သျှမ်းပြည် တောင်ပိုင်း မိုင်းကိုင်မြို့နယ်အတွင်း တိုက်ပွဲဖြစ်ပွားသည့် ဟမ်းငိုင်းကျေးရွာ အုပ်စု ရှိ (စစ်ဘေးရှောင်နေသည့်) ဒေသခံများ၏ နေအိမ် ကို တပ်မတော်၏စစ်ကြောင်းများက ဝင်ရောက် မွှေနှောက် ခဲ့ကြောင်း သတင်းရရှိသည်။

မတ်လ ၂ ရက် ယမန်နေ့က သျှမ်းပြည် ပြန်လည် ထူထောင်ရေးကောင်စီ၊ သျှမ်းပြည် တပ်မတော် (RCSS/SSA) နှင့် အစိုးရ တပ်မတော်တို့ ဟမ်းငိုင်းကျေးရွာ အုပ်စု ကုန်းညောင် ဖာဆား ကျေးရွာ အတွင်း တိုက်ပွဲဖြစ်ပွားခဲ့သည်။

တိုက်ပွဲကြောင့် ရွာသားများ ထွက်ပြေး တိမ်းရှောင်နေစဉ် အစိုးရ ၏ စစ်သားများသည် စစ်ရှောင်များ၏နေအိမ် တံခါးများ ရိုက်ချိုးပြီး ဝင်ရောက် မွှေနှောက် ရှာဖွေမှုများ ပြုလုပ်ခဲ့ကြောင်း နေရပ်ပြန် ကြည့်သည့်ရွာသားများပြောပြချက်အရသိရသည်။

၎င်းနှင့်ပတ်သက်ပြီး မိုင်းကိုင်မြို့ အမှတ်(၂) ပြည်နယ် လွှတ်တော် ကိုယ်စားလှယ် ဦးစိုင်းလုံ က သျှမ်းသံတော်ဆင့် အား “မနေ့က ညနေ ပိုင်း ရွာသားတွေပြန်သွားကြည့်တယ်။ စစ်ရှောင်တွေရဲ့နေအိမ် ၄ အိမ်လောက် ဖျက်ဆီး ခံထားရတယ်။ အိမ်တံခါးတွေ ရိုက်ချိုးထားတယ်။ ဘုရားစင်တွေ ဖျက်ဆီးထားတယ်။ အိမ်ထဲမှာလည်း ဝင်ပြီးမွှေနှောက်ထားတာတွေ့ရတယ်” ဟု ဦးစိုင်းလုံ က ဆိုသည်။

ကုန်းညောင် ဖာဆားရွာအတွင်း လက်နက်ကြီးများ ကျခြင်း၊ အိမ်ခေါင်မိုးများတွင် ကျည်ဆန်ဖောက်ဝင်သည့်အပေါက်များဖြစ်ပြီး ပျက်စီးနေခြင်း၊ နေအိမ် ထရံများလည်း ပေါက်ပြဲပျက်စီးနေခြင်း တို့ရှိခဲ့ကြောင်း ဦးစိုင်းလုံ က ဆက်လက်ပြောသည်။

ထို ကိစ္စနှင့် ပတ်သက်ပြီး ကုန်းညောင် ဖာဆား ကျေးရွာသား အသက် ၄၀ ကျော် အရွယ်အမျိုးသားတဦး က “ မနေ့ က ကျနော်တို့ရွာထဲကို တပ်က သေနတ်ပစ်ပြီး ဝင်လာတယ်။ နောက် ရွာထဲက အိမ် ၅လုံး ကို ဝင်ပြီး မွှေနှောက်ထားတယ်။ ဘုရားစင်တွေ ဗီဒိုတွေ ရိုက်ချိုး ဖျက်ဆီးထားတယ်။ နောက် ဆန်၊ဆီ၊ ဆား၊ ငရုပ်တွေ ယူသွားတယ်” ဟု သျှမ်းသံတော်ဆင့် သို့ပြောသည်။

နေရပ်ပြန်ကြည့်သည့်အဆိုပါရွာသားပြောပြချက်အရ နေအိမ်ခြံဝင်း၊ရွာလမ်းမကြီးများ၊ လယ်ကွင်းများအတွင်း လက်နက်ကြီးများ ကျရောက်ကြောင်း၊ ရွာတွင်လူသူမရှိသဖြင့် ထိခိုက်ဒဏ်ရာရမှုတော့မရှိကြောင်း ၎င်းက ဆိုသည်။

RCSS/SSA နှင့် အစိုးရ တပ်မတော်သည် ဟမ်းငိုင်းကျေးရွာ အုပ်စု အတွင်းရှိ လွိုင်တွမ်း တောင်ကြောဘက် တိုက်ပွဲများငြိမ်သွားပြီဖြစ်သော်လည်း လွိုင်တွမ်း တောင် အနောက်ဘက် ကုန်းညောင် ဖာဆား ကျေးရွာဘက် တွင် ပစ်ခတ်မှုများ ဆက်လက်ဖြစ်ပွားနေကြောင်း RCSS/SSA ပြောရေးဆိုခွင့်ရှိသူ စိုင်းခမ်းစံ က သျှမ်းသံတော်ဆင့် သို့ပြောသည်။

“ လွိုင်တွမ်း ဘက်ကတော့တိုက်ပွဲမဖြစ်တော့ဘူး။ ဒါပေမယ့် အဲ့ တောင် အနောက်ဘက် ကုန်းညောင်ဖာဆား ဘက်တော့ဖြစ်တယ်။ ထိတွေ့မှုတော့ရှိတယ်။ နောက် အစိုးရ တပ်က စစ်အင်အား အရမ်းဖြည့်လာတယ်” ဟု စိုင်းခမ်းစံ က ဆိုသည်။

မတ် ၃ ရက် ယနေ့အထိ အစိုးရ တပ်မတော် က လားရှိုးမှစစ်အင်အားများ မပြတ်တက်လာနေကြောင်းလည်း ဒေသတွင်းသတင်းများအရသိရသည်။

RCSS/SSA နှင့် အစိုးရ တပ်မတော်သည် ဖေဖော်ဝါရီ ၂၇ ရက်နေ့မှ စတင်ကာ ယနေ့ထိတိုင် တိုက်ပွဲများဖြစ်ပွားကာ မိုင်းကိုင်မြို့နယ် ဟမ်းငိုင်းကျေးရွာ အတွင်းရှိ ဘုန်းကြီးကျောင်း နှင့် ကျေးသီးမြို့နယ် အတွင်းရှိ ဘုန်းကြီးကျောင်းများတွင် စစ်ဘေးရှောင် ၅၀၀ နီးပါး ထွက်ပြေး တိမ်းရှောင်နေရသည်။