့် အဖြေစောင့်သည့် လူနာ ၁၂ ဦး ရှိထားကြောင်း ဒေါက်တာမျိုးထွန်းက ကပြောဆိုလိုက်သည်။