သျှမ်းပြည် တောင်ပိုင်း ပင်လုံမြို့ တွင် ယမန်နေ့ ည ၉ နာရီ ကျော်၌ ရဲစခန်း ဝန်ထမ်း တန်းလျား မီးလောင်မှု ဖြစ်ပွားခဲ့ကြောင်း သတင်းရရှိသည်။
ဖြစ်စဉ်မှာ ယမန်နေ့ ညနေ (၉ နာရီ ၁၅ )မှ စကာ ပင်လုံမြို့ ရဲစခန်း ဝန်ထမ်း တန်းလျား တွင် ဝါယာရှော့ကြောင့် မီးလောင်မှုဖြစ်ပွားခဲ့ပြီး၊ ထို မီးလောင်မှုကြောင့် ရဲဝန်ထမ်းတန်းလျား ၂ဆောင် လောင်ကျွမ်းခဲ့ကြောင်း ပင်လုံ ဒေသခံ စိုင်းအိုက် က သျှမ်းသံတော်ဆင့် သို့ ပြောသည်။
“ မနေ့က မီးတော်တော်လောင်တယ်။ ရဲဝန်ထမ်း တန်းလျား ၂ဆောင် ဘာပစ္စည်းမှ ပြန်မရဘူး။ ဆုံးရှုံးမှုကတော့များတယ်။ လူထိခိုက်တာမရှိဘူး။ ရဲစခန်း ထဲက အကျဉ်းထောင်ကျနေတဲ့သူတွေလည်း ထိခိုက်တာ မရှိဘူး” ဟု စိုင်းအိုက် က ဆိုသည်။
ပင်လုံ ရဲစခန်း ဝန်ထမ်း တန်းလျား မီးလောင်မှုသည် တချိန်တနာရီကျော် ကြာမြင့်ကာ၊ ည ၁၁နာရီ ဝန်းကျင်တွင် မီးငြိမ်းသွားကြောင်း၊ မီးလောင်မှု အရှိန်မြင့်သဖြင့် လွိုင်လင်မီးသတ်လာရောက်ကူညီငြိမ်းသတ် ကြောင်း လည်း စိုင်းအိုက် ပြောပြသည်။
ထို ပင်လုံ ရဲစခန်း ဝန်ထမ်း တန်းလျား မီးလောင်မှု နှင့် ပတ်သက်ပြီး ဆုံးရှုံးမှု တန်ဖိုးငွေ မသိရှိရသေးကြောင်း၊ ရဲစခန်းမှလည်း ဖြေကြားပေးခြင်းမရှိပေ။
Leave a Comments