သျှမ်းပြည် မြောက်ပိုင်း ကျောက်မဲမြို့နယ် မိုင်းတင်းကျေးရွာ အုပ်စုတွင် အရပ်သား တဦး သေနတ်ပစ်သတ် ခံရကြောင်း သတင်းရရှိသည်။

ဖြစ်စဉ်မှာ ယနေ့ (ဖေဖော်ဝါရီ ၁၃) ရက် မနက်ပိုင်းတွင် မိုင်းတင်းကျေးရွာ အုပ်စု မန်ဆန်းကျေးရွာ အသက် ၃၀ကျော် စိုင်းကောထို့ သည်မနက် ၈နာရီ ဝန်းကျင်တွင် ခြံသွားရာ အမည်မသိ လက်နက်ကိုင် အဖွဲ့ က သေနတ်ဖြင့်လာရောက်ပစ်ကြောင်း ကျောက်မဲမြို့ ပြည်နယ် လွှတ်တော် အမတ် (၁) စိုင်းထွန်းဝင်း က သျှမ်းသံတော်ဆင့် သို့ ပြောသည်။

“ စိုင်းကောထို့ က မနက် အစောကြီး ခြံသွားတယ်။ အဲ့မှာ ပစ်သတ်ခံရတာပဲ။ ရွာကလူတွေ ပြောပြချက်အရတော့ သေနတ်သံမကြားရဘူး။ ရွာသားတွေ သူတို့ ခြံသွားတဲ့အချိန်မှာ စိုင်းကောထို့သေနတ်ပစ်ခံရတဲ့ အလောင်းကို သွားတွေ့တာ” ဟု စိုင်းထွန်းဝင်း က ဆိုသည်။

လက်ရှိ သေနတ်ပစ်ခံသူ၏ ရုပ်အလောင်း ကို ကျောက်မဲမြို့ ပြည်သူ့ဆေးရုံ သို့ ပို့ဆောင်ထားကြောင်း၊ စိုင်းကောထို့သည် သာမာန် အရပ်သားဖြစ်ကြောင်း လည်း စိုင်းထွန်းဝင်း က ပြောပြသည်။

ဆက်လက်ပြီး ကျောက်မဲမြို့နယ် အတွင်း လက်နက်ကိုင် ပေါင်းစုံ လှုပ်ရှားသွားလာသည့်နေရာဖြစ်သည့်အတွက် ညွှန်ပြပြောဆိုရန် ခက်ခဲကြောင်း၊ ကျောက်မဲမြို့သည် တရားဥပဒေ စိုးမိုးမှု မရှိကြောင်း လည်း စိုင်းထွန်းဝင်း က ထောက်ပြ ပြောဆိုလိုက်သည်။

“အခုနောက်ပိုင်း အရမ်းကြောက်ဖို့ ကောင်းလာတယ်။ လူထုလုံခြုံရေး မရှိတော့ဘူး။ လူထုကိုပဲဘာကြောင့်လာလာပစ်လဲ စဉ်းစားစရာဖြစ်နေတယ်” ဟု မိုင်းတင်းကျေးရွာ မှ ဒေသခံ လုံးစိုင်းလှ က သျှမ်းသံတော်ဆင့် သို့ ပြောသည်။

မိုင်းတင်းကျေးရွာ အုပ်စုတွင်နေထိုင်သည့် အမျိုးသားများ မကြာခဏ သေနတ်ပစ်ခံနေရကြောင်း၊ သေနတ်ပစ်သွားသည့် တရားခံလည်း တကြိမ်မျှ မဖမ်းမိကြောင်း၊ မိုင်းတင်းနေထိုင်သည့် သူများအတွက် လုံခြုံရေး လုံးဝ မရှိကြောင်းလည်း လုံးစိုင်းလှ က ပြောသည်။

လွန်ခဲ့သည့် ၂၀၁၉ ခုနှစ် နိုဝင်ဘာ ၃ရက် တွင် ကျောက်မဲမြို့ စားသောက်ဆိုင် တခုတွင် မိုင်းတင်းကျေးရွာအုပ်စု အုပ်ချုပ်ရေးမှူး နှင့် ကျေးရွာ အုပ်ချုပ်ရေးမှူး ၂ဦး သေနတ်ပစ်ခံရပြီး၊ ဒီဇင်ဘာ ၂၃ရက်တွင်လည်း မိုင်းတင်းကျေးရွာအုပ်စု မှ ပြည်ခိုင်ဖြိုးပါတီ ကော်မတီဝင် အမျိုးသားတဦးလည်း သေနတ်ပစ်သတ်ခံရကြောင်း သိရသည်။

ထို့ပြင် ယခုနှစ် ဇန်နဝါရီ (၂၂)ရက်တွင် မိုင်းတင်းကျေးရွာ အုပ်စု ရပ်ကျေး စာရေး အမျိုးသားတဦးလည်း သေနတ်ထပ်မံ ပစ်ခံ ခဲ့ရကြောင်း သိရသည်။