သျှမ်းပြည် မြောက်ပိုင်း ကျောက်မဲမြို့နယ် အတွင်း အရပ်သားများ ရက်ဆက်တိုက် မိုင်းနင်းမိနေကြောင်း သတင်းရရှိသည်။

ယမန်နေ့ ညနေ ၄ နာရီ ဝန်းကျင်တွင် ကျောက်မဲမြို့နယ် အာပြောင်ကျေးရွာ ဒေသခံ အမျိုးသား ၃ဦးသည် ထင်ခုတ်ပြီး နေအိမ်ကို ဆိုင်ကယ်ဖြင့် အပြန် မိုင်းနင်းမိကာ ၃ဦး ဒဏ်ရာရရှိခဲ့ကြောင်း အိုမ်တမာဝ် လူမှုကူညီရေးအသင်း မွ မိုင်းအဘမ်း က သျှမ်းသံတော်ဆင့် သို့ ပြောသည်။

“ မိုင်းထိတာ ၃ဦးပါ။ တယောက်က ခြေတလုံး၊ ပါး၊ လက်ချောင်းတွေထိတယ်။ နောက် တယောက်က ပေါင်၊ ခြေတလုံးတွေထိတယ်။ နောက်တယောက်က ဗိုက်ထိတယ်” ဟု မိုင်းအဘမ်း ကဆိုသည်။

အဆိုပါ မိုင်းထိမှန်သည့် အမျိုးသား ၃ဦးသည် အသက် ၂၅ နှစ် အထက် အရွယ်များဖြစ်ကြပြီး၊ ထိုသူ ၃ဦးသည် လက်ရှိ မှာ ကျောက်မဲမြို့ ပြည်သူ့ဆေးရုံတွင် ဆေးကုသခံနေရကြောင်း သိရသည်။

ကျောက်မဲမြို့နယ်တွင် တအာင်း (ပလောင်) အမျိုးသားလွတ်မြောက်ရေး တပ်မတော်(TNLA )၊ သျှမ်းပြည် ပြန်လည်ထူထောင်ရေး ကောင်စီ၊ သျှမ်းပြည်တပ်မတော်( RCSS/SSA) နှင့် မြန်မာ့တပ်မတော်တို့ လှုပ်ရှားသည့်ဒေသဖြစ်သည်။

ထိုနေရာ တဝှိက်တွင် တိုင်းရင်းသား လက်နက်ကိုင်နှင့် မြန်မာ့တပ်မတော်တို့ မကြာခဏ တိုက်ပွဲဖြစ်ပွားကာ မြေမြုပ်မိုင်းများစွာ ထောင်ထားသည့်နေရာလည်း ဖြစ်သည် ဟု ကျောက်မဲမြို့ နယ် ဒေသခံများက ပြောဆိုကြသည်။

“ မိုင်းက နေ့တိုင်း နင်းမိနေတယ်။ ရက်ဆက်တိုက်ပဲ။ ၂၀၁၉ ခုနှစ်ကတော့အများဆုံး လို့ ကျနော်ထင်တယ်” ဟု မိုင်းအဘမ်း က ပြောသည်။

သျှမ်းပြည် မြောက်ပိုင်း သီပေါ၊ ကျောက်မဲ၊ နမ့်ဆန်၊ မန်တုံ ဒေသများတွင် ယခင်တွင် မြေမြုပ်မိုင်း နင်းမိသည့် အရပ်သား သည် မရှိသလောက်နည်းပါး ခဲ့သော်လည်း ၂၀၁၉ ခုနှစ် မှ စတင်ကာ မြေမြုပ်မိုင်း နင်းမိမှုသည် နေ့စဉ်နဲ့ အမျှ စတင်ကြုံတွေ့လာရသည်။

“ တိုက်ပွဲတွေ မိုင်းတွေ ကို ပြည်သူတွေနဲ့ လွှတ်ကင်းတဲ့နေရာမှာ ထောင်စေချင်တယ်။ အခုက ပြည်သူတွေ သွားတဲ့လမ်းမှာထောင်ကြတယ်။ ဒီမိုင်းတွေ က ထောင်တဲ့သူတွေ သိမှာပါ”ဟု ကျောက်မဲမြို့နယ် စိုင်းရွှေ က ပြောသည်။

မိုင်းနင်းမိသည့် ပြည်သူများသည် ထိခိုက်ဒဏ်ရာရရှိကာ စားဝတ်နေရေး ရှာဖွေရန် ခက်ခဲနေကြကြောင်း၊ ထို့ပြင် မိုင်းနင်းမိမည်ကို စိုးရိမ်မှုကြောင့် တောင်ယာထဲမဆင်းရဲကြကြောင်း စိုင်းရွှေက ထပ်လောင်းပြောသည်။

မြန်မာ့တပ်မတော် နှင့် တိုင်းရင်းသားလက်နက်ကိုင် များအနေဖြင့် မိမိတို့ ထောင်ထားသည့် မိုင်းများကို ပြန်လည်ရှင်းပေးစေချင်ကြောင်းလည်း သျှမ်းမြောက် ပြည်သူများက တောင်းဆိုလိုက်သည်။

“ မြေမြုပ်မိုင်းတွေကို ဖြစ်နိုင်ရင် မသုံးစေချင်ဘူး။ မိုင်း ပညာပေးအနေနဲ့လည်း များများလုပ်ပးဈေင်တယ်။ တပ်မတော် နဲ့ လက်နက်ကိုင် အနေနဲ့ မိုင်းရှင်းလင်းမှုကို အရင်ဆုံးပြုလုပ်စေချင်ပါတယ်” ဟု မိုင်းအဘမ်း က တောင်းဆိုလိုက်သည်။

သျှမ်းပြည် မြောက်ပိုင်း နမ့်ဆန်မြို့ နယ် နှင့် ကျောက်မဲမြို့နယ် ယခုနှစ် လဆန်းပိုင်းတွင် မြေမြုပ်မိုင်းကြောင့် ၁ဦးသေဆုံးပြီး ၇ဦး ဒဏ်ရာရရှိခဲ့ကြောင်း သိရသည်။