သျှမ်းပြည်မြောက်ပိုင်း လားရှိုးမြို့အရှေ့ဘက်ကျေးလက်ဒေသခံများအပေါ် အစိုးရတပ်မတော်က လူ့အခွင် ့အရေးချိုးဖေါက်နေသည်ဟု သျှမ်းလူ့အခွင့်အရေးမဏ္ဍိုင် SHRF အစီရင်ခံစာ ထုတ်ပြန်ထားသည်။
ဖေဖေါ်ဝါရီလ ၂၄ ရက်နေ့ ရက်စွဲဖြင့် ထုတ်ပြန်သည့်အဆိုပါအစီရင်ခံစာတွင် အစိုးရ တပ်မတော်သည် ၄င်းတို့တပ်စခန်းတည်ဆောက်ရေးအတွက် လားရှိုးမြို့နယ် မိုင်းကျက်ကျေးရွာအုပ်စုဝင် ၁၁ ရွာ မှ ရွာသူရွာသား အယောက်တစ်ရာကျော်အားအဓမ္မ လုပ်အားခိုင်းစေသည့်အပြင် ဒေသခံများထံမှ သစ်များ၊ ၀ါးများ၊ သက်ကယ်များကိုပါတပ်ခြံကာဖို့အတွက်ဟုဆိုကာ ယူငင်သွားကြောင်း SHRF က ထုတ်ပြန်ကြေငြာထားသည်။
SHRF ပြောရေးဆိုခွင့်ရှိသူစိုင်းဟော်ဆိုင်က “ မြန်မာနိုင်ငံဟာ ဒီမိုကရေစီပြည်ထောင်စုနိုင်ငံဖြစ်ပြီဆို ပေမယ့် တောရွာမှာနေထိုင်တဲ့တိုင်းရင်းသားတွေတော့ ဘာကောင်းကျိုးမှမခံစားရသေးဘူး။ အစိုးရတပ်မတော်ရဲ့ လုပ်အားခိုင်းစေမှု လူ့အခွင့်အရေးကျူးလွန်မှုတွေကို ဆက်တိုက်ခံနေရတုန်း ပါပဲ။ ဒါကြောင့် ဒီကျူးလွန်တဲ့ စစ်တပ်တွေကို အရေးယူပေးဖို့ ဒီမိုကရေစီအစိုးရကြီးကို တောင်းဆိုချင်ပါတယ် ”- ဟု ပြောသည်။
အဆိုပါဒေသဘက်တွင် အစိုးရပ်တပ်မတော် စစ်သည်အင်အား ၃၀၀ ကျော် အခြေစိုက်လှုပ်ရှားနေကြောင်း၊ စစ်ဆင်မှု ကွပ်ကဲရေး စကခ ၁၀ လက်အောက်ခံတပ်ရင်းများ၊ ခမရ ၃၆၂၊ ၃၆၅ ၊ ၃၆၆ အပြင် တပ်မ ၁၁ ၊ ၈၈ လက်အောက်ခံ တပ်ရင်းများလည်း ရံဖန်ရံခါ လာရောက်လှုပ်ရှားကြောင်းသိရသည်။
“လမ်းဖေါက်တာတွေဘာတွေက ဟုတ်သေးတယ်။ အခု က တပ်စခန်းမှာ ခံတုတ်ကျင်းတူး ခိုင်းတာ၊ ခြံစည်းရိုးခတ်ခိုင်းတာ တွေတော့ ဒီခေတ်မှာ မဖြစ်သင့်တော့ဘူးလေ” – မိုးကျက်ရွာသူ ကလေးမိခင် နန်းအိန် က ပြောသည်။
တပ်စခန်းတည်ဆောက်မှု၊ လမ်းဖေါက်လုပ်မှုများသည် တပ်မတော်သားများအတွက်မဟုတ်ကြောင်း၊ ရွာသားများအတွက်သာဖြစ်ကြောင်း၊ တပ်စခန်း ဆောက်လုပ်နေမှုသည်လည်း ရွာသားများအတွက်လုံခြုံရေးသာဖြစ်ကြောင်း ရွာသားများအား ယခင်ပြောင်းရွေ့သွားသည့် တပ်မှူးက ပြောသည်။
အဆိုပါဒေသအတွင်း အစိုးရ တပ်မတော် တပ်စခန်းတည်ဆောက်မှု အင်အားတိုးချဲ့ချထားမှု များသည် မြောက်ပိုင်းမဟာမိတ်တပ်ဖွဲ့ဝင်များ ဖြတ်သန်းသွားလာမှု၊ မန္တလေး – လားရှိုး – မူစယ်လမ်း – တရုတ်ပြည်လမ်း၊ သိန္နီ-ကွန်လုံ-ချင်းရွှေဟော် – တရုတ်ပြည်စသည့် ပြည်ထောင်စုလမ်းမကြီးလမ်း၊ တရုတ်နိုင်ငံအားရောင်းချပေးရန် ကွန်လုံနောင်ဖာ သံလွင်ရေအားလျှပ်စစ်တည်ဆောက်ရေးများ ထိန်းသိမ်းနိုင်ရန်အတွက် ဖြစ်သည်ဟု SHRF က ထုတ်ပြန်ထားသည်။
(ယိင်းယိင်း ရေးသားပေးပို့သည်)
