မြန်မာ- တရုတ် နယ်စပ် မူဆယ် ကုန်သွယ်ရေးသည် ယနေ့ထိ အေးနေသေးကြောင်း သတင်းရရှိသည်။
တရုတ်နိုင်ငံ ဝူဟန်မြို့ မှ စတင်ဖြစ်ပွားသည့် Novel Corona Virus (နိုဗယ် ခိုရိုနာ ဗိုင်းရပ်စ်) ကူးစက်မြန် အဆုတ်ရောဂါ ဖြစ်ပွားမှု ကြောင့် ယနေ့ထိ ကုန်သွယ်ရေး အဆင်မပြေသေးကြောင်း၊ အရောင်းအဝယ်ခက်လာကြောင်း သစ်သီးဝလံ ရောင်းဝယ်ရေး ကုန်စည်ဒိုင် မှ ဥက္ကဌ စိုင်းခမ်းမောင် က ပြောသည်။
“ အခု ထိ အရောင်းအဝယ်အရမ်းခက်တယ်။ ပိုဆိုးလာတယ်။ ဖေဖော်ဝါရီ ၁၀ရက်နောက်ပိုင်းကောင်းမယ်လို့ ထင်တာ မကောင်းလာဘူး” ဟု စိုင်းခင်မောင်က ဆိုသည်။
တရုတ်နိုင်ငံသားများသည် မူဆယ်မြို့ သို့ လာရောက်ပြီး အရည်အသွေးကောင်းမွန်သည့် အသီးကို ဝယ်ယူသော်လည်း ဈေးမပေးကြကြောင်း စိုင်းခင်မောင်က ပြောသည်။
“ အရည်အသွေးကောင်းတာ ရွေးသွားတယ်။ အကောင်းတော့လိုချင်တယ်။ ဈေးနှုန်းကျတော့ နှိမ်ထားတယ် ။ ကျနော်တို့ အသီးသမားတွ အရမ်းရှုံးတယ်” ဟု စိုင်းခင်မောင်က ဆက်လက်ပြောသည်။
တရုတ်ပြည်တွင် ယနေ့တိုင် စက်ရုံများ၊ ဈေးများ မရှိသေးသော်လည်း မြန်မာပြည်မှ ရွှေ့ပြောင်းအလုပ်သမားများသည် တရုတ်ပြည်သို့ နေ့စဉ် ဝင်ရောက်ပြီး အလုပ်အကိုင် သွားရောက်ရှာဖွေနေကြကြောင်း၊ တရုတ်တွင် ပြန့်ပွားနေသည့် ခိုရိုနာ ဗိုင်းရပ်စ်ကိုကြောက်စိတ်မရှိဘဲ သွားရောက်အလုပ်လုပ်နေကြကြောင်းလည်း မူဆယ် ဒေသခံများ က ပြောသည်။
“တရုတ်ပြည်ကို လူတွေကတော့ နေ့တိုင်းဝင်၊ထွက် နေကြတာပဲ။ တရက်ကို လူ၈ထောင်ကနေ ၁သောင်းထိရှိတယ်” ဟု မူဆယ်မြို့ ပြည်နယ် လွှတ်တော် အမှတ်(၁) စိုင်းကျော်သိန်း က သျှမ်းသံတော်ဆင့် သို့ ပြောသည်။
တရုတ်ပြည်ဘက် စက်ရုံများသည် ဖေဖော်ဝါရီ (၉ ) ရက်တွင် ပြန်လည်ဖွင့်လှစ်မည် ဟုပြောဆိုထားသော်လည်း လက်ရှိအချိန်ထိ မဖွင့်သေးကြောင်း စိုင်းကျော်သိန်း က ပြောသည်။
“ ကျနော်တို့ပြည်သူတွေက ကြောက်စိတ်ထက် ဗိုက် က ပိုအရေးကြီးနေတယ်။ သတင်းတွေ နားမထောင်ဘဲ ဝင်ကြတယ်။ ဟိုဘက်မှာ အလုပ်မရှိတော့ မောင်းထုတ်ခံရပြီး ပြန်လာတဲ့သူတွေလည်းရှိတယ်” ဟု စိုင်းခင်မောင် က ထပ်လောင်းဖြည့်စွတ်ပြောသည်။
တရုတ်နိုင်ငံ ဝူဟန်မြို့ မှ စတင်ဖြစ်ပွားသည့် ခိုရိုနာ ဗိုင်းရပ်စ် ကူးစက်မြန် အဆုတ်ရောဂါသည် ကမ္ဘာ့ နိုင်ငံပေါင်း ၂၈ နိုင်ငံ ကူးစက်ခံရသူ ၄၅၁၇၂ဦး ရှိပြီး၊ သေဆုံးသူ ၁၁၁၅ဦး ရှိလာကာ ပြန်လည်နေကောင်းလာသူ ၄၇၇၄ ဦးရှိကြောင်း သိရသည်။
Leave a Comments