သျှမ်းပြည် မြောက်ပိုင်း ကျောက်မဲမြို့တွင် COVID-19 အတည်ပြု လူနာ အမျိုးသား တဦး တွေ့ရှိကြောင်း ယနေ့(မတ် ၃၀) ရက် ကျန်းမာရေး နှင့် အားကစားဝန်ကြီးဌာနက ကြေညာလိုက်သည်။

ယနေ့ ကျန်းမာရေး နှင့် အားကစား ဝန်ကြီးဌာန ကြေညာချက်တွင် COVID-19 ပိုးရှိသူ ကျောက်မဲလူငယ် တဦး အပါအဝင် ၄ဦးတွေ့ရှိခဲ့ကြောင်း ထုတ်ပြန်ထားသည်။

၎င်းနှင့်ပတ်သက်ပြီး ကျောက်မဲမြို့နယ် ပြည်နယ်လွှတ်တော်ကိုယ်စားလှယ် စိုင်းထွန်းဉာဏ်က – “ဟုတ်တယ်ဗျ အတည်ပြုပြီ။ ဒီကောင်လေးက ခိုမုံးအုပ်စုသားပါ။ သူက တတိယနှစ်ကျောင်းသားလို့သိရပါတယ်။ ပိုးစစ်ဖို့ပို့ထားတာအများကြီးကျန်ပါသေးတယ် ” – ဟု သျှမ်းသံတော်ဆင့်အားပြောပြသည်။

ကျန်းမာရေးဝန်ကြီးဌာန၏ ထုတ်ပြန်ချက်တွင်မူ အဆိုပါကျောက်မဲ လူနာ အမျိုးသားသည် အသက် ၂၄နှစ်ရှိပြီး မတ် ၂၅ ရက်တွင် ထိုင်းနိုင်ငံ ဘန်ကောက်မြို့မှ မြန်မာနိုင်ငံ တာချီလိတ်မြို့သို့ရောက်ရှိလာကြောင်း၊ တာချီလိတ်မြို့ တွင် ၂ည တည်းခိုခဲ့ပြီးမှ မတ်လ ၂၈ ရက် မန္တလေးမြို့သို့ လေယာဉ်ဖြင့်လာကြောင်း ထိုမှတဆင့်ကျောက်မဲသို့ ကိုယ်ပိုင်ကားဖြင့်ပြန်သွားကြောင်း ဆိုပါသည်။

မတ် ၂၈ ရက် ညပိုင်းတွင် အလွန်အမင်း အန်ခြင်း၊ ချောင်းဆိုးခြင်း လက္ခဏာများခံစားခဲ့ ရသဖြင့် ကျောက်မဲမြို့ ဆေးရုံသို့ပြသဖြင့် စောင့်ကြည့်လူနာ အဖြစ် သီးသန့်ထား ဆေးကုသခဲ့သည်။

ကျောက်မဲမြို့နယ် လွှတ်တော်ကိုယ်စားလှယ် စိုင်းထွန်းဉာဏ်က -“ အခု ပြည်ပမှာအလုပ်သွားလုပ်ပြီးပြန်လာတဲ့သူတွေကျောက်မဲမှာအများကြီးရှိပါတယ်။ အထက ကျောင်းမှာ ၁၀၀ ကျော်ရှိပါတယ်။ ဗိုင်းရပ်စ်ပိုးကူးစက်မှုကိုထိန်းချုပ်နိုင်ဖို့အတွက် အခုကျောက်မဲမှာ တင်းကျပ်စစ်ဆေးနေပါတယ်။ အဝင်အထွက် အပေါက်တခုဘဲထားရှိပါတယ်။” – ဟု သျှမ်းသံတော်ဆင့်အားဆက်ပြောပြသည်။

ကျန်းမာရေးဌာနထုတ်ပြန်သော COVID-19 အတည်ပြုလူနာ နောက်ထပ် ၃ ဦးမှာ ပြင်သစ်နိုင်ငံသား ကမ္ဘာလှည့်ခရီးသွား များဖြစ်ကြသည်ဟု ဆိုပါသည်။ ၎င်းတို့အားပို့ဆောင်သည့် ဧည့်လမ်းညွှန်က ပိုးကူးစက်ကြောင်း မတ်လ ၂၈ ရက်နေ့က အစိုးရကြေငြာသဖြင့် အဆိုပါ ဧည့်သည် ၄ ဦးကို ဟိုတယ်တခုတွင် ထိန်းသိမ်းထားကာ ပိုးဆက်လက်စစ်ဆေး တွေ့ရှိခဲ့ခြင်းဖြစ်ကြောင်း ဖော်ပြထားသည်။

ထိုသူများနှင့် အနီးကပ်ထိတွေ့ဆက်စပ်မှုရှိသူများကို ရှာဖွေ ဖော်ထုတ်ပြီး အသွားအလာ တားမြစ် ပိတ်ပင် ကာ စောင့်ကြပ်ကြည့်ရှုခြင်းလုပ်ဆောင်နေကြောင်း သိရသည်။

ယမန်နေ့တွင်လည်း ထိုင်းနိုင်ငံမှ မြန်မာနိုင်ငံ မြဝတီသို့ ပြန်လာသည့် အမျိုးသားတဦး COVID-19 တွေ့ရှိခဲ့သည်။

လက်ရှိ မြန်မာနိုင်ငံတွင် COVID-19 အတည်ပြုလူနာ ၁၄ဦးရှိသွားပြီဖြစ်ကြောင်းသိရသည်။