နမ့်ပေါင်တွင် ပြာကျနေသည့် အလောင်း ၂လောင်း စစ်ဆေးနေဆဲ

0

သျှမ်းပြည် မြောက်ပိုင်း လားရှိုးမြို့ နမ့်ပေါင်မြို့နယ် အတွင်း မီးရှို့ခံရ သည့် အလောင်း ၂လောင်းတွေ့ရှိကြောင်း သတင်းရရှိသည်။

 

Photo by ဒေသခံ တဦး

ဖေဖော်ဝါရီ ၂၂ ရက်နေ့က နမ့်ပေါင်မြို့နယ်အတွင်း တောင်ယာ အကွက်တွင် အမည်မသိ အမျိုးသမီးငယ်အလောင်းတလောင်းနှင့် ပြာကျနေပြီဖြစ်သော အလောင်း တလောင်းတွေ့ရှိကာ သက်ဆိုင်ရာမှ ယမန်နေ့ ဖေဖော်ဝါရီ ၂၄ က လားရှိုးမြို့ ပြည်သူ့ဆေးရုံသို့ပို့ဆောင်ကာ စစ်ဆေးမှုပြုနေကြောင်း နမ့်ပေါင် ဒေသခံ စိုင်းထွေး က သျှမ်းသံတော်ဆင့် သို့ပြောသည်။

“ အလောင်း တလောင်းကတော့အမျိုးသမီး အလောင်းပါ။ အသားစတွေမြင်ရသေးတယ်။ အသက်ကတော့ ငယ်သေးတယ်။ နောက်တယောက် က ပြာကျသွားပြီ။ အမျိုးသားလား အမျိုးသမီး လားဆိုတာ မသိဘူး” ဟု စိုင်းထွေး က ပြောပြသည်။

အဆိုပါ မီးရှုှိ့ ခံရသည့် အလောင်း ၂လောင်း သည် နမ့်ပေါင်အနီးတဝိုက်တွင် နေထိုင် သူများမဖြစ်နိုင်ကြောင်း၊ ထိုမီးရှို့ခံရသည့်နေရာသည် နမ့်ပေါင် ဒေသခံများ သွားလာလေ့မရှိသည့်နေရာဖြစ်ကြောင်းလည်း နမ့်ပေါင် ဒေသခံများ ကပြောသည်။

“ နမ့်ပေါင် နဲ့အနီးတဝိုက်က လူတွေ မဖြစ်နိုင်ဘူး။ တကယ်လို့နမ့်ပေါင်က ဘယ်သူပျောက်လဲဆိုတာသိနိုင်တယ်လေ။ အခုက ဘာအသံမှ မကြားရ ဘူး။ သက်ဆိုင်ရာကတော့ စစ်ဆေးနေတယ်” ဟု နမ့်ပေါင် ဒေသခံ စိုင်းလှ က ပြောသည်။

ထိုသို့မီးရှို့လိုက်ခြင်းမှာ အလောင်းဖျောက်ချင်သည့်သဘောဖြစ်ကြောင်း၊ လက်ရှိမှာ ထို မီးရှို့ခံရသည့်အလောင်းသည် ပိုင်ရှင် မပေါ်သေးကြောင်းလည်း စိုင်းလှ က ပြောသည်။

ပြာကျသည့် အလောင်းနှင့် ပတ်သက်ပြီး နမ့်ပေါင် ရဲစခန်းကို ဆက်သွယ်မေးမြန်းရာ ပြန်လည်ဖြေကြားခြင်းမရှိပေ။

နမ့်ပေါင်သည် လားရှိုးမြို့ အရှေ့တောင်ဘက် ၂၀မိုင်ခန့် ဝေးကွာ ပါသည်။

Leave a Comments

SHARE