သျှမ်းပြည်မြောက်ပိုင်း မူဆယ်မြို့ တွင် တရုတ်နိုင်ငံသားတဦး သေဆုံးခဲ့ကြောင်း သတင်းရရှိသည်။

အဆိုပါ သေဆုံးသည့် တရုတ်နိုင်ငံသား ၏ အရိုးပြာ ကို သေဆုံးသူ၏ ဆွေမျိုးထံ ယမန်နေ့ တွင် လွှဲပေးခဲ့ကြောင်း မူဆယ်မြို့ ဂရုဏာလူမှုကူညီရေးအသင်းမှ ဦးသောင်းထွန်း က ပြောသည်။

“ နယ်စပ်ဒေသ ဖြစ်တော့ အဖွဲ့အစည်းပေါင်းစုံနဲ့ ဆက်စပ်နေတယ်။ ဆေးရုံရဲ့ ဆေးစစ်ချက် ကတော့ တာ့ နှလုံးရောဂါနဲ့ အဆုတ်ရောင်လို့သတ်မှတ်တယ်။ အဆုတ် TB ရောဂါလို့ သတ်မှတ်တယ်” ဟု ဦးသောင်းထွန်း ကပြောသည်။

ထို သေဆုံးသည့် တရုတ်နိုင်ငံသားသည် တရုတ်နိုင်ငံမည်သည့်မြို့တွင် နေထိုင်သည် ကို မသိရှိကြောင်း ဦးသောင်းထွန်း က ဆက်လက်ပြောသည်။

အဆိုပါ ဖြစ်စဉ်သည် လွန်ခဲ့သည့် ၄ရက်နေ့ တွင်ဖြစ်ပွားခဲ့ကာ သေဆုံးသူ၏ အရိုးပြာအိုး ကို ယမန်နေ့ (ဖေဖော်ဝါရီ ၅)ရက်နေ့တွင် ပြန်လည်လွှဲအပ်ပေးခဲ့ကြောင်းသိရသည်။

တရုတ်နိုင်ငံသား မူဆယ်မြို့ပြည်သူ့ဆေးရုံတွင် လာရောက်သေဆုံးမှု နှင့် ပတ်သက်ပြီး မူဆယ်မြို့ ဆေးရုံအုပ်ကို သျှမ်းသံတော်ဆင့် က ကြိုးစားဆက်သွယ်မေးမြန်းသော်လည်း မရခဲ့ပေ။

ထို့ပြင် တရုတ်နိုင်ငံ အစိုးရ မှလည်း တရုတ်နိုင်ငံတွင် လက်တလော အရေးပေါ် ဖြစ်ပွားနေသည့် Novel Corona Virus (နိုဗယ်လ် ခိုရိုနာ ဗိုင်းရပ်စ်) ကူးစက်ခံရသည့် တရုတ်နိုင်ငံသား ၅ဦး တရုတ်- မြန်မာနယ်စပ် မူဆယ်မြိုထဲသို့ရောက်ရှိနေသည့် ဟု ထုတ်ပြန်ကြေညာထားသည်။

ထို ကူးစက်ခံရသူ ၅ဦးသည် ဝူဟန်မြို့ မှ တရုတ်နိုင်ငံသား ၅ဦး သည် ရွှေလီသို့ ရောက်လာပြီး၊ ရွှေလီမြို့ မှတဆင့် မူဆယ်မြို့သို့ ရောက်ရှိနေသဖြင့် တွေ့ရှိပါက တရုတ်နိုင်ငံဘက်သို့ အကြောင်းကြားပေးရန် နှင့် မတွေ့ရှိ မီ ရောဂါကူးစက်မခံရစေရန် ဂရုစိုက်ကြရန် လည်း တရုတ်အစိုးရ က မြန်မာနိုင်ငံ မူဆယ်မြို့ရဲဌာနကို အကြောင်းကြားထားသည်။