သျှမ်းပြည်မြောက်ပိုင်း သီပေါမြို့နယ်အတွင်းရှိ မောက်တောင်းအုပ်စု မောက်တောင်းရွာ ဘုန်းကြီးကျောင်းအား မီးလောင်ရာတွင် ရှေးဟောင်းဘုရားဆင်းထုတော်များအပါအဝင် ကာလတန်ဖိုးကျပ်သိန်းပေါင်း ၂၀၀၀ ကျော်ခန့်ဆုံးရှုံးကြောင်းသိရသည်။
မတ်လ ၁၄ ရက် ည ၁၁ နာရီကျော်အချိန်က အဆိုပါဘုန်းကြီးကျောင်းအားမီးလောင်ကျွမ်းခဲ့ခြင်းဖြစ်ပြီး လူသူထိခိုက်ဒဏ်ရာရမှုတော့မရှိဟု ဆိုပါသည်။
သီပေါဒေသခံနန်းစမ်ခမ်းက – ကျောင်းထိုင်ဆရာတော်က ကျောင်းမှာမရှိဘူး။ ခမည်းတော်နေမကောင်းလို့ ရွာပြန်ပြုစုနေတာ ၃ ရက်ရှိပြီ။ ကိုယ်ရင်ငယ်လေးတွေဘဲရှိတယ်။ ဖယောင်းတိုင်မီးလို့ရွာခံတွေကပြောတယ်။ ကျောင်းက သစ်မာကြီးတွေနဲ့လုပ်ထားတာမို့လို့ ဆုံးရှုံးမှုတန်ဖိုးများတာ။ ရှေးဟောင်းပစ္စည်းတွေ ဗုဒ္ဓဆင်းထု တော်တွေ ဘာမှမရလိုက်ဘူး။ ကိုယ်ရင်ငယ်လေးတွေဖိနပ်တောင်မရလိုက်ဘူးလေ။ – ဟု သျှမ်းသံတော်ဆင့် အားပြောပြသည်။
လက်ရှိတွင် ကိုယ်ရင်ငယ်များမှာ ကျောင်းဝင်းအတွင်းရှိ ဇရပ်နှင့်သိမ်ကျောင်းများတွင် တည်းခိုနေထိုင်နေရသည်ဟုလည်းသိရသည်။
အဆိုပါ ရှေးဟောင်းကျောင်းကြီးမှာ သီပေါမြို့-လားရှိုးကားလမ်းမ ပေါ်၊ သီပေါမှ မိုင် ၄၀ ကျော်အကွာ၊ လားရှိုးမြို့နှင့် မိုင် ၂၀ ကျော်အကွာတွင်တည်ရှိပြီး မောက်တောင်းအုပ်စု ဟန်နားရွာနှင့် နမ့်မရွာအကြားတွင်တည်ရှိပါသည်။
အိပ်ချိန်မို့လို့ ကိုယ်ရင်ငယ်လေးတွေတောင် မနိုးဘူး။ ရွာသားတွေလာနိုးမှ လန့်ဖြန့်ထပြေးကြတယ်။ ရွာသားတွေနဲ့ လားရှိုးက မီးသတ်ကားတွေဝိုင်းကူ မီးငြိမ်းသတ်နိုင်လို့သာ ။ မဟုတ်ရင်မောက်တောင်းရွာ ထဲကူးရင်တော့ခက်ပြီလေ။ – ဟု ဆက်ပြောသည်။
မောက်တောင်းရွာရှိ ဘုန်းကြီးကျောင်းသည် ယခင်ကလည်း မီး ၂ ကြိမ်လောင်ကျွမ်းခဲ့ဖူးပြီဖြစ်ကြောင်း၊ ယခုတကြိမ်မီးလောင်ခြင်းမှာ အကြီးမားဆုံးလောင်ကျွမ်းမှုဖြစ်ပြီး ဆုံးရှုံးမှုတန်ဖိုးလည်းအကြီးမား ဆုံးဖြစ်ကြောင်းသိရပါသည်။
