တရုတ်- မြန်မာ နယ်စပ် ကုန်သွယ်ရေး သည် ယခုလ လယ်ပိုင်း ပုံမှန် ရောင်းဝယ်ပြန်ဖြစ်လာမည်ဟု သစ်သီးကုန်သည်များ မျှော်လင့်နေကြောင်း သတင်းရရှိသည်။

တရုတ်နိုင်ငံ ဝူဟန်မြို့ မှ စတင်ဖြစ်ပွားသည့် Novel Corona Virus ( နိုဗယ် ခိုရိုနာ ဗိုင်းရပ်စ်) ကူးစက်မြန် အဆုတ်ရောဂါ ဖြစ်ပွားမှုကြောင့် တရုတ်နယ်စပ်တလျောက် အရောင်းအဝယ် လျော့ကျလာခဲ့သည်။

ထိုရောဂါကြောင့် တရုတ်ပြည်မကြီးမှ နယ်စပ်ကိုလာရောက်ပြီး ကုန်စည်ပစ္စည်းများ ဝယ်ယူမှုမရှိသလောက်နည်းပါး သဖြင့် သစ်သီးကုန်သည်များ အရှုံးများဖြင့် ရင်ဆိုင်ခဲ့ရသည် ဟု သစ်သီးကုန်စည်ဒိုင် ဥက္ကဌ ဦးခင်မောင် က သျှမ်းသံတော်ဆင့် သို့ ပြောသည်။

“ နယ်စပ်ကုန်သွယ်ရေး က မပိတ်ဘူး။ ဒါပေမယ့် တရုတ်တွေက နယ်စပ်ကို ဆင်းပြီး လာမဝယ်တာ။ အခုရက်ပိုင်းတော့ လာဝယ်သူနည်းနည်းပဲရှိတယ်။ ဒီလ ၁၀ရက်နောက်ပိုင်းမှာ ဝယ်သူတွေ ပိုများလာမယ်။ တရုတ်ပြည်ကနေ ၁၀၀ယောက် ဆင်းလာမယ်လို့ ပြောတယ်” ဟု ဦးခင်မောင်က ဆိုသည်။

သစ်သီးရောင်းဝယ်မှုသည် နေ့စဉ် ရှိသေးသော်လည်း တရက်လျှင် တရုတ်ကုန်သည်များ လာရောက်ဝယ်ယူခြင်းမရှိ သလောက် နည်းပါးနေ သဖြင့် သစ်သီးကုန်သည်များ ၇၀ ရာခိုင်နှုန်း အရှုံးပေါ်ခဲ့ကြောင်းလည်း ဦးခင်မောင် က ပြောသည်။

“ သစ်သီးတွေဆိုတော့ ကားခလည်းရှုံး အသီးလည်း ရှုံးတယ်။ အရှုံးကတော့ များတယ်” ဟု ဦးခင်မောင် က ဖြည့်စွတ်ပြောသည်။

တရုတ်နယ်စပ် တလျောက် မူဆယ်ခရိုင်အတွင်း တရုတ်နိုင်ငံ တွင် အရေးပေါ် ဖြစ်ပွားနေသည့် ခိုရိုနာ ဗိုင်းရပ်စ်ကြောင့် အရောင်းအဝယ်ကျဆင်းမှု၊ စီးပွားရေး ရပ်ဆိုင်းမှုဖြစ်နေရကြောင်း သတင်းရရှိသည်။

တရုတ်နိုင်ငံ ဝူဟန်မြို့ မှ စတင်ဖြစ်ပွားသည့် ခိုရိုနာ ဗိုင်းရပ်စ် ကူးစက်မြန်အဆုတ်ရောဂါသည် ကမ္ဘာ့ နိုင်ငံပေါင်း ၂၈နိုင်ငံ ကူးစက်ခံရသူ ၂၈၃၃၉ ဦးရှိပြီး သေဆုံးသူ ၅၆၅ဦး ရှိလာကာ ပြန်လည်နေကောင်းလာသူ ၁၂၀၈ဦး ရှိကြောင်း သိရသည်။