မြန်မာ-ထိုင်း နယ်စပ် တာချီလိတ်တွင် တရုတ်နိုင်ငံသား ၅၃၀ ကျော် သောင်တင်နေကြောင်း သတင်းရရှိသည်။
အဆိုပါ သောင်တင်နေသည့် တရုတ်နိုင်ငံသားများသည် ထိုင်းနိုင်ငံဘက်မှ EP ( Entry Permit) ပြည်ဝင်ခွင့် လက်မှတ်ဖြင့် တာချီလိတ်မြို့သို့ ဝင်လာ သူများဖြစ်ကြောင်း၊ ထိုင်းနိုင်ငံဘက်မှ တရုတ်နိုင်ငံသားများကို ပြန်လည် ဝင်ခွင့်မပေးတော့သည့်အတွက် တာချီလိတ်မြို့တွင် သောင်တင်နေကြခြင်းဖြစ်ကြောင်း တာချီလိတ်ခရိုင် အုပ်ချုပ်ရေးမှူး ဦးချမ်းမြေ့စော က သျှမ်းသံတော်ဆင့်သို့ပြောသည်။
“ တရုတ်နိုင်ငံ သား ၅၃၇ ဦးပါ။ အခု နိုင်ငံခြားသားတွေ အတွက် သတ်မှတ်ထားတဲ့ဟိုတယ်တွေမှာ နေနေကြပါတယ်။ ၁၄ ရက် ကျော်ရင်တော့ ဒဏ်ငွေဆောင်ပြီး ထပ်နေလို့ ရပါတယ်” ဟု ဦးချမ်းမြေ့စော က ဆိုသည်။
သောင်တင်နေသည့် တရုတ်နိုင်ငံသားများ တရုတ်နိုင်ငံသို့ ပြန်လည် ထွက်ခွာလိုပါက မြန်မာနိုင်ငံ တရုတ်သံရုံးကို ချိတ်ဆက်ပြီး ထွက်နိုင်ကြောင်းလည်း ဦးချမ်းမြေ့စော ကထပ်လောင်းပြောကြားသည်။
မြန်မာ-ထိုင်း နယ်စပ် တံတားဖြတ်သန်းခွင့် နှင့် ပတ်သက်ပြီး ဦးချမ်းမြေ့စော က “ တံတားကတော့ ပုံမှန်ပဲ ဖြတ်သန်းနေကြတာ။ အဓိက တရုတ်နိုင်ငံသားတွေကို ပြန်ပေးမဝင်တာ။ တံတားဖြတ်သန်းခွင့် က မပိတ်ပါဘူး” ဟု လည်း ပြောသည်။
ယမန်နေ့ ကလည်းတာချီလိတ် ခရိုင် ပြည်သူ့ဆေးရုံတွင် COVID-19 အဆုတ်ရောင် ကူးစက်မြန်ရောဂါ စောင့်ကြည့်ခံရသည့် တရုတ်နိုင်ငံသား ၂ ဦး ရှိ နေပါသည်။
လက်ရှိမှာ ထိုင်းနိုင်ငံတွင်လည်း COVID-19 ကြောင့် သေဆုံးသူ တဦး ၊ ကူးစက်ခံရသူ ၁၄၇ ဦး ၊ စောင့်ကြည့်ခံရသူ ၆၅၄၅ ဦးရှိကြောင်း ထိုင်းနိုင်ငံ ကျန်းမာရေး ဝန်ကြီးဌာနက မတ် ၁၆ ရက် ညနေပိုင်း ထုတ်ပြန်ချက်အရသိရသည်။
ထိုင်းနိုင်ငံ Buri Ram ( ဘူရီရမ်) ခရိုင် ကို လည်း ယမန်နေ့က ဝင်၊ထွက် သွားလာခွင့်ပိတ်ခြင်း (Lockdown) ပြုလုပ်ထားသည်ဟု ထိုင်းအာဏာပိုင်များက ထုတ်ပြန်ထားသည်။
