လေပြင်းများ တိုက်ခတ်ခြင်း၊ လေပြင်းနှင့်အတူ ထစ်ချုန်းခြင်း၊ မိုးကြိုးပစ်ခြင်း ၊ လျှပ်စီးလက်ခြင်း ၊ မိုးသီး ကြွေခြင်းနှင့် နေရာကွက်ကျား မိုးထစ်ချုန်းရွာခြင်းစသည့် မိုးလေဝသဖြစ်စဉ်များ ဖြစ်ပေါ်နိုင်သောကြောင့် အထူးဂရုပြုနေထိုင်သွားရန် မိုးလေဝသနှင့် ဇလဗေဒညွှန်ကြား ရေးမှူးဦးစီးဌာန မှ မတ်လ(၁၅) ရက်နေ့က သတိပေးထုတ်ပြန် ထားကြောင်း သိရသည် ။

မြန်မာနိုင်ငံအရပ်ရပ်တွင် နွေကာလဖြစ်သည့် မတ်လနှင့်ဧပြီလများအတွင်း နေ့အပူချိန်များ တဖြည်းဖြည်း မြင့်တက်လာရာမှ အပူပျံတက်တိမ်များဖြစ်ထွန်း၍ မွန်းလွဲ/ည နေပိုင်းတို့တွင် မိုးတိမ်တောင်များဖြစ်ပေါ်နိုင်ပြီး အဆိုပါမိုးတိမ် တောင်များရွေ့လျားရာနေရာတစ်လျှောက်တွင် အဆိုပါကိစ္စရပ်များ ဖြစ်ပေါ်လာနိုင်ကြောင်း ထုတ်ပြန် ချက်များအရ သိရသည် ။

မတ်လ(၁၆) ရက်နေ့ မှစ၍ (၁၈) ရက်နေ့ အတွင်း သျှမ်းပြည်နယ်တွင် အနောက်ဘက်မှ ရွေ့လျားလာသော လေပွေလိုင်းများ၏ အရှိန်ကြောင့် နေရာကျဲကျဲ မိုးရွာနိုင်သွန်းနိုင် ကြောင်း ထုတ်ပြန်ထားပါသည် ။