သျှမ်းပြည် မြောက်ပိုင်းလားရှိုးမြို့ ရှောင်လမ်း တွင် ကုန်တင်ကား တိမ်းမှောက်ကာ လူ ၂ဦးသေဆုံးခဲ့ကြောင်း သတင်းရရှိသည်။
ဖြစ်စဉ်မှာ ယနေ့ (ဖေဖော်ဝါရီ ၁၇ )ရက် မွန်လွဲ ၃နာရီ ခွဲကျော်တွင် ကုန်တင်ကားတိမ်းမှောက်မှုကြောင့် ယာဉ်မောင်း တဦး နှင့် ယာဉ်နောက်လိုက်တဦး ပွဲချင်းပြီး သေဆုံးခဲ့ကြောင်း လားရှိုးလူငယ်များ လူမှုကူညီရေး အသင်း မှ စိုင်းဝသုန်ထွန်း က သျှမ်းသံတော်ဆင့် သို့ ပြောသည်။
“ အခြေအနေ ဘယ်လို ကြောင့်ဆိုတာ တော့ အသေးစိတ်မသိရသေးဘူး။ ကျနော်တို့ ကားထဲကနေ ဆွဲထုတ်လာရတယ်။ ယာဉ်မောင်းနဲ့ယာဉ်နောက်လိုက်သေဆုံးတာတော့ အတည်ပြုလို့ရတယ်” ဟု စိုင်းဝသုန်ထွန်းက ဆိုသည်။
လက်ရှိမှာ ယာဉ်တိမ်းမှောက်မှုကြောင့် သေဆုံးသွားသည့် သူ ၂ဦး ကို လားရှိုးဆေးရုံ ရင်ခွဲရုံ သို့ ပို့ဆောင်ထားကြောင်းလည်း စိုင်းဝသုန်ထွန်း က ပြောသည်။
ထို ကုန်တင်ကား ယာဉ်တိမ်းမှောက်မှုသည် ကားဘရိတ်ပေါက်ရာမှ စတင်ဖြစ်ပွားကြောင်း၊ ထိုကုန်တင်ကားသည် မူဆယ်ဘက်မှ လာသည့် ကားဖြစ်ပြီး၊ အထည်လိပ်များတင်လာကြောင်းလည်း လူမှုကွန်ရက်စာမျက်နှာတွင် ရေးသားထားသည် ကို တွေ့ရသည်။
