မြန်မာနိုင်ငံ နယ်စပ် စစ်ဆေးရေး ဂိတ်များမှ ပြည်ဝင်ခွင့် ဗီဇာဖြင့် ဝင်ရောက်ခွင့် ယာယီပိတ်လိုက်ကြောင်း သတင်းရရှိသည်။

လက်ရှိ Covid-19 အဆုတ်ရောင် ကူးစက်မြန် ရောဂါ၊ ပြည်ပ မှ ကူးစက်ပြန့်ပွားမှု ကို ကာကွယ်၊ ထိန်းချုပ်နိုင်ရေး အတွက် နိုင်ငံခြာသားများ နယ်စပ် စစ်ဆင်ရေး ဂိတ်မှာ ပြည်ဝင်ခွင့် ဗီဇာဖြင့် ဝင်ရောက်ခွင့် ကို ယနေ့ (မတ် ၁၉ ) ရက်စွဲဖြင့် မြန်မာနိုင်ငံ နိုင်ငံခြားရေးဝန်ကြီးဌာန မှ ထုတ်ပြန်ကြေညာလိုက်သည်။

“ ကျနော်တို့ တာချီလိတ်မှာတော့ ဒီနေ့ က စပိတ်တယ်။ အဓိက တတိယ နိုင်ငံသားတွေကို ပေးမဝင်တော့တာပါ။ ထိုင်းဘက်ကလည်း သူတို့ Entry Permit (ပြည်ဝင်ခွင့်လက်မှတ်) ထုတ်မပေးတော့ဘူး” ဟု တာချီလိတ်မှ လူဝင်မှု ကြီးကြပ်ရေး တာဝန်ရှိသူ တဦးက သျှမ်းသံတော်ဆင့် သို့ ပြောသည်။

သို့သော် နပ်စပ် နှစ်ဖက် ဒေသခံ ပြည်သူများကို နယ်စပ်ဖြတ်ကျော်ခွင့် ( Border Pass) ဖြင့် ဝင်ရောက်ခွင့် ပေးထားကြောင်း၊ ဝင်ရောက်လာသူများကို ကိုယ်အပူချိန် တိုင်းတာမှုများ၊ ကျန်းမာရေး စိစစ်မှုများ တင်းကြပ်ဆောင်ရွက် သွားမည် ဟု လည်း မြန်မာနိုင်ငံ နိုင်ငံခြားရေး ဝန်ကြီးဌာန ထုတ်ပြန်ချက် တွင်ရေးသားထားသည်။

မြန်မာနိုင်ငံသို့ပြည်ဝင်ခွင့် ဗီဇာ ရရှိထားသည့် နိုင်ငံခြားသားများ အနေဖြင့် ရန်ကုန် အပြည်ပြည်ဆိုင်ရာ လေဆိပ်၊ မန္တလေးအပြည်ပြည်ဆိုင်ရာ လေဆိပ်နှင့် နေပြည်တော် အပြည်ပြည်ဆိုင်ရာ လေဆိပ်တို့မှသာ တည်ဆဲ စည်းမျဉ်း စည်းကမ်းများနှင့် အညီ ဆက်လက် ဝင်ရောက်ခွင့်၊ ထွက်ခွာခွင့်ပြုမည် ဟုလည်း ထည့်သွင်းရေးသားထားသည်။

မြန်မာ-တရုတ်နယ်စပ် မူဆယ်မြို့ ရှိ နယ်စပ်ဂိတ် များတွင် တရုတ်ပြည်သို့ အလုပ်သွားလုပ်မည့် မြန်မာရွှေ့ပြောင်းအလုပ်သမားများ တရက်လျှင် ၁သောင်းကျော် ရှိနေကြောင်းသိရသည်။

“ ကျနော်တို့ မူဆယ်နယ်စပ်ဂိတ်တွေလည်း ပိတ်စေချင်တယ်။ အခု တရုတ်ပြည်မှာ Corona (ခိုရိုနာ ဗိုင်းရပ်စ်) ကူးစက်ခံရသူတော့ပေမယ့် မြန်မာပြည်မှာဖြစ်လာရင် ကုဖို့ ကခက်တယ်” ဟု မူဆယ် ဒေသခံ စိုင်းမောဝ် က ပြောသည်။

မြန်မာ-ထိုင်းနယ်စပ် ဝင်၊ထွက် သွားလာသည့်နေရာတွင် တင်းကြပ်စွာ ဆောင်ရွက်မှု ရှိသကဲ့သို့ မြန်မာ- တရုတ် နယ်စပ် ဂိတ်များတွင် စည်းကမ်းတည်းကြပ်မှု မရှိကာ ဝင်၊ထွက် သွားလာနေမှုများနေကြောင်းလည်း စိုင်းမောဝ် က ဆိုသည်။

ထိုင်းနိုင်ငံ ဘက်မှ EP( Entry Permit) ပြည်ဝင်ခွင့် လက်မှတ်ဖြင့် တာချီလိတ်မြို့သို့ဝင်လာသည့် တရုတ်နိုင်ငံသား ၅၃၇ ဦး၊ တာချီလိတ်တွင် သောင်တင်နေကြောင်း သိရသည်။

မြန်မာနိုင်ငံတွင် Covid-19 ကူးစက်ခံရသည့် သူ တဦးတယောက်မှ မရှိသေးသော်လည်း Covid-19 စောင့်ကြည့်လူနာ သေဆုံးမှု ၅ဦး ရှိခဲ့ရာ သျှမ်းပြည် အရှေ့ပိုင်း ကျိုင်းတုံ ဆေးရုံတွင် Covid-19 စောင့်ကြည့်ခံရ လူနာ တဦး သေဆုံးခဲ့သည်။

ထိုင်းနိုင်ငံတွင် Covid-19 ရောဂါ တွေ့ရှိသူ ၂၇၂ ဦးရှိကြောင်း ထိုင်းအစိုးရ ထုတ်ပြန်ချက် အရသိရသည်။