သျှမ်းပြည် မြောက်ပိုင်း မုံးကိုးမြို့တွင် မြန်မာ့တပ်မတော်ထံ လက်နက်ကိုင်တပ်ဖွဲ့တဖွဲ့မှ လက်နက်ချသည်ဟူသည့်သတင်းမှာ မိမိတို့ကချင်လွတ်မြောက်ရေး တပ်မတော် (KIA) အဖွ့ဲဝင်များ မဟုတ်ကြောင်း KIA ပြန်ကြားရေးကပြောဆိုလိုက်သည်။

ဇန်နဝါရီ ၃၀ ရက် တွင် သျှမ်းပြည် (မြောက်ပိုင်း) မုံးကိုးမြို့နယ် အတွင်း နယ်မြေလုံခြုံရေး ဆောင်ရွက်နေသည့် တပ်မတော် စခန်းသို့ KIA အဖွဲ့မှ ဗိုလ်ကြီးအဆင့် ရှိသူ (၃) ဦး အပါအဝင် ၂၁ ဦးသည် လက်နက်မျိုးစုံ ၁၀လက်၊ ကျည်မျိုးစုံ ၁၂၈ တောင့်၊ ကျည်အိမ်မျိုးစုံ ၉ ခု နှင့် အတူ ဥပဒေ ဘောင် အတွင်းသို့ ဝင်ရောက်ခဲ့ကြောင်း တပ်မတော် ကာကွယ်ရေး ဦးစီးချုပ်ရုံးက ထုတ်ပြန်ကြေငြာထားသည်။

ထို KIA အဖွ့ဲဝင် ၂၁ ဦး သည် ဥပဒေဘောင် အတွင်း ငြိမ်းချမ်းစွာ နေထိုင်လိုခြင်း၊ ထာဝရ ငြိမ်းချမ်းရေး ရရှိရန် အမှန်တကယ် ဆန္ဒရှိလာခြင်း၊ တပ်မတော်၏ ငြိမ်းချမ်းရေး လုပ်ငန်းစဉ်များ အားယုံကြည် လက်ခံခြင်းတို့ ကြောင့် လက်နက်ကိုင် လမ်းစဉ်အား စွန့်လွှတ်ပြီး ဥပဒေ ဘောင်အတွင်းသို့ဝင်ရောက်လာခဲ့ခြင်းဖြစ်သည် ဟု ထုတ်ဖော်ချက်တွင် ဖော်ပြထားသည်။

အဆိုပါ ကိစ္စနှင့် ပတ်သက်ပြီး KIA မှ သတင်းနှင့် ပြန်ကြားရေး ဌာန ဗိုလ်မှူးကြီး နော်ဘူ က “ သတင်းမှန် က ထုတ်ပြန်ထားတဲ့ KIA ၂၁ ယောက် အလင်းဝင်တယ်ဆိုတဲ့သတင်း လုံးဝ မမှန်ကန်ပါဘူး။ ကျနော်တို့တပ်ဖွဲ့ဝင်တွေ မဟုတ်ပါဘူး ” ဟု သျှမ်းသံတော်ဆင့် သို့ပြောသည်။

တပ်မတော် ကာကွယ်ရေး ဦးစီးချုပ်ရုံးတွင် ထုတ်ပြန်ထားသည့် KIA တပ်သား ၂၁ ဦးသည် KIA တပ်ဖွဲ့ နှင့် ဆက်စပ်မှု လုံးဝမရှိကြောင်း၊ လုပ်ကြံပြီး သတင်းလွှင့်ထားကြောင်း ဗိုလ်မှူးကြီး နော်ဘူ က ပြောသည်။

“ ကျနော် သိရသလောက်တော့ မုံးကိုးမှာ ပြည်သူ့စစ် အသစ်ဖွဲ့ချင်တဲ့ပုဂ္ဂိုလ် တယောက် ရှိတယ်။ ပြည်သူ့စစ် ဖွဲ့ရင် တပ်သားအင်အား ၆၀ အနည်းဆုံးရှိရမယ်။ လူသစ်စုဆောင်းနေတယ်လို့ကြားတယ် ” ဟု ဗိုလ်မှူးကြီး နော်ဘူ က ရှင်းပြသည်။

မုံးကိုးမြို့နယ် အတွင်း KIA တပ်ရင်း ၃၆ လှုပ်ရှားနေကြောင်းလည်း သိရသည်။

မုံးကိုးမြို့ တွင် လွန်ခဲ့သည့် ၂၀၁၆ ခုနှစ် အတွင်း KIA နှင့် မြန်မာ့တပ်မတော် တို့ တိုက်ပွဲဖြစ်ပွားကာ ဒေသခံပြည်သူများစွာ ထိခိုက်သေဆုံးခဲ့ပြီး၊ ဘုရားကျောင်းများ၊ လူနေအိမ်များနှင့် စာသင်ကျောင်းများ ပျက်စီးခဲ့သည့်နေရာ ဖြစ်သည်။
ထိုနေရာတဝိုက်တွင် မြန်မာ့တပ်မတော်၊ KIA တပ်ဖွဲ့ နှင့် ပြည်သူ့စစ်များ လှုပ်ရှားသည့်နေရာ လည်းဖြစ်သည်။