ထိုင်းနိုင်ငံ ချင်းမိုင်ခရိုင်တွင် ပြုလုပ်ပေးနေသည့် အလုပ်သမား သက်တမ်းတိုးကဒ် (One Stop Service) လုပ်ငန်းကို ယာယီ ရပ်ဆိုင်း လိုက်ကြောင်း သတင်းရရှိသည်။
လက်ရှိ ထိုင်းနိုင်ငံ တွင် Covid-19 အဆုတ်ရောင် ကူးစက်မြန် ရောဂါ ဖြစ်ပွားမှု မြင့်တက်လာသည့် အတွက် မတ် ၁၉ ရက်နေ့မှစတင်ကာ အလုပ်သမား ကဒ် သက်တမ်းတိုး (One Stop Service) လုပ်ငန်းရပ်ဆိုင်းထားမည် ဟု ထိုင်းနိုင်ငံ ချင်းမိုင်ခရိုင် အလုပ်သမားရုံးမှ ယနေ့ မတ်လ ၁၈ ရက် ရက်စွဲဖြင့် ထုတ်ပြန်ကြေညာလိုက်ကြောင်း သိရသည်။
အလုပ်သမား သက်တမ်းတိုးကဒ် (One Stop Service) လုပ်ငန်းကို ပိတ်လိုက်သော်လည်း အလုပ် သမားများ၏ နာမည် စာရင်းကို အလုပ်ရှင်များက အွန်လိုင်း တွင် စာရင်းပေးသွင်းနိုင်ကြောင်း ထည့်သွင်းရေးသားထားသည်။
“ မနက်ဖြန်ကစပြီး One Stop Service တနေရာထဲ မလုပ်ပေးတော့ဘူး။ လူအရမ်းများတယ်။ ခိုရိုနာကြောင့်ရပ်နားထားတာပါ။ ဘန်ကောက်မှာ စ ရပ်တာ။ ဒီနေ့က ချင်းမိုင်မှာကြေညာလိုက်တယ်။ မနက်ဖြန် ကနေ စပြီးရပ်မယ် ” ဟု ရွှေ့ပြောင်းအလုပ်သမားများ နေထိုင်အလုပ်လုပ်ရန်သက်တမ်းတိုး ရာတွင် ကူညီဆောင်ရွက်ပေးနေသည့် စိုင်းနောင့် က ပြောသည်။
One Stop Service ယာယီရပ်ဆိုင်းလိုက်သည့် အပေါ် အလုပ်သမားများ ထိခိုက်မှု မရှိကြောင်း၊ ပြဿနာလည်းမရှိကြောင်း စိုင်းနောင့် က ဆိုသည်။
ယခုအသုတ် One Stop Service ဖြင့်သက်တမ်းတိုးနေသည့် ရွှေ့ပြောင်းအလုပ်သမားများသည် တနေ့လျှင် အယောက် ၃၀၀ အထက်ရှိကြောင်း သိရသည်။