သျှမ်းပြည်တောင်ပိုင်း ကျေးသီး- မိုင်းနောင် ကားလမ်းကို ယနေ့ (မတ် ၂) ရက် နေ့လည် ၁နာရီ ခန့်တွင် တပ်မတော် က ပိတ်လိုက်ကြောင်း သတင်းရရှိသည်။
သျှမ်းပြည်တောင်ပိုင်း မိုင်းကိုင်မြို့နယ် အတွင်း ဖေဖော်ဝါရီ ၂၇ ရက် မှစတင်ကာ သျှမ်းပြည် ပြန်လည် ထူထောင်ရေး ကောင်စီ၊ သျှမ်းပြည်တပ်မတော်(RCSS/SSA)နှင့် အစိုးရ တပ်မတော်တို့ တိုက်ပွဲဖြစ်ပွားခဲ့သည်။
ထိုဖြစ်ပွားသည့် တိုက်ပွဲကြောင့် မိုင်းကိုင်မြို့နယ် အရှေ့ဘက် ကျေးသီးမြို့နယ် အထိ ဖြစ်ပွားသည်။
“ ဒီနေ့ နေ့လည် ၁နာရီ ကနေ စပြီး ကျေးသီး-မိုင်းနောင် ကားလမ်း ပိတ်လိုက်တာပါ။ ပိတ်တာက ခြေလျင်တပ်ရင်း (၁၃၁) ရှေ့ နဲ့ မိုင်းနောင် က ခြေလျင်တပ်ရင်း (၉ ) ဂိတ်ကို ပိတ်လိုက်တာ” ဟု ကျေးသီးမြို့နယ် ပြည်နယ် အမှတ်(၁) လွှတ်တော်ကိုယ်စားလှယ် စိုင်းစံမိဏ်း က သျှမ်းသံတော်ဆင့် သို့ ပြောသည်။
ကျေးသီးမြို့နယ် အတွင်းရှိ ခြေလျင်တပ်ရင်း (ခလရ ၁၃၁) ကို ညနေ ၅နာရီတွင် ပြန်လည် ဖွင့်ပေးသော်လည်း မိုင်းနောင်မြို့နယ်ရှိ ( ခလရ ၉ ) ရှေ့ ရှိဂိတ်ကို ပိတ်ထားဆဲ ဟု စိုင်းစံမိဏ်း က ပြောသည်။
“ ယနေ့ မနက်တုန်း က ကျေးသီး- မိုင်းနောင် မြို့နယ် ကြားရှိ မိုင်းတောင်နဲ့ နောင်စွမ်း ကြားမှာ တိုက်ပွဲ အသံ တချက်ထွက်တယ်” ဟု စိုင်းစံမိဏ်းက ဆိုသည်။
တပ်မတော် အနေဖြင့် နယ်မြေရှင်းလင်းရေး လုပ်မည် ဖြစ်ပြီး၊ တိုက်ပွဲဖြစ်လာပါက ဒေသခံပြည်သူများကို မထိခိုက်အောင် အသွားအလာ ပိတ်လိုက်ခြင်း ဖြစ်သည် ဟု သိရသည်။
RCSS/SSA နှင့် အစိုးရ တပ်မတော်သည့် မိုင်းကိုင်မြို့နယ် ဟမ်းငိုင်းကျေးရွာ အုပ်စု လွိုင်တွမ်းတောင်ကြော တလျောက် တိုက်ပွဲ ၃ရက်ကြာ ဖြစ်ပြီးနောက် မိုင်းကိုင်မြို့နယ် အရှေ့ဘက် ကျေးသီးမြို့နယ် သို့ စစ်ရှောင် ၂၆၀ ကျော် ထွက်ပြေးတိမ်းရှောင်ခဲ့သည်။