၅၈ နှစ်ကြာ ပျောက်ဆုံးခဲ့သည် သီပေါ စော်ဘွားစဝ်ကြာဆိုင် အတွက် အမှန်တရား ကို ပြန်လည် ဖော်ထုတ်နိုင်ရန် သီပေါမြို့ သျှမ်းကျောင်းသားလူငယ်များ ဆုတောင်းပွဲပြုလုပ်ခဲ့ကြသည်။

ယနေ့ မတ် ၂ရက်သည် စစ်အာဏာရှင် အာဏာသိမ်းခဲ့သည် မှာ နှစ်ပေါင်း ၅၈ နှစ် တိုင်ခဲ့ပြီဖြစ်ပြီး သီပေါ စော်ဘွား စဝ်ကြာဆိုင်လည်း ပျောက်ဆုံးခဲ့သည်မှာ ၅၈နှစ်ရှိခဲ့ပါပြီ။

စဝ်ကြာဆိုင် ပျောက်ဆုံးမှု သည် ယနေ့ထိတိုင် အဖြေမပေါ်ခဲ့ကြောင်း၊ စဝ်ကြာဆိုင် သေဆုံးခဲ့မှု၊ ပျောက်ဆုံးမှု ကို အမှန်တရား ပြန်လည် ဖော်ထုတ်ပေးရန် ရည်ရွယ်ပြီး သျှမ်း တက္ကသိုလ် ကျောင်းသား လူငယ်များ အဖွဲ့ က ယနေ့ သီပေါမြို့ လွယ်မုတ်တောင်ပေါ်ရှိ စော်ဘွားသင်္ချ ိုင်းတွင် ပြုလုပ်ခဲ့သည် ဟု နန်းမွေနွံလျန်း က သျှမ်းသံတော်ဆင့် သို့ ပြောသည်။

“ အဓိက သျှမ်းလူငယ်တွေ ကို သျှမ်းပြည်ရဲ့ သမိုင်းအမှန်တွေကို သိဖို့ပါ။ သီပေါစော်ဘွား စဝ်ကြာဆိုင် အတွက် အမှန်တရား ပေါ်ပေါက်ရေး နဲ့ နှစ်ပေါင်းများစွာ အာဏာရှင် လက်အောက်မှာ အမှောင်ဖုံးခံရတဲ့ သျှမ်းပြည်အတွက် ဆုတောင်းပေးတာပါ” ဟု ယနေ့ ဆုတောင်းပွဲ ပြုလုပ်ရတဲ့ အကြောင်းရင်းကို နန်းမွေနွံလျန်း က သျှမ်းသံတော်ဆင့် ကို ပြောသည်။

ပျောက်ဆုံးချိန်တွင် စဝ်ကြာဆိုင်သည် အသက် ၃၈ နှစ် အရွယ်သာရှိသေးပြီး၊ ထို ခေတ်ကာလတွင် သူသည် ဒေသ ခေါင်းဆောင် တဦးဖြစ်သကဲ့သို့ စော်ဘွား လည်း ဖြစ်သည်။

စော်ဘွား စဝ်ကြာဆိုင်၏ သတင်းကို ၅၈နှစ် ကြာအမှောင်ချ ခဲ့သည့် ကိစ္စ နှင့် ပတ်သက်ပြီး နန်းမွေနွံလျန်း က ” သူလိုလူတစ်ယောက်ကို ဗမာစစ်တပ် ဖမ်းဆီးပြီးလက်စဖျောက်ခဲ့တယ်။ စစ်အာဏာသိမ်းတဲ့နှစ်ပေါင်း ၅၈နှစ်အတွင်း ကျမတို့ သျှမ်းပြည်သူတွေ ဘယ်လောက်များ စစ်အာဏာရှင် စနစ်နဲ့ လူမျိုးကြီး ဝါဒရဲ့သားကောင်ဖြစ်ခဲ့ရပြီလဲ” ဆို တာ သျှမ်းသံတော်ဆင့်ကို ပြောဆိုသည်။

စဝ်ကြာဆိုင် အတွက် အမှန်တရားနှင့် တရားမျှတ မှု ကို တောင်းဆိုရန် သျှမ်းလူထု အသိုင်းအဝိုင်းများ အားလုံးပူးပေါင်း ပါဝင်တောင်းဆိုသင့်သည် ဟု သျှမ်း တက္ကသိုလ် လူငယ်များက ပြောသည်။

စဝ်ကြာဆိုင်သည် သီပေါနယ် ကို အုပ်ချုပ်ခဲ့သည့် နောက်ဆုံးစော်ဘွားဖြစ်ပြီး အိမ်ရှေ့စံ ဘဝတွင် အမေရိကန် နိုင်ငံ ကော်လိုရာဒို သတ္တုတွင်း ပညာသင်ကျောင်း၌ သတ္တုတွင်းတူးဖော်ရေး အင်ဂျင်နီယာ ပညာကို သင်ကြားခဲ့သည်။

ထိုကျောင်းမှ ကျောင်းသူ တဦးဖြစ်သည့် သြစတြီးယား နိုင်ငံသူ Inge Sargent ( မဟာဒေဝီ စဝ်သုစန္ဒီ) နှင့် လက်ထပ်ခဲ့သည်။

ထို့ပြင် မဟာဒေဝီ စဝ်သုစန္ဒီ ကိုယ်တိုင်ရေးသားထားသည့် “ Twilight Over Burma: My life as a Shan Princess” စာအုပ်ကို အခြေခံထားသည့် ဇာတ်ကားကို ၂၀၁၆ ခုနစ် ဇွန် ၁၄ ရက် လူ့အခွင့်အရေး၊ လူ့ဂုဏ်သိက္ခာ ရုပ်ရှင်ပွဲတော်တွင် တပ်မတော် ၏ ပုံရိပ်ကို ဆိုးဝါးစေသည့် အကြောင်းပြချက် ဖြင့် ပြသခွင့်မရခဲ့ပေ။

၁၉ ၆၂ခုနစ် မတ် ၂ရက် မနက် ၈ နာရီ ၂၅မိနစ်တွင် ကာကွယ်ရေး ဦးစီးချုပ် ဗိုလ်ချုပ်ကြီး နေဝင်း က “ ပြည်ထောင်စု “ အထူး ယိုယွင်းလာသော အခြေအနေဆိုးကို ထိန်းသိမ်း စိမ့်သော ငှာ ဗမာတပ်မတော် မှ တာဝန်ယူ စောင့်ရှောက်လိုက်ပြီး ဖြစ်ကြောင်း ” မြန်မာ့အသံ မှ တဆင့် တိုင်းပြည်ကို ပြောကြားခဲ့သည်။

ထို့နေ့တွင် သီပေါမြို့ စော်ဘွား စဝ်ကြာဆိုင် နှင့် အတူ သျှမ်းစော်ဘွား အမြောက်အများ လည်းပျောက်ဆုံးသည့်နေ့ ဖြစ်သလို ညောင်ရွှေ စော်ဘွား စဝ်ရွှေသိုက် ၏ သားတော် စဝ်ဆေဟုန်လည်း စစ်တပ် လက်ချက်ဖြင့် အသက် သေဆုံးခဲ့သည်။

ထိုနေ့သည် ပြည်ထောင်စု မပြိုကွဲရန် စစ်တပ် က အာဏာသိမ်း ကယ်တင် ခဲ့သော်လည်း တိုင်းရင်းသားများအတွက် ပြည်ထောင်စု ပြိုကွဲခဲ့သည့် ရက်တရက်ဖြစ်ခဲ့သည်။