သျှမ်းပြည်တောင်ပိုင်း လွိုင်လင်ခရိုင် ပင်လုံမြို့ သျှမ်းစာပေယဉ်ကျေးမှုခန်းမတွင် ပထမအကြိမ် သျှမး်စာပေဟောပြောပွဲ ပြုလုပ်ကျင်းပရာ လူငယ်နှင့် စာပေ ၊ တာဝန်ယူမှု တာဝန်ခံမှု နှင့်ပတ်သက်ပြီး သျှမ်းစာပေကျွမ်းကျင်းပညာရှင် ၂ ဦးက ဟောပြောသွားခဲ့ကြောင်း သိရသည်။

ပင်လုံမြို့ရှိ သျှမ်းစာပေယဉ်ကျေးမှု အသင်းက ဦးဆောင်ကာ မတ်လ ၂၀ ရက်နေ့ က အဆိုပါစာပေဟောပြောပွဲကျင်းပခဲ့ခြင်းဖြစ်ပြီး စာရေးဆရာ၊ ကဗျာဆရာ၊ ဆဲန်ပိုင်းဂျာနယ်အယ်ဒီတာ၊ သျှမ်းစာပေမြတ်နိုးသူ ဆရာ ဟင်းကာယန်း နှင့် သျှမ်းပေစာ ကျွမ်းကျင်ပညာရှင် စာရေး ကော်မိန်း တို့ ကဟောပြောသွားခဲ့ခြင်းဖြစ်ပါသည်။

ဟင်း ကာယန်းက “အနာဂတ်လူငယ်တွေမှာ တာဝန်ရှိတယ် မရှိဘူးဆိုတာ၊ သိတယ်မသိဘူးဆိုတာ မူတည်တယ်။ ဒါကြောင့်မလို့ တာဝန်သိမှုဆိုတာ ဘာလဲ တာဝန်ကို သိလာတာနဲ့ တစ်ပြိုင်တည်းမှာ တာဝန်ကို ဘယ်လို ရယူပြီး တာဝန်ကျေအောင် ဘယ်လိုထမ်းဆောင်မလဲ ဆိုတဲ့ အကြောင်းကို လူငယ်တွေ ပိုပြီးတော့မှ သိထားပြီးသားရှိရင်တောင်မှ ဒီထက်မက ကျယ်ကျယ်ပြန့်ပြန့် သိနိုင်ဖို့အတွက် လာရောက်ဟောပြောခြင်း ဖြစ်ပါတယ်” ဟု သျှမ်းသံတော်ဆင့် ကိုပြောသည်။

လူငယ်များသည် အနာဂတ်ခေါင်းဆောင်များဖြစ်ကာ တိုင်းပြည်ကို အုပ်ချုပ်၍ ဦးဆောင်သွားမည့် သူများဖြစ်သည့်အတွက် ပညာတတ်မြောက်ရန် အမြင်ကျယ်ရန် လိုအပ်ကြောင်း၊ တွေးတာဆင်ခြင်တတ်ရန် ဖန်တီးနိုင်စွမ်းရှိသည့် လူငယ်များဖြစ်ရန် လိုအပ်ကြောင်း၊ စာပေတွင် ရင်းနှီးကျွမ်းဝင်ရန် လိုအပ်သည့်အပြင် အသိပညာ ဗဟုသုတပိုင်းတွင် ပိုမိုမွေ့လျော်ရန် လိုအပ်ကြောင်း၊ ထို့ကြောင့် လူငယ်များကို ဦးစားပေးကာ ဟောပြောရခြင်း ဖြစ်ကြောင်း ဆရာ ဟင်း ကာယန်း ကပြောသည်။

“စာပေယဉ်ကျေးမှု ထွန်းကားလာအောင် နောက်တစ်ခုက မျိုးဆက်သစ်လူငယ်တွေ စာပေယဉ်ကျေးမှုကို ချစ်မြတ်နိုးလာအောင် ထိန်းသိမ်းစောင့်ရှောက်လာအောင် ဗဟုသုတ တိုးပွားေတွေလာအောင်ဆိုပြီး ရည်ရွယ်ချက် တွေနဲ့ ဒီစာပေဟောပြောပွဲ လုပ်ရခြင်း ဖြစ်ပါတယ်” ဟု ပင်လုံသျှမ်းစာပေယဉ်ကျေးမှု ဥက္ကဌ လုံးစိုင်းဆွန်ယု ကပြောသည်။

ဆရာစိုင်းကော်မိန်းကလည်း ရိုးရာယဉ်ကျေးမှု မပပျောက်အောင်၊ စာပေယဉ်ကျေးမှု မပပျောက်အောင်ထိန်းသိမ်းရန် လူငယ်မောင်မယ်များတွင်တာဝန်ရှိကြောင်း ဟောပြောသွားပါသည်။

ပင်လုံမြို့၌ ကျင်းပသည့် သျှမ်းစာပေဟောပြောပွဲသည် လွိုင်လင်မြို့မှ သျှမ်းစာပေသင်ကြားသည့် ဆရာ/မ များ ပင်လုံမြို့မှ သျှမ်းစာပေ သင်ကြားသည့် ဆရာ/မ များ မြို့မိ မြို့ဖ များ လူမှုအဖွဲ့အစည်းများ စုစုပေါင်း ၁၀၀ ကျော် တက်ရောက်ခဲ့သည်။