လားရှိုးမြို့သို့ လာရောက်နေသည့် နိုင်ငံတော် အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည်အား ကန့်ကွက်စာများ နေရာ အနှံ့ ဖြန့်ဝေနေကြောင်းတွေ့ရသည်။
မတ်လ ၁၀ ရက် ယနေ့ မနက်ပိုင်းက လားရှိုးမြို့သို့ ဒေါ်အောင်ဆန်းစုကြည်ရောက်ရှိလာပြီး မြို့တော်ခန်းမတွင် လူထုနှင့်တွေ့ဆုံပွဲ ပြုလုပ်ကြောင်း သိရသည်။
လူထုတွေ့ဆုံပွဲ ပြုလုပ်နေချိန်အတွင်း ဒေါ်အောင်ဆန်းစုကြည်အား လက်မခံ အယုံအကြည်မရှိ ဟူသည့်စာများ လားရှိုးမြို့အနှံ့ ဖြန့်ဝေကြသည်။
ထိုကန့်ကွက်စာ တွင် “ WE NEVER BELIEVE NEO-NAZI MA MA!” “ အောင်ဆန်း ကတိ အောင်ဆန်း သမီးမတည်” “ ရက်ပေါင်း ၉၀ နေရုံနဲ့ မဲပေးခွင့် ဘယ်လဲဘာလဲ” အစရှိ ရေးသားထားကြသည်။
ခေတ်သစ်နာဇီ စနစ် ဖြင့် သျှမ်းပြည် ကို ပင်လယ်ပြင် မလုပ်ရန် ၊ သျှမ်းပြည် အတွင်းရေကာတာ တည်ဆောက်မှုများ ဆက်မလုပ်ရန် အစရှိသည်တို့လည်းရေးသားထားကြောင်းသိရသည်။
ကန့်ကွက်စာများကို လူသွားလာမှုများသည့် နန်းဟေဝန် ပန်ခြံလမ်း၊ လားရှိုးမြို့ ဝင် မုခ်ဦး၊ NLD ပါတီရုံးရှေ့နှင့် နားမခေါ် ယာဉ်ရပ်နားစခန်းတို့တွင် ဖြန့်ဝေထား သကဲ့သို့ လမ်းဘေး ဓာတ်တိုင်များတွင်လည်း ကပ်ထားကြကြောင်း ဒေသခံများကပြောသည်။
“ ကန့်ကွက်စာတွေ ကို လမ်းဘေး ဓာတ်တိုင်မှာ ကပ်ထားတာတွေ့ရတယ်။ နောက် နားမခေါ် ယာဉ်ရပ်နားစခန်းမှာတွေ့တယ်။ ဘယ်သူလာချသွားလဲတော့မသိဘူး။ ၉ နာရီကျော်က စမြင်တာ” ဟု လားရှိုးမြို့ ယာဉ်မောင်းတဦး က သျှမ်းသံတော်ဆင့် သို့ ပြောသည်။
လားရှိုးမြို့တော်ခန်းမတွင် လူထု တွေ့ဆုံ ပွဲ ၌ ဒေါ်အောင်ဆန်းစုကြည်က အဓိက အနေဖြင့် လုံခြုံရေး နှင့် လက်ရှိ ဖြစ်နေသည့် Novel Corona Virus (ခိုရိုနာ) အကြောင်း ကို ပြောကြားပြီး၊ တက်ရောက်လာသည့် ပြည်သူများ ၏ မေးမြန်းမှုကို ပြန်လည်ဖြေကြားသွားမည် ဟု သိရသည်။
၂၀၂၀ ရွေးကောက်ပွဲ ကာလလည်း နီးကပ်လာပြီ ဖြစ်သဖြင့် ရွေးကောက်ပွဲ မဲဆွယ် စည်းရုံးရေး ပြုလုပ်နေသည့် သဘော ရှိကြောင်း၊ ပြည်သူ့တွေ့ဆုံပွဲတွင်လည်း တိကျသည့် ပြောဆိုမှု မရှိကြောင်း လည်း လူထုတွေ့ဆုံပွဲ တက်ရောက်သူများထံက ပြောသည်။
“ အစကတည်းက တွေ့ဆုံပွဲ ဆွေးနွေးပွဲ မဟုတ်ဘူးလို့ သူတို့ ပြောပြီးသားပါ။ အခုက ၂၀၂၀ ရွေးကောက်ပွဲလည်းနီးတော့ မဲဆွယ်ခရီးလားလို့တောင် သံသယ ဖြစ်စရာရှိတယ်လို့” လူထု တွေ့ဆုံပွဲ တက်ရောက်သည့် စိုင်းအောင် က သျှမ်းသံတော်ဆင့် သို့ပြောသည်။
ဆက်လက်ပြီး လက်ရှိမှာ ကမ္ဘာတဝန်းလုံး စိုးရိမ်ထိတ်လန့်နေသည့် တရုတ်နိုင်ငံမှ စတင်ဖြစ်ပွားသည့် ခိုရိုနာ ဗိုင်းရပ်စ်ကြောင့် လူစုလူဝေးပွဲများမပြုလုပ်ရန်၊ မသွားရန် သက်ဆိုင်ရာ ကျန်းမာရေး နှင့် အားကစားဝန်ကြီးဌာန က ထုတ်ပြန်ကြေညာခဲ့သော်လည်း ဒေါ်အောင်ဆန်းစုကြည်သည် လူထု တွေ့ဆုံပွဲကို ကျင်းပနေသည်မှာ စဉ်းစားစရာဖြစ်ကြောင်းလည်း လားရှိုးပြည်သူများက ပြောဆိုလိုက်သည်။
“ လားရှိုးက တရုတ်ပြည်နဲ့နီးတယ်။ ခိုရိုနာ ကြောင့် လူစုလူဝေးတွေ မလုပ်ဖို့ ထုတ်ပြန်တယ်။ နိုင်ငံတော် အတိုင်ပင်ခံကိုယ်တိုင်က လူစုလူဝေး ပြုလုပ်တယ်ဆိုတော့ စဉ်းစားစရာပါပဲ” ဟု လားရှိုး ဒေသခံ နန်းနန်း က ဆိုသည်။
ယနေ့ ပြုလုပ်သည့် လူထု တွေ့ဆုံပွဲတွင် ခိုရိုနာ ဗိုင်းရပ်စ် (ဝူဟန်) ဖြစ်လာပါက လူထု အနေဖြင့် ပူးပေါင်းဆောင်ရွက်ရန် လည်း ဒေါ်အောင်ဆန်းစုကြည် ထည့်သွင်းပြောဆိုခဲ့သေးကြောင်း သိရသည်။