မြန်မာ-ထိုင်းနယ်စပ် တာချီလိတ် မြို့တွင် COVID-19 စောင့်ကြည့်ခံရသည့် တရုတ် နိုင်ငံသား ၂ ဦး ရှိနေကြောင်း သတင်းရရှိသည်။
တရုတ်နိုင်ငံသား ၂ ဦးသည် တရုတ်နိုင်ငံ ကူမင်းမြို့မှ လာသည့် သူများဖြစ်ပြီး တာချီလိတ်မြို့တွင်း ဟိုတယ် တခုတွင် တည်းခိုရာ မတ် ၁၅ ရက်က တရုတ်နိုင်ငံသားတဦးမှာ ကိုယ်ပူချိန် ၃၈ ဒီဂရီ စင်တီဂရိတ်ကျော်နေသဖြင့် တာချီလိတ်ဆေးရုံတွင် စောင့်ကြည့်လူနာအဖြစ် ထားရှိခဲ့ကြောင်းသိရသည်။
ကိုယ်အပူချိန်မြင့်မားသည့် တရုတ်နိုင်ငံသား ၁ဦးနှင့် ဟိုတယ်တွင် အတူနေထိုင်သည့် တရုတ်နိုင်ငံသား ၁ဦးကို ပါ ယနေ့ မတ် ၁၆ နေ့လည်ပိုင်းက တာချီလိတ်ခရိုင်ပြည်သူ့ ဆေးရုံ သီးသန့်စောင့်ကြည့် ကုသခန်း တွင် ထားရှိကြောင်း တာချီလိတ် ဆေးရုံအုပ်ကြီး ဒေါက်တာ ရွှေဝင်း က ပြောသည်။
“ COVID-19 စောင့်ကြည့်နေတာ တရုတ်နိုင်ငံသား ၂ဦးပါ။ သူတို့ကို သီးသန့်ထားထားပါတယ်။ ဓာတ်ခွဲခန်း အဖြေစောင့်နေပါတယ်” ဟု ဒေါက်တာ ရွှေဝင်း က ဆိုသည်။
အဆိုပါ တရုတ်နိုင်ငံသား ၂ဦးသည် တာချီလိတ်ဆေးရုံကြီးသို့ ခေါ်ဆောင်ရန် ပြုလုပ်နေစဉ် ငြင်းဆန်မှု များပြုလုပ်ခဲ့သေးကြောင်းသိရသည်။
ထို ၂ဦးသည် တရုတ်နိုင်ငံ ကူမင်းမြို့ မှ မတ် (၁၀) ရက်နေ့တွင် စတင်ထွက်ခွာလာပြီး မန်စီမြို့မှတဆင့် မန္တလေး မြို့သို့မတ် (၁၁)ရက်တွင် ရောက်ရှိခဲ့သည်။
ထိုမှ တဆင့် တာချီလိတ်မြို့ သို့ မတ်(၁၂)ရက် တွင်ရောက်ရှိခဲ့သည်။
ထို့ပြင် တရုတ်နိုင်ငံသား ၂ဦးကို ထိတွေ့ခဲ့သည့် ဟိုတယ်မှ ဝန်ထမ်းများကိုလည်း စောင့်ကြည့်နေရကြောင်း သိရသည်။
