သျှမ်းပြည်တောင်ပိုင်း နမ့်စန်မြို့တွင် ထိုင်းနိုင်ငံမှ ပြန်လာသော အမျိုးသားတစ်ဦးသည် လည်ချောင်း နာခြင်း ၊ ချောင်းဆိုးခြင်း စသော အသက်ရှူလမ်းကြောင်းဆိုင်ရာ Covid 19 ရောဂါသံသယ လက္ခဏာဖြစ်ပေါ်နေသည်ဟု နမ့်စန်မြို့နယ်ကုသရေး ဦးစီးဌာနက ပြီးခဲ့သည့်ရက်ပိုင်းကထုတ်ပြန်ထားသည်။

နမ့်စန်မြို့နယ်၊ နောင်ဟီးအုပ်စု၊ ကျောက်တိုင်ကျေးရွာနေ ဦးလာဗွေ (၂၃) နှစ်သည် ၂၀၂၀ မတ် ၁၉ ရက်နေ့တွင် ထိုင်းနိုင်ငံမှပြန်ရောက်ပြီး လည်ချောင်းနာခြင်း၊ ချောင်းဆိုးခြင်းစသည့် ကိုရိုနာရောဂါ သံသယလက္ခဏာဖြစ်ပေါ်သောကြောင့် ကျောက်တိုင်ကျေးရွာရှိ ၎င်း၏ နေအိမ်တွင် ၂ ပတ် ၁၄ရက်အတွင်း ပြင်ပသို့ ထွက်ခွာခြင်းမရှိစေရေး ထိန်းသိမ်းထားလျှက်ရှိကြောင်း သိရသည်။

နမ့်စန်မြို့နယ် အုပ်ချုပ်ရေးမှူး ဦးညီညီအောင်က – ” နောင်ဟီးအုပ်စု နမ့်တိန်းချောင်းတစ်ဘက်ကမ်းမှာ ရှိတဲ့ ကျောက်တိုင်ရွာမှာ ထိုင်းကနေပြန်လာတဲ့ တစ်ယောက် ပအိုဝ်းလူမျိုး ဦးလာဗွေပေါ့ သူကချောင်း ဆိုးတယ် လည်ချောင်းနာတယ် ဒီလက္ခဏာလေးတွေတွေ့လို့ သူ့ကိုတော့ ရွာမှာသီးသန့် အိမ်ထဲက အိမ်ပြင်လုံးဝပေးမထွက်ပဲ သံသယလူနာအဖြစ်ထားရှိတယ်။ လက်ရှိအချိန်မှာ သူကတော့ ကျန်းမာရေးကောင်းနေတယ်။” – ဟု ပြောပါသည်။

ယနေ့အချိန်တွင် ထိုင်းနိုင်ငံမှ ပြန်လည်ရောက်ရှိလာသူ ၃၀၀ နီးပါး ရှိပြီဟု ၎င်းကပြောသည်။

အဆိုပါ ဦးလာဗွေအား နမ့်စန်မြို့နယ်ကုသရေးဌာနမှ စနစ်တကျစောင့်ကြည့်စေရေး ကြပ်မတ်ဆောင်ရွက်နေကြောင်းနှင့် ထူးခြားမှုရှိပါက အချိန်နှင့်တပြေးညီ တင်ပြမည်ဖြစ်ကြောင်း နမ့်စန်မြို့နယ်ကုသရေးဌာန အကြောင်းကြားစာစောင်အရ သိရသည်။

မြို့နယ်အုပ်ချုပ်ရေးမှူး ဦးညီညီအောင်က – ” သံသယလူနာ တစ်ကယ်လို့များ ရှိခဲ့ရင် ဆေးရုံမှာ ကုသနိုင်ဖို့အတွက် သံသယလူနာ ၈ ယောက်စာ ကုတင် ၈ လုံးကို သံဃာဆောင်မှာ ပြင်ထားတယ်။ နောက်တစ်ခုက အဲနားမှာ ဝန်ထမ်းအိမ်ယာအသစ် ၄ ခန်း ၄ ထပ် အခန်း ၁၆ ခန်းကို ကုတင် ၁၆ လုံးကိုချထားပြီးပြင်ဆင်ထားတယ်။ ” – ဟုပြောသည်။

နမ့်စန်မြို့ အမှတ် ၂ ရပ်ကွက် တွင်နေထိုင်သည့် ဒီမိုကရေစီပါတီဥက္ကဌ ဦးနေဇော်ကလည်း  –  “ကျနော်တို့ မြို့ပေါ် ရပ်ကွက်မှာက  လူစုလူဝေး အလှူတွေအကုန်ဖျက်ထားတယ်။ လက်ဆေးစင်တွေစီစဉ်ထားပေးတယ် ” – ဟု ပြောသည်။

မြန်မာနိုင်ငံတွင် ကိုရိုနာ ဗိုင်းရပ်စ် ကူးစက်ခံရသူ ၃ ဦး ရှိပြီး ယင်းဗိုင်းရပ်စ်ကြောင့် သေဆုံးသူ ယနေ့အချိန်ထိ တစ်ဦးမှ မတွေ့ရှိသေးကြောင်း ကျန်းမာရေးဝန်ကြီးဌာန၏ ထုတ်ပြန်ချက်များအရ သိရသည်။

ကိုရိုနာဗိုင်းရပ်စ် စတင်ဖြစ်ပွားရာ မြန်မာနိုင်ငံ၏ အိမ်နီးချင်းတရုတ်နိုင်ငံတွင် သေဆုံးသူ ၃၂၈၇ ဦး၊ ကူးစက်ခံရသူ ၈ သောင်းကျော် ရှိကြောင်း ရောဂါကူးစက်မှု ထိန်းချုပ်နိုင်ပြီ ဖြစ်ကြောင်း တရုတ်အစိုးရက ထုတ်ပြန်သော်လည်း လက်ရှိ တွင် ကမ္ဘာတလွှား ၁၉၆ နိုင်ငံ ကူစက်ပျံ့နှံ့နေသောကြောင့် ကမ္ဘာ့ ကျန်းမာရေးဌာန WHO ကူးစက်လွယ် ကပ်ရောဂါ အဖြစ်သတ်မှတ်ထားပါသည်။

(ယိင်းယိင်းရေးသားပေးပို့သည်)