RCSS/SSA နှင့် အစိုးရတပ်မတော် တိုက်ပွဲကြောင့် စစ်ရှောင်ခဲ့ရသည့် မိုင်းကိုင်မြို့နယ် ကုန်းညောင်ဖာဆား ရွာလုံးကျွတ် ဖောက်ထွင်းခံခဲ့ရကြောင်း သတင်းရရှိသည်။
ဖေဖော်ဝါရီ ၂၇ ရက်မှ စတင်သည့် သျှမ်းပြည် ပြန်လည် ထူထောင်ရေး ကောင်စီ၊ သျှမ်းပြည်တပ်မတော် RCSS/SSA နှင့် အစိုးရ တပ်မတော်တို့ကြားတိုက်ပွဲကြောင့် မိုင်းကိုင်မြို့နယ် ဟမ်းငိုင်းကျေးရွာ အုပ်စုမှ ဒေသခံများ ထွက်ပြေးတိမ်းရှောင်ခဲ့ရသည်။ ထိုအနက် ဟမ်းငိုင်းအုပ်စုဝင် ကုန်းညောင်ဖာဆား ကျေးရွာသည် တိုက်ပွဲဒဏ်အထိ များသောရွာတရွာဖြစ်သည်။
မတ်လ ၁ ရက်က RCSS/SSA နှင့် အစိုးရ တပ်မတော် မှ ခေါင်းဆောင်များ ဆွေးနွေးမှုကြောင့် တိုက်ပွဲ ငြိမ်သက်ကာ စစ်ရှောင်များ မိမိနေရပ်သို့ပြန်ခဲ့ကြသည်။
“ စစ်ရှောင်တွေတော့ မရှိတော့ဘူး။ အားလုံး အိမ်ပြန်ပြီ။ အထိများတဲ့ ကုန်းညောင်ဖာဆား ကျေးရွာက အိမ်ခြေ ၄၀ ကျော်တယ်။ အိမ်တိုင်းနီးပါး ဖောက်ထွင်းခံရတယ်။ ဆုံးရှုံးမှု များတယ်။ ” ဟု မိုင်းကိုင်မြို့နယ် မဲဆန္ဒနယ် အမှတ်(၁) ပြည်နယ် လွှတ်တော်ကိုယ်စားလှယ် စိုင်းပန် က သျှမ်းသံတော်ဆင့် သို့ပြောသည်။
လက်ရှိ အချိန်ထိ ဆုံးရှုံးမှု တန်ဖိုးငွေ အတိအကျ မတွက်ချက်ရသေးကြောင်း၊ ဆုံးရှုံးမှု သိန်း ၁၀၀ အထက် ရှိနိုင်ကြောင်း စိုင်းပန် က ပြောသည်။
“ အိမ်ထဲမှာ ရှိတဲ့ ဓားတွေ၊ အဝတ်အစားကောင်းတွေပါ မကျန်ယူသွားတယ်။ ဆိုလာပြားလည်းယူတယ်” ဟု စိုင်းပန် က ပြောပြသည်။
ထို့ပြင် စားသောက်ကုန်များဖြစ်သည့် ဆန်၊ဆီ၊ ဆားအပြင် ခြံမွေး ကြက်ဝက်များကိုလည်း သတ်စား ကြောင်း သိရသည်။
“ ကြက်တွေသတ်စားထားပိုများတယ်။ နောက် ကုန်စုံဆိုင်ထဲက ဘီယာတွေ၊ အအေးတွေ ကြက်ဥတွေကတော့ မပြောပြနိုင်အောင်ပါပဲ” ဟု စိုင်းပန် က ထပ်လောင်းပြောသည်။
ကုန်းညောင်ဖာဆားရွာမှ အသက် ၄၀ ကျော် ဒေသခံတဦး က “ ကျနော်တို့အိမ်တွေ အားလုံး စစ်သားတွေ လာဖောက်တယ်။ အိမ်းတိုင်းလိုလို ဝင်မွှေထားတယ်။ မိန်းမ အဝတ်အစားတောင်မချန်ဘူး။ ယူသွားတယ်။ အစားအသောက်တွေလည်းယူသွားတယ်” ဟု သျှမ်းသံတော်ဆင့် ကို ပြောသည်။
ယနေ့အချိန်ထိ အစိုးရ တပ်မတော် မှ စစ်သားများသည် ကျေးရွာအတွင်း လှုပ်ရှားမှု ရှိနေသေးသဖြင့် ကျေးရွာ ပြည်သူများ စိုးရိမ်ထိတ်လှန့်နေသေးကြောင်း၊ စစ်ကြောင်းများ ကျေးရွာအနီး သွားလာ လှုပ်ရှားမှု မပြုလုပ်ရန်လည်း တောင်းဆိုချင်ကြောင်း ၎င်း က ပြောသည်။
တိုက်ပွဲဖြစ်ပွါးချိန်အတွင်း အစိုးရ တပ်မတော် စစ်ကြောင်းများသည် ကျေးရွာများအတွင်း ဝင်ရောက်တပ်စခန်း ချ နေထိုင်ပြီး ကျေးရွာ နေအိမ်များကို ဝင်ရောက်မွှေနှောက် ရှာဖွေ စားသောက်မှုကြောင့် ဆုံးရှုံးမှု စာရင်းကို ပြုစု ကာ သျှမ်းပြည်နယ် အစိုးရ နှင့် သက်ဆိုင်ရာ လူမှုကယ်ဆယ်ရေး နှင့် ပြန်လည် နေရာချထားရေး တို့ကို တင်ပြသွားမည် ဟုလည်း မိုင်းကိုင် အမှတ်(၁) ပြည်နယ် လွှတ်တော် ကိုယ်စားလှယ် က ပြောဆိုလိုက်သည်။
တိုက်ပွဲအတွင်း ဟမ်းငိုင်းကျေးရွာ အုပ်စု ရှိ ဟိုဖိုင်ကျေးရွာ ရှိနေအိမ်များလည်း ကျည်ထိမှန်ထားကြောင်း သိရသည်။
